Sunday, February 3, 2008

سمكة السبتية




عندما كنا أطفال وكان يتكرر انقطاع التيار الكهربي كنا نسمع تبريرات من عينة أن فار السبتية قام بقرض الاسلاك مما تسبب في انقطاع التيار الكهربي.
وظل هذا الفار العتيد يزور احياءنا ويتسبب في انقطاع التيار حتى صار الحديث عن اي انقطاع في اي خدمة يستدعي في الاذهان صورة فار السبتية وهو يقضم الاسلاك ويخرج لنا لسانه.
ومنذ أن وقعت أزمة انقطاع النت يوم الاربعاء الماضي وتضاربت الأقوال بين الحديث عن سوء الأحوال الجوية أو سفينة تسببت في قطع الكابلات حتى ظهرت تبريرات مضحكة من عينة أن قرشاً أو سمكة قد قضمت الكابلات التي تمدنا بخدمة الانترنت.
ورغم أن هذا السبب أو غيره ممكن يتسبب في قطع الخدمة الا أن التصريحات المتضاربة وغير المنطقية التي انهمرت فوق رؤوسنا جعلتني اصدق بعض التكهنات التي تميل لوجود مؤامرة او عمل تخريبي متعمد وراء قطع هذه الكابلات التي تزود مصر والهند وبعض دول الخليج بخدمة الانترنت لعزل المنطقة وتكبيدها خسائر مالية فادحة.
الغريب أننا في مصر وعلى العكس من الدول المتضررة الاخرى المشاركة لنا في الكارثة أكد البعض عندنا أن البورصة لم تتضرر رغم ان السعودية مثلاً أكدت ان أسواق المال تضررت لديها بشكل كبير بسبب انقطاع النت!!!
والحقيقة لاادري هل القائمون على اي شيئ عندنا يعيشون في كوكب آخر أم انهم يتصورون أننا أغبياء وسنصدق تصريحاتهم الغريبة !!!
ولماذا أصلا إخفاء أمر الخسائر اذا كانت قد وقعت حتى تتمكن الشركات والجهات المتضررة من المطالبة بتعويضات من الشركة صاحبة الكابلات ؟؟
أمر آخر استرعى انتباهي وهو أن الموقع الوحيد الذي يفتح بسهولة هو موقع مصراوي وباقي المواقع أما لاتفتح اصلا أو تفتح بعد ساعة او يزيد ولا يظهر بها الا الإطار الخارجي للصفحة.
بعد كل هذا الشلل وفقع المرارة طلعت علينا سيول التصريحات الخزعبلية من عينة أن العطل بسيط وسيتم اصلاحه في خلال 48 ساعة ثم امتدت هذه الساعات ليخرج علينا غيرها لنعرف أن السفينة التي ستقوم بإصلاح العطل لن تصل لمكان القطع قبل يوم الثلاثاء !!!
وطبعا لم ينسى المصرحون اتحافنا بتكملة لهذا الخبر مؤداها ان العطل سيتم إصلاحه فور وصول السفينة ولن يستغرق الاصلاح طويلاً رغم انه لاتوجد جهة تؤكد حتى الأن ماهية هذا العطل ولا حجم الضرر ولا المتسبب في هذا العطل !!!!
ورغم اني أحاول منذ فترة الشفاء من داء نظرية المؤامرة الا أن الاحداث لاتساعد على هذا وخاصة بعد أن طالعت هذا الخبر على موقع المصريون الذي فتحت صفحته الرئيسية في نصف ساعة كاملة !!!

الحقيقة ان تغطية موقع مصراوي لخبر انقطاع النت والتعليقات الواردة من القراء على هذه التغطية أمر آخر يستدعي المتابعة ويفجر براكين الضحك على ماوصل إليه حالنا نحن المستهلكين لتكنولوجيا الغير والمعتمدين كلياً عليها وعلى طبيعة المعتمدين على هذه الخدمة ايضاً !!!

