Tuesday, August 11, 2009

حقيقة ما ستفعله بنا شركات الانترنت



ذهبت اليوم لشركة تي اي داتا المشتركة بها لمعرفة راسي من رجلي بعد تطبيق سياسة الاستهبال"الاستغفال"العاجل المسماه بالاستخدام العادل وحدثت مشادة كلامية بيني وبين من رد على وتدخل في الحوار زملاؤه باعتباري من المعتدين على حقهم في تقديم خدمة عملاء زي الزفت وقلة ذوق في الردود غير مسبوقة ودار بيننا الحوار التالي

أنا : ممكن اعرف وضع اشتراكي ايه بعد تطبيق سياسة الاستخدام العادل التي تم تطبيقها دون اعلامنا

الموظف ( يرد ببرود ): الخبر معلن بقائمة الاسعار على موقعنا يافندم

أنا : افرض حضرتك مشترك مش فاضي يدخل على موقعكم يعرف ازاي

الموظف: تبقى غلطته


لم اتمالك نفسي من الغيظ فانفجرت فيه

وحضرتك متصور ان كل المشتركين مقطوعين لموقعكم وليس وراءهم اي شغل الا معرفة اخبار مزاجكم ايه النهاردة وناويين لنا على ايه !!!!
زي مابتبعتوا لنا بالموبايل تفكرونا بالفاتورة ابعتوا عرفونا بالخبر ده ونوهوا عنه وقولوا تابعوا الخبر على الموقع


رد على الولد بسخافة غير عادية ومسكت نفسي بالعافية من اني اصفعه

والله يافندم القرار قرار الوزير وح يطبق واللى مش عاجبه يلغي الخدمة


بصيت له وعفاريت الدنيا بتتنطط في وشي وانفجرت فيه ولولا زملاءه تدخلوا ووقفوا مكانه وخفوه من قدامي مااعرفش كان ممكن اعمل فيه ايه


بس رديت عليه ووجهت لهم الكلام كلهم وقلت له قبل ماتقولي اللى مش عاجبه
يلغي الاشتراك خليك فاكر كويس جدا ان اشتراكي واشتراك غيري هو اللى بتقبض منه مرتبك انت ومديرك ومدير مديرك لغاية البيه الوزير اللى بتقول ان هو اللى قرر وبتطلب مني اروح اكلمه وابلغه اعتراضي

انا مااعرفش السيد الوزير ولا اشتركت عنده انا اعرفكم انتم وبادفع لكم كل
شهر اشتراك ينطح اشتراك ولما الخدمة ماتعجبنيش او يحصل فيها اي مخالفات من جانبكم اجي اشتكي هنا واللى مش عاجبه فيكم يتفضل يسيب مكانه اللى بيوفره له اشتراكي واشتراك غيري

تدخل شخص اخر محاولا التهدئة ومؤكدا على انهم ليس لهم اي ذنب والقرار قرار الوزير وسيطبق على الجميع دون استثناء من اول هذا الشهر


فاحتديت عليه عندما اخرج لي صورة من عقد وقال انه بناء على العقد الموقع
من جانبكم فقلت له اني لم اوقع هذا العقد لاني اصلا مشتركة على سرعة 256 غير محدود
فصحح لي معلوماتي وقال ان هذه السرعة تم الغاءها وتحويل جميع المشتركين بها اتوماتيكيا لسرعة 512
!!!!

