Friday, July 13, 2007

غضب الشعب المصري وحش

غضب الشعب المصري وحش
من الوحاشة يعني

هكذا أعلنها مدوية السيد الوزير أحمد ابو الغيط في مُعرض تحذيره للإدارة الأمريكية من التدخل بفرض شروط وقيود على المعونة الأمريكية العسكرية والإقتصادية لمصر !!!

ضحكت حتى استلقيت على قفايا كما يقال بالعربية أو ضحكت حتى سقطت تحت المكتب كما نقول نحن من شدة الضحك بعد سماع هذه التصريحات النارية وتهديد مصر للامريكان إذا حاولوا مس المعونات العسكرية والإقتصادية التي يتفضلون بها علينا, وتهديدهم بماذا ياعالم ياهوووووووووه , تهديدهم بغضب الشعب المصري الوحش.
هذه المعونات التي لانعرف متى تأتي وفي اي مصارف تُصرف وفي حساب من تستقر في نهاية المطاف.
ونحن " اي الشعب اللى غضبه وحش" لاندري عن كل تلك الأمور ولانعرف من اين استقى السيد ابو الغيط معلوماته المغلوطة عن غضبنا الوحش.
رغم أنه أي الشعب يعني لم يغضب والاسعار ترتفع بشكل جنوني مستمر
ولم يغضب ولو نص وحاشة عندما تم بيع أغلب اصول البلد التي هي ملكه " ملك الشعب برضه" وباقي الاصول والفروع في طريقها للبيع.
ولم يعبر عن ادني غضب للانتهاكات التي تحدث في حقه في كل لحظة وعلى مدار الاعوام الماضية وفي كل مكان.

أيها الشعب هذه شهادة رسمية من السيد الوزير بأن غضبكم وحش

انتهزوا الفرصة حتى لايقع رأي الوزير في الارض ويصبح شكله وحش أمام الإدارة الامريكية لو طلع غضبكم مش وحش
وحتى لايطلع شكله هو اللى وحش أمام جموع الصحفيين لولم تغضبوا.

أبوالغيط ‏:‏ حذرت الإدارة الأمريكية من غضب المصريين

تحديث
وجدت هذا المقال عن طبيعة المساعدات العسكرية الأمريكية لمصر

طبيعة المساعدات العسكرية الأمريكية لمصر


12 comments:

mo'men mohamed said...

السلام عليكم ورحمة الله وبركاته
انت بتحطى المواضيع كلها ورا بعضها الواحد مبيلاحقش يتابع عليكى
اهدى شوية
المهك نرجع لموضوعنا

بالنسبة للمعونة الأمريكية
على حد على ان ميزانية مصر تقريبا 130
مليار
وان الميزانية 2
ميليار
انا مش متأكد من الحكاية دى
بس تفتكرى لو احنا امتنعنا عن المعونة دى
ده شىء حيأثر فينا ولا احنا بس بنتكاهن
وعشان تحطى فى الأعتبار ان اى دولة تخلت عن الميزانية دى بقت من أكبر الدول وأغناها
وماليزيا اكبر دليل على كلامى ده
السلام عليكم

Bella said...

mo'men mohamed

مرحبا بك

والله يااخي لم اتعمد الإكثار من الموضوعات

كل مافي الامر اني كنت اتابع الاخبار ووجدت الخبر في وجهي فتضايقت من تصريحاته فقررت الرد عليه
بس دي الحكاية

أما بقى حكاية نستغني عن المعونة او لا

فالمشكلة ان القرار ليس بيدنا نحن ولكن بيد من يتسلم المعونة

نحن حتى لانعرف مصيرها واين تذهب

وطبعا انت عارف ان كلها مصالح
ومن يقبل بالمعونة يقبل بالتبعية للدولة التي تعينه
وطبعا من يحكمونا لايريدون الاستقلال ولايحزنون

هم ربما يريدون لنا يجزنون دي باعتبار اننا سنخبط راسنا في اقرب حائط لو طلبنا طلب بالتأكيد لن ينفذوه

انا بس استغربت من ابو الغيط ان له نفس يهدد الادارة الامريكية

يعني صراحة موقف كوميدي جدا

تصور نفسك ماشي في شارع وقابلك واحد متسول واعطيت له اللى فيه القسمة وبدل مايقبل ويسكت نزل فيك تهديد لان الحسنة لا تعجبه وقرر يدعي عليك ويهددك بالويل والثبور وعظائم الامور

عن نفسي لو حد عمل معايا كده ح اخد حسنتي واسيبه يتفلق

ههههههههههههه

Ayyam said...

أعتقد أن الراجل ده معزه أس تلاته..أولا يعنى بجلاله قدره ميعرفش أن كلامه الغبى ده ممكن يضحك عليه و علينا الأمريكان وغير الأمريكان..يعنى المثل بيقول أقرع ونوزهى..مش أقرع وقليل الأدب...وبعدين قصده إيه بقه زعلنا وحش....الجدع ده بيحلم ولا أهبل وهو أمتى أحنا عندنا فرصه نزعل..دا اللى بيزعل بيطيروا النوم حتى من عين جرانه....ياحرام ده حتى مصاريفنا زادت بسبب كتر السجون وسرقه أموال الناس ..الله يكون فى عون مصر لما يمثلها أهطلها!

Bella said...