تابعوا هذا الرابط والتعليقات الواردة عليه

خدمات الانترنت تعود لطبيعتها بعد 10 ايام


صراحة عقلي المؤامراتي العتيد يحدثني بأن في الأمر إن كبيرة جدا وسيطول الأمر حتى يصل بنا الزهق والملل لقبول اي نوع اشتراك جديد سيتم الحديث عنه لاحقاً وهذا الشعور المؤامراتي لم يتولد من فراغ بل بعد قراءتي لتصريح غريب من رئيس مجلس إدارة المصرية للاتصالات يتحدث فيه عن كابل مصري سيُخفض سعر اشتراكات الانترنت !!!!

يبدو أن سمكة السبتية عفواً أقصد سمكة اسكندرية للاتصالات سيكون لها فوائد عظيمة الفترة القادمة

ولاعزاء لكل من تسول له نفسه محاولة الدخول على النت هذه الايام او يوسوس له عقله بتصفح اي موقع من اي نوع

ملحوظة

هذا الموضوع كلفني عدد من الساعات لاأستطيع عدها من كثرتها ويكفي أن اقول لكم اني اكتبه منذ بداية اليوم وفي نفس الوقت أحاول منذ الصباح فتح مدونة مختار العزيزي ولامجيب اللهم الا الخلفية المشهورة لصفحته !!!

النجدة

إضافات هامة

القاعدة وتخريب كابلات الانترنت


تطورات جديدة في قضية تخريب كابلات الانترنت


29 comments:

ابن حـجـر الـعـسـقـلانـى said...

معلش ..ماهو كابل إيه دة اللى يقدر يأثر على مصر .. مصر .. بلد السبعتلاف سنة حضارة .. بلد الأمن و الأمان .. ييجى كابل يتقطع على سواحلها فنقول إن مصالحها اتأثرت .. كلا و ألف كلا .. مصر أكبر من الحاجات التافهة دى .. دة حتى رئيس وزراءنا يبقى مهندس اتصالات

و طبعا بعد الأدلة الدامغة اللى أنا قلتها من شوية .. مافيش أى مجال لمؤامرة أو كلام من النوع دة

مش عارف ليه حاسس إنك مش مقتنعة بالكلام اللى انا قلته

:) :) :)

على العموم هاقول لك نصيحة ..من خاف سلم .. و يا بخت من بات مظلوم و لا بات ظالم

عصفور المدينة said...

هو نظرية المؤامرة قائمة طبعا بس بخصوص البورصة هو فيه باند ويدث محدود متاح واللي هو مكنك أصلا تكتبي ومكنا إن احنا نقرا هما حقيقة وانتي عارفة إني من أنصار نظرية المؤامرة بس هما نجحوا في إدارة الأزمة بشكل جيد وخاصة إنهم عملوا لنا تعويض خلوا النت مجاني شهر كامل حتى التليفون
هما نفسهم ابتدوا يتكلموا عن مؤامرة بعد قطع كابل دبي
وتوقيع عقد الكابل الجديد إذا كان لم يسبقه تحضير ففي رأيي هو أسرع إجراء طواريء عاصرته في حياتي
وبخصوص عدم تأثر البورصة هما وفروا الباندويدث على ما يبدو للبورصة وجم علينا شوية مش مشكلة

أما المواقع اللي السيرفرات بتاعتها في مصر مش بس مصراوي على فكرة حتى الأهرام بتشتغل والنت قاطع عشان تركيبة النت ممكن تسمح بكدة لأن يعتبر إحنا في شبكة مع بعض

ويلا ولأول مرة أقعد اتفرج على فيديوهات مصراوي وأول مرة أقرأ التعليقات في مصراوي
وفيه موقع دليل المواقع المصرية

http://www.egypty.com/press/egypt.asp
شغال كويس
فاكرة كام مرة أنبه إن النت ممكن يتلغي
على كل لو قريتي تعليقي ده خلال العشرة أيام القادمة يبقى أكيد عندك نت

mo'men mohamed said...