قلت له: وماذنبي انكم لغيتوها هذا خرق من جانبكم للعقد الموقع بيني وبينكم
لانكم لم تخطروني بالغاء الخدمة ولا بتحويلي لسرعة 512 التي جعلتموها هي والاعلى منها محدودة بعد ان كانت مفتوحة

قال: هذا قرار وزاري وطبقناه على الجميع ولا يمكن التراجع عنه مهما حدث


فقلت له: حسنا لن اجدد اشتراكي وكل من اعرفهم سيفعلون نفس الشيئ


فرد الاخ المستفز الذي حدثني اول مرة باني المشتركة الوحيدة التي حضرت
لديهم واعترضت على القرار وان باقي المشتركين سددوا اشتراكاتهم ولم يعترضوا بالعكس كانوا مبسوطين جدا

المهم بعد ان سخنت الامور واصبح من الصعب اسكاتي احضر لي احدهم ورقة مطبوعة كنموذج لشكوى وقال فيه حل ان حضرتك تملي النموذج ده

فقلت له ومامصير هذا النموذج ؟؟


فنظر لي ببلاهة وقال مش فاهم

قلت له يعني ح يروح فين ولمين يعني وح اعرف الرد عليه امتى وازاي

قال حضرتك بتملي النموذج وبكده تنتهي علاقتنا به ولا نعرف عنه اي شيئ


حسيت ان النهاردة يوم من اسخف ايام الاسبوع واني على وشك ارتكاب جريمة قتل


فقلت له واضح جدا انكم متوصيين تعاملوا المشتركين بقلة ذوق وكأننا شغالين عندكم مش العكس


لاتنسى ياهذا انك هنا لخدمتي والرد على استفساري انا واي مشترك


المهم وحتى لااطيل عليكم في حوار فعلا يرفع الضغط لو عرفتم بقيته تدخل
موظف آخر بعد ان انتهي من العميل الموجود امامه وتكلم بأدب وقال انا ح اريح حضرتك واعرفك كل التفاصيل اللى تحبي تعرفيها
فنظرت خلفي لاجد عدد غير قليل من المشتركين متابعين لما يحدث فعرفت سر التعاون المفاجئ الذي هبط فوق رؤوسهم


المهم اني سالته عن موعد تطبيق هذه الاتفاقية هل من اول الشهر القادم كما سمعنا ام من اول صدور القرار فطلب الاذن ليتأكد من مديره
واتصل بمديره وقال ان القرار سيطبق من تاريخ صدوره اي من يوم الاربعاء الماضي !!!

فسالته عن كيفية احتساب الاستهلاك الزائد بعد السعة المحددة فقال انه جاري
العمل على تجهيز يوزر نيم وباسوورد لكل مستخدم ليتمكن من متابعة حالة السعة الخاصة به ومااذا كان استفذها ام لا

فسالته وكيف يتم توزيع هذه الكمية


بمعنى آخر انا كمستخدم غير متخصص كيف اعرف اذا كانت هذه الكمية ستكفيني
للتصفح ام لا وكيف اتعامل مع المواقع المليئة بالصور وملفات الفيديو والفلاش وخلافه اذا حدث ودخلت لاسمح الله احدها

فنظر امامه في الشاشة وبدأ يصنف دخول الميل بكذا

تحميل افلام بكذا


فقلت له على مهلك شوية انا مخي مش ح يفتكر الهيصة دي وح انساها على مااروح البيت

ياريت تعرفني الكلام ده مكتوب فين على موقعكم لاني ناوية اقيم فيه من دلوقتي ورايح


فقال ان الكلام ده غير موجود على موقعنا للعملاء ولكنه مكتوب لنا فقط

فقلت له طيب ياريت بقى تكتب لي الهيصة دي علشان افهم


فكتب الآتي

الميل = 4
كيلو بايت

الصور الديجيتال = 1ميجا

الموسيقى= 4 ميجا


الفيلم = 700 ميجا


فيلم بنقاء عالي 4 جيجا


الكلام المكتوب اعلاه موجود عندي بخط الموظف وساصوره واضع صورة هنا في الموضوع


مما سبق يتضح لنا انه لايوجد كلام محدد للجميع بل يقولون كلام مختلف لكل مشترك

كما يتضح انهم بالفعل بدأوا في تطبيق هذه السياسة وبدأ النهب بدليل بطء النت في اوقات كثيرة جدا من النهار

مسألة تصنيف السعة بالطريقة المبينة عاليه تعني انهم بصدد مراقبة
المستخدمين وخرق خصوصياتهم وتصفح الميل معهم ومشاهدة كل صورة يحملونها وهكذا


بخلاف طبعا ان اليوزر نيم والباسوورد سيكون للمشترك عن طريقهم ولا يمكن تغييره من جانبنا ولا نعرف امكانية تلاعبهم المؤكد في عدادات المشتركين لاحتساب زيادة عليهم ومن ثم تحصيل مبالغ اضافية !!!


