Thursday, October 4, 2007

ليموزيني ولا تغديني

أمر بحالة كسل تدويني شديد وعسر هضم إخباري أشد

أثناء تجولي في الصحف وجدت هذا الخبر الذي يوضح مدى السفه وحب المنظرة الذي وصلنا له

نفسك تتزفّ في ليموزين؟.. بسيطة: ١٥٠٠ جنيه إيجار ومافيش ضمانات.. المهم الشياكة

أخيراً إنضمت السيارات الليموزين بأنواعها التي - لم اسمع بها الا من الخبر المنشور أفادكم الله - إنضمت لقائمة السفه في إقامة حفلات الزواج بمصر والتي يعاني فيها عدد كبير وصل لملايين من تأخر سن الزواج لاسباب كثيرة على راسها المشاكل الاقتصادية التي تحرم الكثير من الشباب والشابات من تحقيق حلمهم المشروع في حياة شرعية وسوية.

هذا طبعا لايعني اني احجر على من اعطاهم الله من فضله واطالبهم الا يفرحوا وينفقوا مما افاء الله به عليهم .
ولكن استغرابي من عدم اقتصار استئجار الليموزين على الاثرياء وعلية القوم ولكن هناك من الطبقات العادية ولن اقول المتوسطة من يؤجر هذه السيارة ليتمنظر بها في حفل زفافه.

الحقيقة ان العقل يحار في فهم هذا الشعب ومايتفرد به من سلوكيات غريبة منها السفه في الانفاق للتدليل على الانتماء طبقة اجتماعية معينة او المنظرة والفشخرة التي قد تجعل العريس يستدين ليقوم بالوفاء بإلتزامات مظهرية لاطائل من وراءها ولن يجني صاحبها سوى الحسرة على الديون التي سيغرق فيها بعد إتمام هذا الزواج الميمون.

لااعرف شعور العروس التي تصر على ان تكون زفتها في المكان الفلاني ويغني في فرحها المطرب العلاني وتركب الليموزين الترتاني

ياللا

العروسة للعريس والجري للمتاعيس


ويمكننا استبدال المثل القديم

لاقيني ولاتغديني

بالمثل الطليعي المعتبر الذي يتناسب مع روح العصر والتطور الحاصل فيه

ليموزيني ولا تغديني

لانه بالتأكيد لن يجد العريس مايغدي عروسه به حتى يسدد ماعليه من ديون


22 comments:

Monzer said...

والله يا بيلا
انا الفرح والحاجت ده بالنسبة ليا
ماتلزمنيش خالص
اهم حاجة شهر العسل
ده فرحة العريس والعروسة بجد
وده الفسحةالوحيدة الى هاتيتمعو بيها
بعد كده لما هايصيفوا مثلا هايبقى فيه عيال
عاوزة أهلها تسافر معاها، او هو ياخد أهله
او ممكن الشغل او المصاريف ماتسمحش

فيوفر أي حاجة ويعلى بها المكان الى يسافر فيه
ده رايى
مثلا لو معاه فلوس يروح بيها بلطيم يوفر من الفرح الى هايعمله ويوروح اسكندرية او شرم ولو معاه يروح شرم يسافر بره

أصل هما يومين وبعد كده ربنا ما يوريكى

صحيح التعليق ده طويل قوى أدينى بقول

وع الجانب الآخر فيه عرسان بتأجر البدلة بالاسكارف بالقميص ويلمع جزمة قديمة عنده
والعروسة تروح تأجر فستان

وأي حد بيزفهم باي عربية اناشالله عربية 28
ويعملوا حنة ودى جي ب 150 جنيه وشكرا
وبيفرحوا برده
ويروحوا يومين فى بلطيم ولا جمصة
وسبحان الله ده بيفرح وده بيفرح