انا بقى بأفكر من ناحية تانية
ناحية خطورة النت الإعلامية
حتى امتدت خطورته لتوعية الناس
السلام عليكم

عدى النهار said...

يظهر إنها سمكة فعلاً.. الخبر التالى من موقع المصريون

وزير النقل يؤكد عدم دخول أي سفينة في منطقة الكابلين البحريين المقطوعين ومصادر وزارة الاتصالات تنفى أن يكون القطع في كوابل أرضية

Bella said...

ابن حـجـر الـعـسـقـلانـى

مرحبا بك
هو ده بقى اللى فارسني وفاقع مرارتي بصراحة
اننا دايما نتعامل مع اي مصيبة من منطلق اننا دولة الأمن والأمان ومافيش اي حاجة تقدر تمسنا
واللى حصل بخصوص قطع النت وتاثيره على الاقتصاد والخسائر المفترضة وتاكيدات السادة عديمي السكر ان كله تمام فكرتني بتأكيدات شبيهه ايام انتشار سارس في العالم وتأكيدات وزير الصحة ان مصر بعيدة عن اي خطر رغم ان كل بلاد الدنيا كانت بتاخد احتياطها لان انتقال شخص حامل للمرض سينقله

لكن طبعا مصر أكبر واعلى من كل الحاجات دي

حتى الجراد فلقونا تصريحات بان كله تمام وتحت السيطرة لغاية مالقينا الجراد منتشر في بلكوناتنا وظلت التصريحات برضه قائمة ان رغم وصول الجراد لكن لم تحدث خسائر في الزراعات وكأن الجراد كان جراد صايم او بيتعالي على احتياجاته البيولوجية وقرر ماياكلش من محاصيل بلد الامن والامان

حاجة تفرس صراحة

نفسي المسؤولين عندنا يكونوا مسؤولين فعلا ويبطلوا اسلوب المطيباتية ده لان نتائجه وخيمة فعلا وهم مش بيكلموا شعب معتوه

جاتهم الهم

وفعلا من خاف سلم
ويابخت من بكاني وبكا على ولا ضحكني وضحك الناس على

ههههههههههههههه

تحياتي

Bella said...

عصفور المدينة

مرحبا بك

انا لما سمعت بحكاية الباندويدث المحدود بطلت افتح الكمبيوتر كذا يوم
صراحة حسيت ان غيرنا محتاج للنت اكتر لانه بياكل من وراه عيش ومش ناقصهم اننا نقعد نتصفح
ماحبكيتش يعني

بس لما قريت ان الخدمة اتحسنت قلت اجرب كده
طبعا جالي كل انواع الامراض بسبب الملل والزهق وخصوصا ان فيه مواقع مابتتحش اصلا وفيه مدونات اساسا مافتحتش
يعني مثلا مدونة مختار العزيزي بدن مبالغة فاتحاها من اول اليوم وكل شوية اقول ح تفتح اهي
يادوب اشوف اطار الصفحة وممكن اشوف بعد ساعتين او تلاتة لون الخلفية
ولغاية دلوقتي مافيش ولا موضوع رضى يفتح معايا خالص

بس مدونتي عرفت بعد يوم كامل انزل فيها موضوع وده يعتبر انجاز واختبار هائل لقدراتي على الاحتمال

هههههههههههه

بخصوص البورصة انا برضه قلت اكيد وفروا لهم جزء والا لو سابوهم تحت رحمة السعة واستهلاك المستخدمين يبقى عليه العوض في اموال الناس بقى

هو طبعا المسلي في الموضوع ان الواحد لقى نفسه بيتابع موضوعات ويقرا تعليقات ممكن قبل كده ماكانش يتابعها قوي زي تعليقات القراء على موقع مصراوي

ههههههههههههه

بس والله المصريين دول شعب ظريف جدا وحاضر البديهة وماحدش يعرف يضحك عليه بتصريحات هلامية

ههههههههههههههههه

اما بقى نظرية المؤامرة فانا كمان من انصارها وبشدة الحقيقة
واول سؤال خطر بذهني لما عرفت ان النت قطع من عدة بلاد ياترى جيراننا كمان انقطع عندهم ولا ايه النظام ؟؟