يعني باختصار الوزارة قررت سرقتنا واجلاسنا ايضا على خوابير ومن لم يرضى بخابور تي اي داتا فليجلس على خابور غيرها من الشركات المتواطئة مع الوزارة لشفط فلوسنا


تابعوا هذه التدوينة الهامة


ولمتابعة المزيد


الكاريكاتير بريشة المبدع أشرف حمدي


* * ****

أعتذر على صياغة الموضوع لانه مكتوب على عجل

نظرا لاهمية المعلومات التي عرفتها اليوم



37 comments:

Sarah said...

نظفوها وقاعدوا على نتها

طب المفروض نعمل ايه
يبقا الورقه والقلم بقا انا نزلت ايه وفاضلك كام ...
ولا نجيب التوتال ونقسمه على عدد ايام الاسبوع ونمسك استوب ووتش للداتا
و ديفيانت آرت لا ننزل من عليه ولا نطلع عليه حاجة
واللى زى حالاتى لازم انسى التورنت خالص بلا تعليم بلا بتاع

فعلا استهبال

karim said...

شكرا جدا على المعلومة المهمة فعلا الخدمة بقيت بطيئة بس ياترى هايعملو حد لللاستخدام فى الشهر ولا ايية, لو كدة يبقى هاشترى قودافون او اتصالات و بس

Bella said...

Hide and seek

اهلا وسهلا

هو فعلا مابقاش غير نمسك عدادات ونقعد بقى لاثانية تزيد ولا ثانية تقل

فكروني بالايام الهباب اللى كنا بندخل فيها دايا اب وشركات كانت بتنزل لنا عدادات نحسب منها عملنا بكام

الواحد لو بيتعامل مع مطعم كشري كان لقى معاملة لائقة

لكن دول لصوص وعندهم قدرات عالية جدا على التبجح والوقاحة

احنا نفصل الخدمة من عندهم ونشوف بدايل

وخليهم يعملوا عليه شوربة لسان عصفور بقى

تحياتي

Bella said...

اهلا كريم

هي الخدمة فعلا بقت بطيئة جدا دليل على انهم خفضوا السرعات

المشكلة بقى في حكاية حساب الزيادة دي

اكيد طبعا بعد تخفيض السرعات لو دخلت تنزل اي حاجة ح تاخد وقت اطول

مش عارفة صراحة ح يحسبوها ازاي

بس مع نفسهم بقى ح نكون خلعنا وسيبناهم يعدوا الاغنام براحتهم

ويبقوا يتبجحوا بقى ويقولوا قرار الوزير واجب النفاذ

تحياتي

Unknown said...

الحل الوحيد اللى انا شايفاه ان كلنا نسيب الاشتراكات من غير دفع لحد ما تنقطع
نكون فى الوقت ده طلبنا خط ارضى جديد
و نعمل عليه خدمة مع واحدة من بتوع الموبايلات
هم صحيح مش بيقولوا "غير محدود" بس على الاقل الحسبة عندهم واضحة و عارفينلها اول من آخر
او الناس اللى ماعندهاش غير جهاز واحد فى البيت ممكن يجيبولهم يو اس بى و خلاص

Bella said...