انا قلت هاطول فى التعليق صح

فى الفرح باه نعزم ييجى 200 فرد من كل عية مية
تخيلى باه لما حد ياكل متينفرد ونسهرهم ويتبسطوا
ويمشوا يتريقول على بدلة العريس ومكياج العروسة
وام العريس بصت بقرف للعروسة
وام العروسة مخنوقة من اخت العريس
أو الأكل ماكانش حلو
وايه المطرب ده
او العريس ده أحلى م العروسة
او العروسة برقبت العريس المقفع ده
بلاوى
كفاية كده
أنا كنت هاكتب تدوينة عندى
بس كتبتها فى تعليق عندك أكبر من البوست نفسه :))
ربنا يجعله عامر

Monzer said...

آه صحيح ده أنا أول تعليق

altwati said...

ازيك
وإيه يعني لما العروسة تركب ليموزين
مرة في حياتها
مش خسارة فيها
هما الستات والرجالة النيجر أحسن منها
بلاش الكيل بمكيالين
زي الأمم المتحدة
صباح الخير

Alexandrian far away said...

ياااه يا بيللا
هو لسه فيه حد بيتجوز في مصر عشان يزفوهم في ليموزين؟
ولا يمكن نتيجه لتأخر سن الجواز في مصر بيبقى العريش والعروشه محتاجين عربيه مريحه عشان ألام الروماتيزم ونشر الركب والذي منه، وشوية الشحه الى حيوفروهم ينفعوهم في شهر العشل

والله ناس فاضيه

Anonymous said...

بيللا

مافيش أجدع من عربية صاحبك اللي يزوقها عند بتاع الورد اللي ع الناصية
إنسانية أكتر

Unknown said...

بعد كده يبقي من شروط العروسه الليموزين يا مافيش فرح

Bella said...

Monzer

مرحب منذر

والله ده تفكير الناس العملية العاقلة اللى بتفكر في مصلحتها دون الدخول في مشاكل الديون

يعني تصور اتنين اصلا بنوا حياتهم بالعافية وبدل مايبدأوا براحة شوية تلاقيهم مكبلين نفسهم بكيمة مهولة من الديون لتأجير القاعة وعدد المدعوين والمطرب الفلاني والراقصة العلانية

وفرحي مش ممكن يكون اقل من فرح فلانة
والحركات الغريبة دي كلها

وبعد كده منتظر ازاي ان الناس تستمر حياتهم بدن منغصات وهي بدأت بطريقة غلط اصلا

رغم ان المعازيم مثلا دائما مش عاجبهم اي حاجة ولهم اعتراضات وبينتقدوا اي حاجة يقابلوها

ليه الناس تفكر في المظاهر لدرجة انها تقيد نفسها بالاموال دي كلها

حتى لو معهم المبلغ اللى يعملوا به فرح فخم ويدفعوا آلاف شمال وآلاف يمين برضه سفه كبير جدا انفاق كل هذه الاموال على عدة ساعات

وزي ماانت قلت

الى عمل فرح في السطوح بيفرح
واللى عمله في فندق خمس نجوم بيفرح

فليه الاسراف ولماذا لايتم توجيه الفلوس لعمل مفيد

لو الفلوس كتيرة قوي كده لماذا لايخرج جزء منها كتبرع للمساهمة في تزويج اتنين امكاناتهم المادية لاتساعدهم لاتمام الزواج

اعتقد دي ممكن تكون اكبر هدية يقدم العروسين لغيرهم ويبدأوا حياتهم بطريقة عملية ومريحة وفي نفس الوقت يسعدوا غيرهم وياخدوا ثواب كبير لستر مؤمن ومؤمنة

اين شيوخ الفتاوي من هذه المظاهر والبذخ الفارغ

Bella said...

altwati

مرحب تواتي

والله ماحدش قال ان العروسة خسارة فيها الليموزين

وبالمرة برضة مش خسارة فيها طيارة خاصة
وكمان مش خسارة فيها تقضي شهر العسل في اوروبا