ولما كابل دبي انقطع قلت واضح بقى ان السمكة اياها لسه جعانة فقررت تكمل بكابل دبي وتحلي بكابل قطر بقى

وواضح انها سمكة نفسها مفتوحة ع البحري وواكلة شوية كابلات مخللة فتحت نفسها

ههههههههههه

وربنا يسهل ويصدقوا في حكاية الكابل البديل دي علشان مانقضلش كل شوية تحت رحمة اي سمكة متشردة معدية هي واولادها تقطم قطمتين وتمشي

ويارب كمان يصدقوا في حكاية الشهر المجاني دي

ربنا يستر

الواحد فعلا مايقدرش يستغني عن النت
ربنا يصبر الناس اللى كل اعمالهم مرتبطة بالنت
خراب بيوت والله

تحياتي

Bella said...

mo'men mohamed

مرحبا بك

هو ممكن يبقى فيه تحديد لدخول بعض المواقع زي الفيس بوك مثلا او غيره

عموما حكاية انهم يحجموا المواقع التي تقوم بتوعية الناس ممكنة ولكن صعب عملياً تنفيذها لان كل يوم تظهر آلاف بل ملايين المواقع

صعب جدا يتحكموا في الامر

ربنا يستر

تحياتي

Bella said...

عدى النهار

مرحبا بك

هو فعلا وزير النقل نفى ان يكون قطع الكابلين بواسطة سفينة وهناك حسب موقع المصريون تحقيقات تجري لمعرفة سبب قطع الكابلين ويُقال انه ربما يكون بسبب تدريبات عسكرية جرت في المياة الاقليمية بواسطة غواصة او ماشابه ونتج عنها قطع الكابلات ربما بواسطة طوربيد او اي سلاح

وربما يكون القطع متعمد

وهناك مناقشة جرت على فناة الجزيرة حيث تحدثوا عن ان السبب غير معروف حتى الآن وتناقشوا مع احد الضيوف الذي استبعد ان يكون القطع بسبب مراكب صيد او سفن كبيرة حتى لان الكابلات البحرية تكون على اعماق بعيدة جدا وصعب ان تقطعها سفينة مارة

لانعرف اذا كان سيتم الكشف عن السبب الحقيقي فور معرفته ام سيلحق بغيره من الاسرار

عموما لااستبعد مطلقا وجود فاعل في هذه العملية

تحياتي

عدى النهار said...

مختار كاتب كلام حلو عن الموضوع ده حاولى تانى معاه

الطائر الحزين said...

مش عارف حاسس كدة ان هيكون فيه وسائل أخرى غير الكابلات والحاجات دى هتدخل ستلايت مثلا طبعا ثمنها عالى لكن تكلفتها أقل على المدى البعيد

سبحان الله لا يوجد شىء كامل

وبعدين دى مش سمكة البتية اللى تأكل الكابل ده

ده قرش السبتية

تحياتى

محمد said...

يبدو أن نظرية المؤامرة لها أتباع كثير , بالأمس وفي حوار مع أحد أصدقائي تساءلت .. ما حدث يعتريه الغموض , فهل هناك أحد وراءه ؟؟

وكانت الإجابة لا أظن .. ولكني أظن

بالنسبة للفار أو السمكة , فالمصريين لا زالوا يعيشون في العصر الحجري يربطوا كل ظاهرة أو حادثة لا يستطيعون تفسيرها بالأساطير ,,

ولكن أكيد أكيد .. إحنا ظالمينهم

... said...

شر البلية ما يجعلني أقهقه
لو تعرفي مأساتي هتضحكي معايا
أنا أصلي حاسة اني فعلا في كوكب تاني

Layla said...

اكتر حاجة عجباني في موضوع الانترنت ده هو اننا هناخد شهر مجاني كتعويض

:)))

Anonymous said...