اهلا ايمان

وحياتك فكرت في حكاية شركة موبايل وقلت اشوف فودافون على الاقل عندهم عرض افضل

فوجئت ان فودافون هي كمان حطت قائمة اسعار زي الباقيين

فواضح انهم متفقين مع الوزارة علينا

بس يعني ماحدش يلوي دراعنا

مش معقول نفضل نتسرق على طول ونسكت

انت لو شوفتي الولد قليل الادب وهو بيقول لي ماالوزير رفع فواتير التليفون الارضي وماحدش فكر يقطع الخدمة ليه

اشمعنى النت

كنت على وشك اطبق في زمارة رقبته

العيب مش عليهم العيب علينا لاننا اديناهم الاحساس اننا بنطلع وننزل على مافيش

لو عدت المرة دي بدون تصرف حازم لانلوم الا انفسنا

تحياتي

Unknown said...

بصى مفيش فرق سعر يمكن
لكن فى فرق اولا وضوح من الاول فى التعامل
ثانيا ان بالفعل مايتسكش على الهطل ده
انا شخصيا ليسة قافلة مع الستنرال

الطلب بتروحى بالبطاقة و بس
بيكلف 55 جنيه
و بيقولولك بعدها تعملى ايه
انا هاخليكى معايا خطوة خطوة
بينى بينى انا صبرت كتير على لينك و اصلا على آخرى
فهم كده جابوا آخرهم معايا

اما عن طريقته فانا كنت باشتغلها الشغلانة دى و عارفة اللى بتقوليه
احنا بنتدرب يا بنتى ازاى نوصل العميل لكلمة ( هو كده و ان عاجب عيلتك كلها ) من غير مانقولها فعلا

Bella said...

اهلا ايمان

طيب ياريت تعرفينا بالتفاصيل

احنا كده كده لازم ندور على بدائل

المشكلة ان فودافون عرضهم اللى كانوا شغالين بيه اتغير واصبحوا زي الباقيين

يعني متحالفين علينا كلهم

بالنسبة بقى لتي اي داتا هو الولد اللى كلمني النهاردة ده كان سافل بمعنى الكلمة

بس وحياتك مسحت بيه البلاط ولولا زمايله اتدخله كنت بهدلته اكتر هو واللى معينينه وكمان كنت ح اتصل له بشرطة النجدة

Unknown said...

اللى يضحكك بقى ان لينك الى يومنا هذا ماحطوش اى تحديث على الموقع بخصوص الكلام ده
ههههههههههههههههههه

Unknown said...

ليسة قافلة مع لينك
اولا هايتطبق عليا من الشهر اللى جاى
ثانيا الحد الاقصى بتاعى هايكون 40 جيجا و اما اخلصهم هانزل لسرعة 128
بس ماحدش قال بقى السرعة دى هاتكون سرعة التصفح ولا سرعة التحميل و لا الاتنين
و ايه 128 دى؟
ده الموبايل هايبقى اسرع

Bella said...

اهلا ايمان

حتى لو حطوا

لغاية ماالقرار كان ابتدا يتنشر في كل حتة مواقع كتير ماكانتش حاطة
حتى مصراوي كان حاطين لينك مكتوب بخط صغير جدا ماحدش يشوفه

هههههههههههههه

هم متفقين مع بعض

Bella said...

هم تي اي داتا قالوا من الشهر ده

بس كلامهم متضارب

لكن حكاية سرعة 128 دي مقصودة علشان يادوب التصفح بالعافية ينفع لكمبيوتر واحد علشان الناس اللى عندها وصلات

ده طبعا اللى قاله لي واحد من الموظفين الفالحين بتوع تي دي داتا

Unknown said...

استهبال
انا ماعنديش وصلات بس عندنا اكتر من جهاز فى البيت
ولا مفروض كل لاب توب يبقى جنبه تليفون و فاكس و انسر ماشين؟
هههههههههه

Bella said...

ماانا قلت لهم كده برضه
قلت لهم ان البيت فيه كمبيوتر ولاب توب مارضيتش اقول لهم على كمبيوتر اخويا واللاب توب بتاعه

فرد على وقال لو في نفس البيت عادي يعني ماهو الراوتر فيه مكان لاربع وصلات

بس برة البيت لا

فقلت له وانت ح تعرف ازاي ان وصلة من الاربعة برة البيت

قال عندنا طرقنا وبنعرف

ههههههههههههه

Unknown said...

