Thursday, March 13, 2008

حمار لكل مواطن


هذا الكائن الودود اللطيف قد يصبح ضيفاً على مائدتك العامرة

عفواً لااقصد بالطبع انه سيكون معزوم على الأكل ولكن اقصد أنه قد يكون هو الاكل

والحقيقة لاعتبارات انسانية أخوية بحتة لم أشأ ان اضع صورة حمار حقيقي او كلب حقيقي حتى لاأثير شجونكم

في العاشرة مساء اليوم استضافت منى الشاذلي صحفية لطيفة وجريئة قامت بعمل كشف صحفي عن مجازر لذبح الحمير والكلاب والحيوانات النافقة والمريضة التي تُباع لمنكوبي هذا البلد ودون أن يطرف جفن لأي مسؤول

والحقيقة ايضاً أن هذا الكشف ليس الاول من نوعه بل سبقه عدة كشوف ولا الكشوف الأثرية التي تظهر بين لحظة وأخرى وتشتعل الضجة ويُصاب المواطنون بالقرف وتطلع علينا تصريحات تنبه لفرق الطعم بين هذا اللحم وذاك وكأن الناس متاح لها ترف الانتقاء بين جزار معروف وجزار آخر مغمور.

طبعا الحكاية باختصار ان الصحفية ( للاسف لااتذكر اسمها) تنكرت في زي امرأة صعيدية فقيرة تريد العمل لتعول اولادها بعد ان تركها زوجها وهرب واشفقت عليها السيدة زوجة الجزار اياه وسمحت لها ببيع الحوايج اي محتويات بطن الذبائح كالفشة والكرشة والكبدة وماشابه وبعد ان حققت مبلغ كبير في اول يوم فرحت به صاحبة العمل وأعطتها عشرين جنيه في اليوم بخلاف مائة جنية في نهاية الاسبوع !!!

وقالت الصحفية أن ماكانت تتقاضاه لايُقارن بما يتقاضاه الجزارون الذين يتسلم الواحد فيهم يومياً خمسين جنية بخلاف مئتي جنية في نهاية الاسبوع !!!

واستمرت صديقتنا في البيع وبدأت تتكشف لها اسرار المهنة من خلال زميلاتها في البيع وأكتملت الحكاية بوقوع احد الاشخاص العاملين في هذا المجال في حبها وبدأ يتودد لها وبالتالي يبوح لها بالكثير من الاسرار وعرفت منه وبالاسم تخصص كل جزار في ذبح كذا وبيع كيت

ورأت بأم عينيها الكلاب وهي تُسلخ والحمير وهي تُذبح وقامت بتصوير كل ذلك.

استغرقت هذه المغامرة عشرة ايام بالتمام والكمال حصلت فيها على معلومات كثيرة جداً

منها مثلا أن هناك محلات بيع حواوشي تشتري منهم لحوم مفرومة

وأن هناك سوق في العتبة تُباع فيه اللحوم المفرومة بستة جنيهات للكيلو وطبعا تجد من يشتري !!!!

لم يلفت هذا السعر الغريب نظر المشترين ولا نظر المراقبين لهذه الأمور

وللأمانة استضافت منى الشاذلي طبيب بيطري من الرقابة البيطرية التي تفتش على المجازر وقال ان عددهم فقط سبعة آلاف بيطري على مستوى الجمهورية مطلوب منهم ان يقوموا بالتفتيش على المجازر وفحص اللحوم وختمها وكل ذلك بهذا العدد الضئيل !!!!

حتى انتهاء الفقرة لم اعرف اذا كانت هناك جهات رسمية قد تحركت وقامت بالقبض على الجناة أم ان تحقيق هذه الصحفية لم يخرج عن كونه مجرد حبر على ورق !!!

الحقيقة لاأجد مااقوله

صحيح ان الشعب مقاطع اللحوم لاعتبارات اقتصادية شديدة الحساسية بعد ان تخطى سعر كيلو اللحم حاجز الاربعين جنيهاً وطبعاً الفراخ والاسماك اصبح الحديث عنها ترف يستدعي الاستغفار لأنها اصبحت سلع استفزازية !!!

وبعد ان ارتفع سعر زجاجة الزيت عبوة كيلو ل 12 جنية والعدس 9 ولااعرف سعره الجديد فالحديث عن اسعار السلع والغلاء يستحق عمل موضوع منفصل !!!

ويبدو ان الحكومة قررت التخفيف عن كاهل المواطنين بتوفير اللحوم حتى لو كانت لحوم كلاب وحمير واهو على الاقل يبقى اسمهم بيدوقوها بدل الايام ماتمر والناس ماتعرفش طعم اللحمة ايه الا في المناسبات التي يكثر فيها المحسنين وأهل البر كعيد الأضحى وقررت الحكومة رفع شعار حمار لكل مواطن لتضمن وصول اللحم لمستحقيه.