أضحكتيني يا بيلا
:))))))

أتفق مع ابن حـجـر الـعـسـقـلانـى في كلامه الذي لم أقدر أن أنبس به
.....
نظرية المؤامرة يمكن الإستئناس بها بعض الوقت لكن لا إنصحك بإتخادها بوصلة لقراءة كل الأحداث

أنا خارج مصر ولو بإستطاعتي مساعدتك في تنزيل أو قراءة أي شئ يتعذر عليك الوصول إليه من داخل مصر أنا تحت أمرك.. فقط إيميل صغير
:)

ربنا يبعد عنكم فئران و أسماك و حتى طيور السبتية ههههههه

تقبلي مروري

يا مراكبي said...

أنا مثلا لأن الإيميل الشخصي بتاعي مكانه في مصر .. فطبعا كنت مقطوع عن الدنيا بينما كل المواقع الإلكترونية التانية اللي مكانها في دول تانية كانت شغالة

الحقيقة اللي لفت نظري هو إن السبب مش معروف لحد دلوقت رغم إنهم صلحوه .. طيب صلحوا إيه بالظبط؟ يعني إيه اللي كان بايظ وصلحوه؟

والأهم بقى .. إزاي ما فيش خساير؟ هو إحنا في سنة كام دلوقت؟ نكزنش في العصور الوسطى زأنا مش واخد بالي؟

عندما ترهقنى الحياة said...

الطف عنوان قريته بخصوص الموضوع ده
كنت اتمنى اقرا البوست الخاصة بمعرض الكتاب قبل ما اروح ازوره..للاسف مقرتهاش
بوست حلوة اوي
تحياتى

Bella said...

عدى النهار

مرحبا بك

اخيرا تمكنت من دخول مدونة مختار
والحقيقة موضوعه مش بس حلو
ده يجنن

ههههههههههه

مصيبة صراحة

وكمان عامل له متابعة
انا اضفت لينكات لموضوعه والمتابعة في الموضوع هنا

تحياتي

Bella said...

الطائر الحزين

مرحبا بك

الحقيقة بعد الكارثة التي ادت لشلل كامل في حياة كل من كان مرتبطا بالنت سواء في مجال عمله
او بسبب ادمان دخول النت زي حالاتنا يعني مفروض نشوف طرق بديلة

صراحة قلبي مش مطمئن
واي انقطاع للنت بيزيد قلقي ويفكرني باي مرة انقطع فيها وعزلني عن العالم

المرة دي طبعا مختلفة لان فيها احتمالات غير عادية وواضح ان فيه ايدي خفية ورا الموضوع ولو انها مش خفية قوي خصوصا بعد قطع كابل دبي
وخصوصا كمان ان جارتنا العتيدة اسرائيل لم يحدث عندها هذا الانقطاع

صحيح التقدم التكنولوجي له مزاياه وله عيوبه
لكن بالنسبة لناس مستهلكين للتكنولوجيا زينا مفروض يحفزنا لانتاجها حتى نتلافي اغلب العيوب التي تفاجأنا

ربنا يستر

وهي فعلا مش سمكة
انا بس قلت ندلعها شوية

هي حتى مش قرش

دي اكيد اكبر من قرش بكتير خاصة في ظل هذا الغلاء الطاحن

ههههههههههههه

ممكن نقول مائة دولار

هههههههههههههه

Bella said...

وضاح

مرحبا بك

والله من ناحية نظرية المؤامرة فصراحة المقدمات تنبئ بالتوالي

وقلبي كان واكلني من ناحية الحكومة والمصرية للاتصالات خصوصا ان تاريخهم معانا اسود ومخطط بهباب

بس العالم طلعوا ابرياء لاول مرة وإن كان اسلوب معالجتهم للموضوع عليه مجموعة كبيرة من علامات الاستفهام خصوصا التأكيدات المريرة بأن السوق عندنا لم يتاثر مش عارفة ازاي يعني واشمعنى احنا اللى السوق عندنا محصن ولابس حجاب او معمول له عمل مدفون في بطن سمكة قطمت عشر كابلات قبل كده