حسبنا الله ونعم الوكيل

Alexandrian far away said...

يا أستاذه عزه
ما تزعليش من العيال الرمم ألي بتشتغل في تي داتا
هما قدراتهم العقليه على قد كده ومش قصدهم يكونوا قلالات الأدب أو الذوق
هما أذكى بهامش ضئيل من الخرفان البلدي
فمتوقع سلوكهم العجيب ده

لكن أنا مشترك على لينك.نت
والحياه بمبي خالص وعادي ومافيش أي مشاكل أو هرتله من دي
الموضوع تقريبا خاص بتي داتا لأنها شركه ملك لهيئة الإتصالات
أنقلوا على لينك وخلوها تفلس

Lasto adri *Blue* said...

يا بيللا.. سؤال بس لجل النبى

فى حد معاكى ع الشبكة غيرك؟... وهل انتى أو اللى معاكى من الناس اللى بتعمل داون لوود ليل نهار؟

Unknown said...

الاخت الفاضلة،
طبعا ما تقولينه حقيقى وخطير
وهو مكتوب فعلا على موقع الشركة.
والسرعات الجديدة وقيم الاشتراكات والكمية المحددة للاستخدام لكل سرعة (غير المحدودة فى الاصل) موجود فى الصفحة التالية من البيانات شركة تى اى داتا
http://www.tedata.net/web/eg/ar/default.aspx?sec=3&pr=2

أما عن سبب تطبيق هذه السياسة وكيفية احتسابها كما يقولون، فمذكور فى توضيح سياسة الاستهابل الحاقد "الاستخدام العادل"
وهو موجود فى العنوان:
http://www.tedata.net/web/MultiMedia/PDF/FUP.pdf

ومنه يتضح انه لن يتم احتساب الدونلوود فقط بل الابلوود من الضمن أى أنه عند استعراضك لأية اميل وارد اليك سيتم خصم سعته من الكمية المخصصة لك ويا سلام لو مليان صور يبقى حظك تمام
واذا قمت بالرد على هذا الاميل من الريبلاى بدون حذف اصل الاميل
سيتم احتسابه مرة اخرى عليك حيث انه يتم خصم حجم المرسل منك كذلك من الكمية المخصصة لك.
يعننى من الاخر اوعى تعمل فوررورد لآية اميل يوصلك، وخد بالك وانت بتبعت اية اميل اوع تضع فيه اية صور او ملفات

وعلى فكرة السرعة عندى فعلا زادت من النهاردة، وده معناه انهم بدأوا التنفيذ

وشكرا

Unknown said...

ملاحظة جديدة نفس الكلام تقريبا مكتوب فى دى لينك
ونفس الارقام مع استثناء بعض المواقع التابعة لدى لينك من عملية القياس
انظر الرابط الخاص بسياسة الاستهبال
http://www.linkdsl.com/LinkDSL_Code/Pages/DslAvailabilty/fup.aspx?lang=ar-EG

وشكرا

انسانة واقعيه said...

يعنى وهوة اشمعنى النت اللى هينجا من العالم دة

جت علية مكلة بقى سرقة فسرقة

بس بجد لو بقى كدة انا هقطع اشتركى وهجيب مودم من اتصالات واشحن بكروت واكبر دماغى بلاا قرف

دول بجد عالم نصابين وسماسرة

عايزين يقفلوا ع الشعب اد ميقدوا علشان نفضل عايشين فى الجهل ويقطعونا

حسبى الله ونعم الوكيل

الفقيرة إلى الله أم البنات said...

هاوقف اشتراك معاهم..وهاسيب الناس المشتركه معاهم اذا اصروا يستمروا..وهاجيب اىموديم من أى شركه..وهاكون انا المتحكمه لانى هاشحن بكروت
وحتى لو مشتركتش..لازم يعرفوا ان فى حد هياخد موقف ومش هينزل على مفيش

عين فى الجنة said...