23 comments:

وضـّاح said...

لم يصلني حماري !!

عصفور المدينة said...

عندي مشكلة في ذاكرة الأماكن بشكل شديد فهل تعتقدين أن مثل هذهالوجبة يمكن أن تعالج هذا المرض علما أن المذكور يتميز بذاكرة أماكن أحسده عليها؟

Bella said...

وضاح

مرحبا بك

تلاقيك غيرت عنوانك بغرض تضليله

نعمل ايه بقى فيكم يامواطنين

ههههههههههههههه

Bella said...

عصفور المدينة

مرحبا بك

الحقيقة ان الاطباء اسهبوا في وصف مزايا لحمه لدرجة تجعل المواطن يتوق لتذوقها وخاصة انه يعالج العديد من الامراض خاصة مشاكل ذاكرة الاماكن

فابشر خيراً

هههههههههههه

عدى النهار said...

شاهدت الفقرة فى العاشرة مساءً وكانت حاجة بشعة فعلاً عند عرض الصور

الحكومة رفعت إيدها من زمان عن كل شىء وسابت الناس تخبط فى بعضها فى الأكل والشرب والطُرق والمواصلات والتعليم و الصحة... مع إن كلمة حكومة معناها عكس ذلك تماماً. بس دى سياسة "حاعمل لكوا إييييه!" طب ماتبعش البلد والا هى دى بس اللي قادر تعملها؟

فى نفس البرنامج كان فى فقرة عن تصدير الغاز لإسرائيل (ربنا يجعله نار تولع فيها) ومافيش مسؤل واحد فقط وافق إنه يعلق على أى كلام مرتبط بالموضوع

المُسماة حكومة كل دورها هو التخلص من أكبر عدد ممكن من الناس

وجهة نظري said...

ما ياما كلنا حمير وكلاب ونسور ، ومواد مشعة ومواد مسرطنة، اية يا عم عاملها كأنها حادثة والناس لازم تاخد بالها، عادي خالص. أنا مش فاهم يا أخي الشعب دا غريب، بيوفرولهم أصناف جديدة كل يوم وهما برضة بيشتكوا، مش عارف الحكومة حتعملنا اية أكتر من كدة

e7na said...

شيرين عبد الوهاب بصدد تغيير كلمات اغنيتها لتصبح

مأكلتش من حميرها

الطائر الحزين said...

الاول حمار بحاله لكل مواطن يا سعدنا يا هنانا

طيب قولى فخذة ولا رجل حمار بحاله لا لا ايه الترف ده


فى بداية مقالك قلت منى الحسينى فى العاشرة مساءا

وفى نهايته قلتى منى الشاذلى


ولا انا مجرد ذكر اكل الحمير و الكلاب قصر على نظرى

معلهش بقول لمهندس عصفور


كان زماااااااان بعد اذنك طبعا


تحياتى

Sha2loob said...

حاء حاء حاء
آسف معلش أصلي لسه واكل صنية بعليصة تستاهل بؤك
كنا زمان نسمع ان فيه حاتي عمل كده واتقبض عليه, لكن مجازر جديده دي
ويا ترى الختم اللي عليها بيقى جمجمة وتحتيها عضمتين ولا ايه

سمراء said...

بيلا
فعلا انها احد الحلول الابتكارية لحل المشكلة الاقتصادية
ولكني اريد ان اخبرك بأني منذ 12 عام امر بأحد المطاعم للحمة الراس مرسوم علية حمار
الغريب أن العمال يأكلون بشهية بل وينتظرون في الخارج حتي يجدون اماكن ليتناولون راس الحمار او لسانه او عينية ..............الخ
المشكلة مش مشكلة الحكومة دي مشكلة الشعب الخانع او حسب ما بيسمي نفسه علشان ميكرهاش الشعب البسيط الراضي
السمراء

أبو مروان said...

حمار لكل مواطن

سؤال التوزيع هيكون ببطاقة التموين اللي لسة مش عايزين يطلعوها ولا هيكون علي بطاقة الشخصية التى تثبت أني مواطني ولا عن اي طريقة انا محتاج الحمار أوي بس مش هكلوه اشتغل بيه

Bella said...