عموما لقيت في مدونة مختار العزيزي لينك وضعته صديقتنا العزيزة لست ادري يوضح وجود مؤامرة بالفعل وهو امر ازعجني جدا خاصة وان الامر له علاقة بمحاولات امريكا المستمرة والمستميتة للتحرش بايران وربنا يستر ولا تحدث كارثة قريبا

هذا هو اللينك

http://news.filbalad.com/News.asp?NewsID=23413

واتمنى من الله ان يكون كل كلامنا مجرد كلام طق حنك ولايخرج عن ذلك

ربنا يستر

تحياتي

Bella said...

بثينة

مرحبا بك

عرفت التفاصيل من التدوينة الاخيرة

بس والله انقطاع النت الايام الماضية أكد لي بما لايدع مجال للشك اني مدمنة نت ولاارغب في الاقلاع عن ادماني هذا

صحيح هناك فترات ابتعد فيها وقد اغيب عن النت فترة
ولكن بمزاجي

وليس بهذه الطريقة السمجة والجماعية
يعني لو النت مقطوع عندي لوحدي ممكن اروح اي مكان فيه
لكن ينقطع عننا كلنا ونحس ان كل واحد فينا في جزيرة لوحده ده امر مخيف

ربنا يستر من الايام الجاية
ولو ان النت لم يستقر وساعات يصبح بطئ بشكل ممل

ولكن اهو احسن من مافيش حنى نجد حل آخر

تحياتي

Bella said...

Marvel

مرحبا بك

والله زي مابتقول كده دي الحاجة الوحيدة الحلوة في الموضوع

لكن افلحوا ان صدقوا
ربنا يسهل ومايرجعوش في كلامهم او ماتحصلش عملية مغالطات
التصريحات الحكومية دي انا لااثق فيها

تحياتي

Bella said...

سندباد

مرحبا بك

وأدام الله عليك وعلينا الصحك

والله ياعزيزي انا متفقة مع كلام ابن حجر ومن فترة كنت بافكر اكتب موضوع عن الحكاية دي

يبدو ان الوقت قد حان لكتابة الموضوع فعلا

اما بالنسبة لنظرية المؤامرة الحقيقة باحاول الا اجعلها تفترسني
ولكن غصب عني تأتي الرياح بما لاتشتهي نظرية المؤامرة نفسها وبالاقي كل الاصابع تشير لنفس المواضع

اعمل ايه بقى مش عارفة ابطل شغل كولمبو ده

هههههههههه

وربنا يبعد عننا جميعا شر اي فار او قط سمين او اي حاجة ممكن يتحججوا بيها في هذا الزمن العجيب

هههههه

واشكرك على عرضك الكريم

النت تحسن ولو انه تحسن غير دائم ولكن افضل من الاول بكثير

تحياتي

Bella said...

يامراكبي

مرحبا بك

انا بقى انقطعت عني كل المنافذ البرية والبحرية

ههههههههههههه

بس كانت ايام عصيبة صراحة

اما حكاية مافيش خساير فده طبعا لاننا بلد الامن والامن وحضارة سبع الاف سنة يعني مش اي كلام

انت متصور الخساير تقدر تهوب مننا
مانبقاش المصريين اهمه بتوع التعمير والتطوير والريادة وكله موثق بالاغاني وحياتك
يعني مش اي كلام

بس حكاية ان السبب مش معروف دي بالنسبة لنا احنا بس

لما قريت على موقع جرية المصريون ان فيه جهات عليا بتحقق شكيت انهم عارفين ان الحكاية بفعل فاعل

ولما قريت الموضوع الموجود في موقع ابن البلد عن بروفة ضرب ايران مش عارفة ليه حسيت انهم هنا عارفين الحكاية دي ومكتمين على الخبر في اطار التعاون لضرب الارهاب في منابعه ومغاطسة والكلام العميق اللى بنسمعه كل ماامريكا تفكر تهبب اي هباب ومصر تساعدها في خططها الدنيئة في المنطقة حتى اصبح اي متحدث من عندنا بيتحدث بلسانهم ولاتعرف انه من عندنا الا من كتابة اسمه على الشاشة
لكن نفس الكلام ونفس المفردات لما الواحد قرف من خلقتهم صراحة

ربنا يستر من الجاي

تحياتي

Bella said...