اهلا بيلا
التحميل الاقصى فى الشهر 45 جيجا !!! تخيلى حجم الدونلوود بعد تجاوز هذا الحد بالنسبة لمشتركى سرعة واحد ميجا بيخفضوا السرعة الى 128 كيلوبايت فى الثانية
وبحسبة صغيرة لو كان الفيلم ذو النقاء العالى بياخد 4 جيجا يبقى من حقنا نحمل كل شهر حوالى 11 فيلم ولو كنا جنشوف الافلام دى بمعدل فيلم كل يومين يبقى الشهر يكفى
وعلى فكرة السياسة دى مطبقة من فترة طويلة قبل صدور القرار لمحاربة الاشخاص اللى بيعملوا نتورك خاص بيهم فى كل عمارة على رواتر واحد
وعلى فكرة موش ضرورى ينتهكوا خصوصية العملاء علشان يعرفوا مقدار
استهلاكهم
بس انتى عسل والله وشجاعة جدا

Wild at Heart said...

طب تصدقي أنا دمي اتحرق من القراية بس ربنا يكون في عونك، أنا كنت في الموال ده السنة اللي فاتت وبدون ذكر تفاصيل تعلي الضغط زيادة اشتركت في فودافون 1 ميجا وكانوا قايلين على موضوع السعة المحدودة ده من الأول خالص، ريحي دماغي وإخلعي منهم.

Anonymous said...

و الله دي مهزله
يعني دلوقت في بيوت كتيره فيها أكتر من جهاز
أو شركة صغيره زي شباب كتير فيها 3-4 أجهزة
يبقى كده نصيب الجهاز الواحد في 25/4
بجد ده مش معقول؟؟؟؟؟
يعني إللي إدوه باليمين ح يأخدوه بالشمال

amr_mt said...

الـ 25 جيجا دي أقل من الليميت اليومي في اليابان (30 جيجا) والدول اللي بتطبقها شهري هي 250 جيجا

http://en.wikipedia.org/wiki/Fair_Access_Policy#Download_quota

اما جيراننا الحلوين اللي حوالينا فليسوا أسعد حظا فمثلا ليبيا اخرك 7 جيجا و بعد كدة بتتحاسب بالنص جيجا
http://www.ltt.ly/p-adsl.php

إيران بفى قسمتها نصين ساعات ذروة محدودة وبالليل مفتوحة
http://www.shatel.ir/content/view/107/36/lang,en_US/
وعمان اخرهم 2 جيجا و بتتحاسب بالميجاية الواحدة
http://www.omantel.net.om/services/residential/internet/adsl_1m.asp

فالظاهر ان الحكومة صعب عليها ان يبقى عندنا حاجة عدلة وقالوا ما يصحش كدة لازم نراعي مشاعر اللى حوالينا برضه ونرجعلنا عشر سنين ضوئية عشان ما نخرجش من سياق التاريخ والجغرافيا اللى احنا فيه

Anonymous said...

فده ضحك على الدقون

Unknown said...

bella
العزيزة
والله زمان
من ساعة حمدي وكتابه وورف و مسلسله و مشفتكيش
الاقي سعادتك عاملة ثورة على السفينة بونتي و بتحرضي الناس على الحكومة
لا يا شيخة اخص عليك اخص
وبجد اخص اخص
من جهة انتهاك الخصوصية فاساسا مفيش خصوصية و بعدين على رأي راقية ابراهيم في فيلم زينب خالد الذكر
اللي مالوش اهل الحكومة اهله
يعني خصوصية ايه بقى مع الاهل؟؟
بخصوص الشاب المؤدب المطيع المحترم اللي سعادتك بهدلتيه فده يا ستي
هو معيط اللي ذكره الشيخ يوسف الشربيني رحمه الله في هز القحوف
يعني دي سلالة ومتسلسلة
من الشباب الصاعد الواعد المتوعد اللي يعمل خده مداس
للباشا و يضرب الاسافل بالجزمة
حظه بقى انك طلعتي باشا
وطلعتي عينه ياباشا
ومرة تانية انا كده فهمت كنتي بتوزيني على التخريب ليه
على فكرة انا فقست الملعوب من زمان من ساعة ما شفتك مبهدلة الاجل الكومال انور افندي شايل سيفه وعرفت انك مبتحبيش الحكومة
اخص عليك اخص
باي يا بيلا
لكن على اي حال نفسي اسألك سؤال
ضميرك مستريح؟؟؟
مش ممكن يا بيلا
مع الاعتذار للاغنية الغم اللي كنت اسمعها الصبح في ربات البيوت و انا مزوغ م الكلية و قاعد على القهوة