لكن مفروض يعني ان الواحد بيقدر امكاناته ويتصرف على اساسها

يعني الرحمة حلوة برضه
ومش معقول الجري ورا المظاهر وصل لدرجة الليموزين يعني

فماذا ستضيف الليموزين لسعادة العروسين عندما تبدا رحلة تسديد الديون ويبدأ اللوم المبطن يظهر في كلام عمنا العريس الذي رضخ لمطالب العروس او ماذا سيفعل من قرر تقليد من لديه امكانات اكبر

بعدين انا مش عارفة طقوس الزواج في النيجر اخبارها ايه ؟؟

ههههههههههه

Bella said...

Alexandrian far away

مرحبا اخي العزيز

تصور انت بقى في ظل ازمة الزواج الحالية تجد من يخرج لسانه للمحرومين اللى مش لاقيين عربية كارو ينزفوا عليها اصلا ويركب ليموزين

ههههههههههههه

والله فعلا عالم فاضية
واللى معاه قرش محيره يجيب حمام ويطيره

Bella said...

يَحيى المِصري

مرحب يحيي

يبدو ان الناس لم تعد تعترف بالانسانيات ولم تعد تهتم بها ولهذا سيصبح الليموزين من مستلزمات الزفاف وسيتم تعميمه على اوسع نطاق

وخللى بتاع الورد ياكل الورد اللى عنده بقى

Bella said...

EmY

مرحب ايمي

هو يبدو فعلا ان بدون الليموزين لن يتم عقد القران

ومش بعيد يكتبوا في شروط الزواج ضرورة وجودة الليموزين ولو تقاعس العريس عن توفير الليموزين يصبح الزواج باطل

ههههههههههههههه

ملك الكبدة said...

اللي يخليني اجيب ليموزين للفرح عياقة احسن ليا اروح واخد ليموزين و لا لمبورجيني ايجار جديد و بدال ما تبقى عياقة ساعتين تبقى العياقة خمس سنين مثلا قابلة للزيادة و من بعدها الشحاتة ان شاء الله
الا صحيح الليموزين عالعريس و لا عالعروسة؟

Bella said...

ملك الكبدة

مرحب مرحب

والله فكرة حكاية الايجار الجديد

بس مش شايف ان خمس سنين كتير

افرض العربية طلعت مقلب ولا مش مريحة في الملفات
ح تلاقي نفسك اتدبست في خمس سنين مرة واحدة ولسه ح تدور على واحدة تانية

ههههههههه

بس والله عاجبني جدا النظرة الواقعية واستشراف المستقبل

هو المشكلة ان ممكن الواحد مايلحقش يشحت اصلا لانه ح يكون مشرف في مكان ماينفعش يخرج يعمل لفة شحاتة ويرجع

ههههههههههههه

سؤال وجيه الليموزين على العريس ولا العروسة

ممممممممممم

محتاجين نشوف حد جرب الحكاية دي ونسأله

بس برضه ح تطلع حكاية مالهاش قعدة معينة

طيب هي الستاير والسجاجيد على العروسة ولا العريس ؟؟

klmat said...

كلامك جميل ومعقوللانسانه عمليه
الفرح فى القلب وحبايبك حواليك
بس فى ناس بتحب الفشخره والتباهى
وممكن تكون فلوس مش تعبانين فيها
الوسط حلو فى كل حاجه
اسلوبك جميل وتفكيرك واقعى وعملى
كل سنه وانت طيبه
تحياتى لك

Layla said...