عندما ترهقنى الحياة

مرحبا بك

وشكرا على ذوقك ياعزيزتي

الحقيقة هناك بعض الاخبار او الاحداث تفجر ينابيع الضحك حيث لامحل للضحك
فقلت نضحك شوية

ههههههههههه

ويارب تكوني استمتعتي بزيارتك لمعرض الكتاب

واتمنى دوام الزيارة

تحياتي

ملك الكبدة said...

مالك و مال اسكندرية يا بيللا

و بعدين للعلم مافيش قروش عندنا في بحر اسكندرية

لانهم عارفين ان الاسكندرانية حيتان

عموما اسكندرية هي اكتر دولة اتاثرت بالكارثة

على فكرة ابو الليل رجع انهاردة تاني

ابقي طلي و ماتقطعيش الجوابات

Bella said...

ملك الكبدة

مرحبا بك

ياعم حد يقدر يقول حاجة على اسكندرية
انت ح تلبسني الغلط ليه بس
ثم مش انا اللى قلت ان الكابلات البحرية عضتها سمكة قرش

ههههههههههههه

وبعدين ياعم عارفين ان عندكم حيتان

بس هل ياترى الحيتان دول كان لهم يد
قصدي زعنفة في عملية قطع الكابلات

هههههههه

وح اروح اشوف ابو الليل كاتب ايه

ومدونتك متابعة الموضوعات الجديدة اللى فيها هو بس بالي طويل حبتين في التعليق

تحياتي

EGYPT EYES said...
This comment has been removed by the author.
EGYPT EYES said...

أننا نسمع عن التخريب فدا الطبيعي بما أننا بنعيش في مصر فهو دا الطبيعي على اي حال كانت فرصه الواحد يبعد عن شاشة الكمبيوتر
تحياتي بيلا

غمض عينيك said...

بيلا العزيزة
ازيك؟ معلش انا دايما متأخر ومقصر في الزيارة
بس حلو اوي موضوع الفار ده...دا مجنني في البيت دايما يقرض اسلاك الكهرباء ومواسير الميه مش عارف اعمل معاه ايه

طبعا انا مش هعلق على السبب وراء انقطاع الكابل الغريب....انا الصراحة مش لاقي تفسير خالص وخصوصا مع انقطاع الكابلات الخاصة بالخليج وقطر في نفس الفترة الزمنية مش عارف السبب ايه
لكن بالنسبة لموضوع اصلاح الكابل والتغطية الاعلامية للبورصة فعايز اقولك ان اعلامنا فعلا فعلا تعبان جدا...مجرد ما قالوا الكابل اتقطع وهيتصلح ف خلال 48 ساعة قلت ان دا اي كلام...اي هسس والسلام
طبعا تحديد مكان القطع وتجهيز السفينة والرويوتس اللس هتقوم بالاصلاح والكلام دا كله بياخد وقت وكويس اوي انها اتصلحت في الفترة القصيرة دي


اما بالنسبة للكابل الجديد فدي بصراحة خطوة ممتازة جدا هتوفر باند ويدث كبير اوي يتيح توقير خدمات اكتر وبسرعة كبيرة وفي نفس الوقت بتكلفة اقل ...المفروض الاشتراكات وقتها ترخص وترخص كتير كمان لأن الوضع الحالي بيقول ان الكابل الموجود حاليا بين مصر وفرنسا غير مملوك لينا بالكامل...احنا لينا فيه نسبة اشغال بيدفع عليها فلوس انما الكابل الجديد هيكون الباند كله بالكامل بتاعنا والمفروض الخدمة ترخص


تحياتي واحترامي

محمد سمير