Shimaa Esmail said...

الأستاذة الفاضلة والأخت: بيلا شريف.
صاحبة مدونة: أفكار مبعثرة.
اعتذر عن الخروج من موضوع التدوينة، لقد أرسلت لك رسالة عبر البريد الإلكتروني المتاح من خلال ملف تعريفك تتعلق باستمارة استقصاء بيانات عن المدونات المصرية تشتمل على البيانات التي تساعدك على الإجابة عن الاستمارة.
أرجو الاهتمام والرد سريعا.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.

يا مراكبي said...

أنا شايف انه الاتجاه للحلول الأخرى هو الأفضل .. عن طريق الساتلايت أو عن طريق الموبايل كونيكتور .. الحل الأول طبقناه في مصانعنا اللي في الصحراء عن طريق شركة أوربت .. والحل التاني طبقناه في البيوت سواء في مصر أو السعودية

ممكن يكون غالي شوية في البداية .. لكن على المدى الطويل هيكون أرخص وأسرع وغير محدود وكمان عملي وممكن تاخديه معاكي في أي مكان

بجد لو الكل لجأ للحلول دي ساعتها الحكومة هتشحت وتتلم وترجع تدلل على الانترنت بتاعها زي ما بيحصل مع التليفون الأرضي كده

الحلول كتيرة وهما لسه نايمين في عصر ما قبل الكوز

Misrdream said...

دي قلة ادب وحقاره منهم
وقرار تحديد الانترنت ده صادر من الشركات وعلى راسهم
TEDATA
وموظفينها كلهم ميفهموش ومنتهي قلة الزوق فى كل الفروع لكن العيب علينا
احنا موش عليهم

Unknown said...

الآن عرفت لماذا الخدمة بطيئة منذ فترة ، لكن الحل الوحيد هو عمل إضراب جماعى عن الخدمة لمدة شهر

شكرا يا دكتور على معركتك التى عبرت عن كل مستخدمى النت

الحصان الأسود said...

اسمحيلي انا معترض على اعتراضكم و 25 ميجا كفاية جدا للمستخدم الواحد بل و يمكن ل 5 او 6 مستخدمين كمان

و ثواني حاجيبلك بوست من عندي لسة مخلصة حالا عندي اشرحلك و جهه نظري

___________________________________

انا من رأيي ان دلوقتي الشبكات المنزلية اللي كل واحد عامل من اشتراكه 30 وصلة لجيرانة و صحابة اللي حوالية و بياخد من كل واحد فيهم 30 جنية مثلا و بالتالي بيحصل مكسب 300% من اشتراك الDSL بتاعه بقت سرقة علني و دي خسارة كبيرة على مقدمي الخدمة و مش فايدة كبيرة للمستخدم لانة بيتحمل بطء و خنقة كثرة المستخدمين و المستفيد الوحيد هو اللي بيأجر شبكتة لجيرانة و يلم منهم 3 او 4 اضعاف اشتراكها
و 75% من اللي عندهم انترنت منزلي واخدين من الناس اللي بتوزع شبكاتهم الشخصية باشتراكات مخفضة