ليموزين كمان...هي ناقصة مصاريف

الناس زمان كانت بتعمل افراح عشان تتبسط...النهاردة الافراح اصبحت كارثة على اللي بيتجوزوا لانهم لازم يعملوا فرح كبير والا الناس هتاكل وشهم...وكارثة على المعازيم اللي بيبقوا مجبرين انهم يعملوا فرح احسن منه او على الاقل في نفس المستوى عشان برضه الناس متاكلش وشهم

انا قررت من الاخر اني هعمل فرح تعبان جدا..وهو الناس تاكل وشي ارخص من التورتة

ده ايه الغلب ده...حاجة تقرف

Bella said...

klmat

مرحبا بك

والله يااختي المفروض الواحد يتصرف بناء على امكانياته
مصيبتنا التقليد الاعمى حتى لو كان مش في مقدورنا نعمله
كل واحدة تقلد فلانة زميلتها او علانة بنت خالتها وانا مش اقل منها واشمعني هي وانا لا

وفي المقابل فعلا فيه ناس بتصرف لاسفه ده لانها مش تعبانة في الفلوس ودش كارثة تانية
ان الاهل اصلا لايعلمون ابناءهم الاقتصاد والتصرف بحكمة
بل يلبون كل احتياجاتهم فيصبحوا انانيين لايفكرون في قيمة الفلوس ويتصرفون ببذح وسفه

Bella said...

Marvel

اهلا وسهلا

والله فكرة

هو كده كده المعازيم مش بيعجبهم العجب ولا الصيام في رجب
ودايما يعيبوا على اي فرح يحضروه

فبجملة التعييب مش يبقى الواحد دافع دم قلبه وكمان ياخد دش تريقة

المشكلة فعلا ان السفه بلغ حد خطير جدا وكل يوم الناس تتفنن في تصعيب الامور على نفسها

عالم غريبة

وبعدين يقول لك فيه ازمة زواج في البلد

Soooo said...

بقى شيء طبيعي ان الناس تتمنظر الايام دي .. ومش انتي بتقولي في الخبر ان ايجار الليموزين بتاع 1500 جنيه تقريبا .. انا بقولك اهه .. اي واحده هيتزف ابنها في عربيه زي دي هتقول لكل الناس ان العربيه دي ايجارها عشرميت الف جنيه

بس بيني وبينك .. العربية من جوه حلوه فحتتتتتت .. وبراح بطريقه رهييييييبه .. بس المشكله بقى .. ان اهل العريس واهل العروسه هيركبو فيها كلهم مع العرسان .. يعني يا فرحه ماتمت

ذو النون المصري said...

انا اوافق يحيي المصري في كلامه
مفيش احسن من عربية صاحبك اللي بيزوقها بمزاجه للزفه بتاعتك
فعلا انسانيه اكثر
تحياتي

Ahmed Al-Sabbagh said...

هو ده بقى الحقد الطبقى
ههههههههه
عندك انا مثلا بفكر اجيب طيارة ليموزين
وفندق ليموزين
ماهو مش معقول هبقى عريس واروح لغاية الفندق
واكل ليموزين جاى من برة عشان الاكل هنا متلوث
والمعازيم ليموزين طبعا
مش هعزم ناس عادية لأ
ناس متأجرة من شركة ليموزين بردة
وسيتم نقلا الفرح على الهواء ليموزينيا
طب تعرفى يا بيللا
انا بفكر اجيب عروسة ليموزين
امممم
بس تبقى ازاى دى
ههههههههههه
يا حاجة احنا لاقيين ناكل
عااااااا وااااااا

غمض عينيك said...

وياريت ممكن ياخد العروسة ويفسحها في العرية
لا د ال 1500 جنيه دي يدوبك 8 ساعات يعني الزفة وباي باي
واساس لا العريس ولا العروسة هيكونوا فايقين

زي ما انتي بتقولي
منظرة وخلاص

Anonymous said...

و فرح ليه أساساَ
حد فى الدنيا يدفع فلوس علشان يجيب لنفسه مصيبه؟
عايزين أبسط حاجه و أكتر حاجه عمليه؟ بلاش تتجوز مصرية
هاتخرب بيتك فرح و شقة و الذى منه
علشان الهانم عايزه عيل
حتى إسمك هتلهفو منك
و بعد ماتجيب ولى العهد
هاتديك بالجزمه