Ayyam

مرحبا بك

هو ده اللى ضحكني صراحة
انه بيهدد الامريكان بحاجة هو عارف تماما انها مش ح تحصل

ههههههههههههه

زي اللى القزم اللى بيتخانق مع عملاق ويقول للناس شيلوه من فوقي أحسن اموته

هههههههههههه

فعلا موقف يموت من الضحك
ضحك كالبكاء

مش كفاية بيشحتوا علينا في الفضائيات واعلانات دور الايتام اللى بيقعدوا يلموا عليها فلوس ولا تخليهم التدريجي عن إدارة البلد ومطلوب مننا اننا نتبرع لعلاج بعض
ونتبرع لأكل بعض
ونتبرع للبس بعض

والدولة كل اللى عليها تلم الضرايب
وتلم ايرادات القناة
وباقي المرافق اللى لسه مابعتهاش
وتبيع باقي الاصول
وتلم الفلوس دي كلها وتحطهم في بنوك سويسرا تمهيدا لعملية الهروب الكبير

طريقتهم بتوحي انهم ممكن لو لقدر الله حصل اي خطر عليهم ح يسيبوا البلد ويهربوا ونبقى فوضي اكتر من العراق بدون غزو

الايام الجاية اكيد ح يكون فيها صعوبات كبيرة

ربنا يستر

micheal said...

هههههههههههههه...غضب مين بس...يمكن قصده أن احنا حندعلي عليهم كل شويه و مين عارف يمكن ربنا يستجيب
:)
تحياتي لكي

Bella said...

micheal

مرحبا بك

صدقت والله

يبدو اننا اصبح لانفلح الا في الدعاء وقت المغربية
يمكن دعوة ولية ساعة مغربية تجيب نتيجة وتقصف الرقبة اللى هية

هههههههههه

عصفور المدينة said...

زعل الشعب وحش فعلا بس في نفسه أو فوق السطوح ويبدو انهم عارفين كدة كويس والح... بوش يظهر عارف كدة

مُرَاقِبْ مِصْرِي said...

نحن فعلا ينطبق فينا المثل القائل
حسنة وانا سيدك!!

وبعدين هو البيه بيهدد بغضب الشعب المصري الوحش (اللي هو الغضب مش الشعب) ليه وبأمارة إيه؟

هو احنا أصلا كنا بنشوف حاجة م المعونة الهباب دي؟

يمكن يقصد بالشعب المصري الشعب المستفيد بالمعونة؟ من نوعية كبار رجال الدولة اللي بيحطوا في جيبهم وكبار رجال الأعمال اللي بيحطوا في استثماراتهم؟ لو كدة يبقى طلعا عنده حق!!

غضب هذا "الشعب المصري" وحش جدا!! وممكن يئذيهم ويبهدلهم!!

اغضب يا شعب كمان وكمان ووري أمريكا العين الحمرا... آل يقطعوا المعونة قال ويخفضوها!! هي جيوب الأكابر لعبة والا إيه؟ اغضب يا شعب وقطعهم

أحمد المصري said...

هو غضب الشعب المصري فعلا وحش بس المهم يغضب
الشعب المري هايسيب اهانه القضاء و بهدلة رغيف العيش و اعتقال ابنائهم و الاقلام اللي الحكومة بتديهاله على قفاه
و هايجي يغضب دلوقتي لما امريكا تقطع المعونة اللي مش عارفين اصلا بينعمل بيها ايه بخلاف اظهار الذل لامريكا و طاعتها كثمن للمعونة
شكرا
ahmedelmasry.wordpress.com

Bella said...

عصفور المدينة

مرحبا بك

والله عندك حق

منذ عدة ايام كنت اتناقش وزميلتي في العمل عن ارتفاع الاسعار الجنوني وفاجئني ردها

قالت
العالم كله الاسعار بترتفع فيه اشمعنى احنا يعني وبعدين احنا مهما كان احسن من غيرنا كتير !!!!

ردها ألجمني صراحة لاني لم اتوقع ان تفكر بهذا المستوى

اذا كانت هي تفكر بهذا المستوى فكيف بباقي فئات المجتمع ؟؟

بالتأكيد سيادة هذه الافكار وتحكمها في الناس هو ماأوصلنا لحالة السلبية وعدم الرغبة في مساعدة أنفسنا ودائما ماننتظر ان يتحرك احد ليعطينا حقنا رغم ان هذا التحرك لن يأتي الا أننا ننتظر

ويبدو ان الانتظار سيطول

Bella said...

مُرَاقِبْ مِصْرِي

مرحبا بك

الأمثال التي تنطبق علينا كثيرة للغاية لدرجة اننا لو فكرنا نبيعها او نستغل حق الأداء العلني لأصبحنا من أغنى شعوب الأرض
لكن الخوف وقتها برضه الاموال دي تتنهب ونطلع من المولد بلا حمص

بس تصور نظرية برضه

يمكن احنا لاننا شعب يموت في نظرية المؤامرة كنا متصورين ان البيه الوزير يقصدنا احنا بحكاية الغضب دي
وهو فعلا ممكن يقصد الشعب التاني اللى عنده مشاريع وبيقترض بالمليارات ولايسدد القروض وبيحتكر السلع وبيتاجر في دمنا ودموعنا واللى يلاقيه تحت ايده

هو ده فعلا الشعب اللى ممكن يغضب لو حصل للمعونة حاجة

اما احنا مالنا ياعم
هو احنا شايفين من المعونة دي حاجة

قالك ايش ياخد الريح من البلاط

ههههههههههه

Bella said...

أحمد المصري

مرحبا بك

انت بنفسك قلتها

بس على فكرة الشعب ساب كل الحاجات اللى انت قلت عليها دي كلها ولم يتحرك
الخوف اصبح تحت الجلد ويحتاج لعملية جراحية لإزالته حتى يتحرك الشعب

اما بدون العملية فلاحياة لمن تنادي

والعملية في النملية والفيل في المعونة