يعني دي خسارة على مقدمي الخدمة و مكسب كبير للي عاملين شبكات بتكسبهم اضعاف مضاعفة و في الاساس فية شرط في كل عقود الاشتراكات يمنع استخدام الاشتراك في شبكة منزلية لكذا مشترك بدون علم الشركات

يعني بصراحه كدة دي سرقة, و خسارة كبيرة جدا للشركات اللي سايبها خطوط الDSL بتاعتها تكية لكل واحد عاوز يعمل سبوبة, فطبيعي جدا الحل الأمثل في تحديد حجم استخدام يكفي المستخدم العادي و يقطع كل الشبكات دي
و 25 جيجا المتحددة دي كتير جدا جدايعني شوف تطلع مثلا تحميل كام فيلم 350 ميجا في المتوسط حيث ان فية افلام من اول 250ميجا و طالع تخيل انها تحمل 72 فيلم في الشهر

يعني لو الكمبيوتر مفتوح 24 ساعه بيعمل DownLoad افلام مش حايلحق يحمل ال 72 فيلم طيب نقول ان حضرتك حاتحمل كل يوم فيلم و دة طبعاً مستحيل ان يوزر بيحمل 365 فيلم في السنة و يتفرج عليهم الا لو ماوراهوش غير الافلام......المهم ان 30 فيلم في الشهر مش حاتاخد نصف ال 25 جيجا و الايميلات و الفلاشات و غيرها و غيرها عمرها ماتعمل اكتر من 2-3 جيجا في الشهر بالكتيرطيب يبقى الشبكات محددة مستوى عادل جدا للاستخدام للشخص او للكمبيوتر الواحدو لكنة حايكون ناهي لموضوع الشبكات المنزلية المتعددة المستخدمين

و الاحسن ان اللي بيدفع 40 جنية و يتحمل بطء و رزالة شبكة فيها 30 -40 مستخدم يدفع 95 جنية و يشترك لشبكة لنفسة محدش يشاركة فيها

مش كدة وللا ايــــــة........... على رأي المرحوم فؤاد المهندس
by: الحصان الأسود

الحصان الأسود said...

ياااااااااااة

صحيح نسيتيني انا كنت داخل اقولك كل سنة و انتي طيبة يا بيللا و عيد سعيد

هههههههههههههههه

L.G. said...

لي زميلة المفروض سرعتها 512 قالت لي أنها بطيئة جدا ولا تعرف السبب ؟

عرف السبب
لقد حذرت أصدقائي من تلك الشركة تحديدا لسوء تعامله مع المواطن خاصة على التليفون منتهى قلة الذوق
وكمان دفعوني فلوس زيادة دنلوود مع اني محدود السرعة 215 وعمري ما بتخطى الاتنين جيجا ابدا وقلتلهم لأن في ذلك الشهر تحديدا لم ادخل على النت من اساسه
ومع ذلك دفعت ومباشرة لغيت الاشتراك
وسالت عن الشكاوى على الموقع مفيش
العداد بتاع الدونلود بايظ
المهم حصل متابعة منهم من القاهرة لغلق الاشتراك قلت كل اللي نفسي فيه

الشركة زفت من الآخر
اه نسيت كانوا بيفصلوا النت من المغرب لنص الليل والعيب اكيد من عندك
ما علينا
المهم المفروض من يجد مشكلة معهم على الفور يلغي الاشتراك مش يصبر ويستحمل

Maha said...

ههههههههههههههه

لا إله إلا الله

شر البلية ما يضحك فعلا

خلاص مفيش حاجة تتقال أصلا

هبة النيـــــل said...

نصدقي استفزيت جداااا والله العظيم

ونفس الشركة دي متخانقة معاها فعلا

الأسبوع اللي فات

دا بينقوا الموظفين يظهر باين عليهم

hema said...

الشركة دى اساسا خدمة العملاء بتاعتها منش تمام والناس الفيها مش تمام
وشركة زبالة
والنت الموجود فى مصر عموما لا يقارن بالنت فى اى دول اخرى
فاتورة التليفون
egypt-panorama.com