عدى النهار

مرحبا بك

منذ فترة وبعد ان كثرت الحوادث قلت لامي ان مهمتهم الرئيسية التخلص من اكبر عدد من المواطنين استغربت جدا الراي ده واتهمتني بالمبالغة وقالت لي

طيب لو خلصوا مننا ح يحكموا مين؟

كأنهم جايين يحكموا

هم جايين يعكموا ويمشوا

يعني يتلايموا على الفلوس ويبيعوا اكبر كمية ممكنة من املاك الدولة اللى هي ملكنا جميعا ويسيبوا لنا البلد خرابة ومحتلة من كل جنسيات العالم واحنا نبقى عليها ضيوف واللى مش عاجبه يدور له على بلد تانية

اي حاجة محتاجة لرد مسؤول حكومي ماحدش بيطلع منهم يرد خالص وكأن الرد علينا مش وارد في سياستهم لانهم اتعودوا يستهتروا بالناس وماحدش بيحاسبهم

ربنا ينتقم منهم كلهم

تحياتي

Bella said...

وجهة نظري

مرحبا بك

هو فعلا شعب غريب
مابيحوقش فيه اي حاجة

يعني بعد كل المصايب اللى بلعها دي ولسه عايش

ههههههههههههههه

تحياتي

Bella said...

e7na

مرحبا بك

حلوة

والاغنية ح تبقى الخلفية الموسيقية بتاعتها نهيق متواصل يليه نهيق متقطع

والبركة في التوزيع الحميري بقى وممكن في الخلفية نمشي كلبين تلاتة من اللى وزنهم معتبر علشان يعملوا حركة في الاغنية شوية

هههههههههههههههههههه

Bella said...

الطائر الحزين

مرحبا بك

مااخدتش بالي من حكاية الحسيني والشاذلي دي

اصلي كتبت الموضوع في وقت متأخر وكنت مفروسة من اللى حصل

الحلقة كلها كانت حرق دم صراحة

بس يعني انتم شعب غريب قوي

الحكومة تقرر حمار لكل مواطن وانتم مستكترين على نفسكم النعمة دي كلها وعايزين تاخدوا أقل

ياساتر عليكوا

خدوا الحمار الاول واللى شايفه انه كتير ممكن يبيع منه براحته

بس خدوه الاول

هههههههههههههه

Bella said...

Sha2loob

مرحبا بك

تطلع ايه البعليصة دي؟؟

انت بتاكل عند حاتي تاني غير باقي الشعب؟؟

زمان كان بيبقى كبابجي ويتقبض عليه

دلوقتي بقى لان الامور سابت وماحدش عارف يلم حد ولا حتى عايز يلم حد العملية كبرت واصبح فيه مجازر متخصصة

طبعا لازم

مش احنا بلد الريادة

والختم ح يبقى حدوة

اما الكلاب الختم على لحمتهم عضمة

ههههههههههههه

Bella said...

سمراء

مرحبا بك

المشكلة فعلا مش مشكلة الحكومة

المشكلة مشكلة الشعب

وانا اصلا مش بتعجبني حكاية الشعب الراضي دي ولا بتنزل لي من زور

لان الرضا لما يوصل للمستوى ده وماحدش يفكر يمتنع عن الرضا او يستبدله بتذمر حتى او عدم رضا يبقى فعلا نستاهل اكتر من كده

بس ياترى ايه اللى اكتر من الكلاب والحمير؟

تحياتي

Bella said...

أبو مروان

مرحبا بك

التوزيع طبعا على بطاقة التموين لتوصيل الحمار لمستحقيه

يعني عايز الحكومة تفرق الحمير كده على كل المواطنين وخلاص

ثم الحمير للأكل فقط

والمواطن اللى ح يستخدم الحمار في غرض تاني غير الاكل ح يتسحب منه فورا ويتعمل له غرامة اشغال طريق

كمان بتتشرطوا على الحكومة

ههههههههههههه

A.SAMIR said...

لو الكباب اللذيذ اللي احنا بناكله دة طلع كباب حميري
يبقى ما الذ واطعم الحمير
تحياتي

Bella said...

A.SAMIR

مرحبا بك

هو طبعا الحمار كائن لذيذ ماحدش يقدر ينكر

كفاية وداعته وطيبة قلبه واحتماله لرزالتنا معاه

هههههههههههههههه

امراه الاحلام المنسيه said...

والله كتر خير الحكومة...هيا حتعمل اية ولا ايه...حقيقي الحمار له اكثر من ميزة لكن أكيد أخر ميزة ممكن نستفيد منه فيها اننا نأكلة...ولو إن بيقولوا ... حمارتك العارجة ولا سؤال الئيم

wisper said...

ده أقل واجب على الحكومة انها متمنعش الماعونات

اهو عالاقل تبقى اسمها عملت خير في شعبها المسكين

عقبال ما يسووا الظلت ويقولوا عليه فول مدمس

Ahmed Ashraf said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات