Monday, February 18, 2008

عايزة شارع بإسمي


عنوان التدوينة صحيح

لاتنزعجوا

مازلت بكامل قواي العقلية

لكن بما أن التطرف الكروي وصل مداه وأصبح احراز هدف في مرمى الخصم دليل على الوطنية يستدعي أن يطالب اعضاء البرلمان المصري بتدريس الهدف لتعليم التلاميذ معنى الوطنية !!!

ولأني مواطنة صالحة في هذا البلد أفرح لافراح المنتخب كنت قد فكرت من فترة في كتابة تدوينة عن الروح الرياضية ولكني فكرت في تأجيلها حتى لاتكون بمثابة كرسي في كلوب المولد المنصوب حالياً في كل ميادين حياتنا المزدحمة بالمشاكل التي تستحق منا الاهتمام أكثر من كرة القدم مع احترامي لكل مشجعي اي شيئ مستدير حتى لو كان اباجورة بطيخية الشكل.

ماأخرجني عن شعوري الحقيقة وفرسني موضوعين

الاول في موقع مصراوي عنوانه مستفز جدا وسمج لاقصى درجة

لاصوت يعلو على صوت المنتخب

طبعا بعد ان توقفت كل معاركنا وحروبنا حتى حربنا اليومية في طابور العيش لاتهم طالما المنتخب بخير !!!

الثاني هو مجموعة على الفيس بوك اسمها

الحملة القومية لتغير شارع طرح البحر الى شارع (محمد زيدان).

طبعاً أمر يستحق حملة قومية ومؤتمر قومي كمان

وحيث بقى ان العملية هاصت وكل واحد في البلد دي بيعمل اللى على كيفه قررت ومن فوق منبري هذا أن أطالب بإطلاق إسمي على اي شارع في مصر
وبصفتي مواطنة تنضح وطنية لن اشترط ان يكون الشارع الذي اسكن به رحمة بالجيران
ولن أطالب بمنطقة معينة ولا شارع رئيسي

فقط ساترك بين أيديكم إخوتي وأخواتي هذا الأمر الجلل واثقة من حسن تدبيركم وقوة تأثيركم وقدراتكم على حشد الدعم المعنوي المنشود لعمل حملة قومية لمناصرة أختكم في هذا المطلب العادل

عايزة شارع باسمي


بس خلاص



28 comments:

عدى النهار said...

إيه الإفترى ده.. شارع مرة واحدة! طب قولي حارة ولا رصيف

شوفي يا ستى إنتى لازم تجيبى جون الأول علشان أعضاء إسمه إيه ده بتاع البتاع إللي إسمه شعب يقدروا يعنى من غير حرج يطرحوا إسمك فى المناقصة.. مين عارف يمكن تطلعى بميدان بحاله بس إنتى إلحقى وإعملي حاجة لأن الميادين عليها عين وقريت إنهارده إن ميدان روكسى إتحجز خلاص للريس وبيدوروا على شارع علشان حسن شحاتة

على العموم ولا يهمك ، لو قفِّلت إحنا ممكن ننشىء مدينة للبلوجرز ، تخيلية يعنى ، لتجاورز هذه الأزمة الخانقة وساعتها تختارى بنفسك الشارع اللي على مزاجك
:)

Bella said...

عدى النهار

نورت

اوعي تحبطني بقى وتفكرني ان انجازاتي الرياضية لاتتعدي المشي

وطبعا لان شوارع مصر تقرف بطلت رياضة المشي كمان

هههههههههههههههه

انا خلاص متأهبة نفسياً لتسمية الشارع باسمي وحتى عملت اشارة احطها قبله بمسافة علشان الناس تعرف

يعني كله محسوب بالمللي مش اي كلام وللى بالك بقى اغلب شوارع مصر اللهم الا الرئيسية مافيش قبلها لافتة ارشادية

انا بقى ناوية أدشن حملة للمطالبة بإطلاق اسمي على شارع في مصر ومحتاجة منكم بقى مساعدة في الحملة دي لانها ح تكون بتاعتنا كلنا

يعني لو نجحت انا وحصلت على شارع شوف انت بقى العز اللى الشعب ح يبقى فيه ودي ح تعتبر سابقة هي الاولى من نوعها وممكن تتكرر

يعني كل مواطن بقى وحسب تشجيعه

اللى ح يطلع بشارع
واللى بحارة
واللى برصيف

يعني حاجات كده من دي


عايزين الهمة ياجماعة
ونجاملكم في الحملات ان شاء الله

الطائر الحزين said...

كنت عاوز اكتب عن اسماء الشوارع مثل شارل ديجول
وما شابه

الى اسماء نألفها

وتذكرنا بامجاد حقيقة

فلو كان شارع شارل ديجول هو اللى هيتغير يبقى يا مرحبا


تحياتى

Che_wildwing said...

وبصفتي كنت من اكبر مشجعي المنتخب في حينا
وبصفتى مخلتش حد ينام يوم الماتش
وده طبعا دليل على الوطنية
يبقى لازم يعملولى شارع باسمي

عصفور المدينة said...

Straight Bella
:)

بحبك يا لبنان said...

ههههههه

أنا أؤيـّد بقوة

طيب اسمعي

انت عارفة انه فرنسا كانت محتلة لبنان ايام زمان

و بما انها الأم الحنون

عندنا شوارع كتيرة في بيروت متسميّة باسم الجنرالات اللي كانوا محتلين لبنان

و اعتقد ان في ناس عندنا الان لو كان الامر بإيدهم كانوا بيسمّوا شارع باسم شارون ..الشارح المؤدي الى مخيّم صبرا من ناحية طريق الجديدة

و عجبي

على رأي عمنا صلاح جاهين الله يرحمه

ـ أنا معك لو كنت عايزة تطلقي حملة
قومية على مستوى الوطن العربي

joe75.jeeran.com

بنت القمر said...

بيلا الطيبه

انا عاوزة اغير اسكندريه كلها واخليها
القمريه نسبه الي ذاتي الفخيمه وتكون الشوارع كلها قمر1 قمر 2
قمر 3
و مدارسها تكون دار القمر للتوليد دار القمر لامراض العيون
وكده
اماالمدارس فتكون قمر الابتدائيه المشتركه الابتدائيه
قمر الاعداديه للغات وكده
شفتي بقا مين برانويا انا ولا انتي

Bella said...

الطائر الحزين

مرحبا بك

والله مواضيع اسماء الشوارع دي عايزة لها موضوع لوحده

طيب ماتكتبه ونشوف ح نقول فيه ايه

المهم انت معانا في الحملة القومية دي ولا ناوي تسيبني اطالب لوحدي

انا عايزة دعم كبير قوي

شوف اللى تقدر تجمعهم من اصحابك وح اشوفك برضه لما اسمي يتحط على شارع ممكن نعمله بالنص ياعم

هههههههههه

عايزين نعمل المشروع مشروع استثماري ونطلع منه بمبلغ معتبر

ده ح يبقى مطلب القرن وبكرة افكرك

هههههههههههه

سيب شارع ديجول دلوقتي وخليك معايا تكسب

Bella said...

Che_wildwing

مرحبا بك

طيب مش نخلص الاول من الشارع بتاعي وبعدين نشوفك

ياجماعة مش كده ماتبوظوش الحملة الله يكرمكم

عايزين نمشي خطوة خطوة
لو عرفت اسلك بشارع اوعدك ح تبقى ورايا في الحملة اللى بعدها

ولما الحملات ح تكتر الحكاية ح تمشي اتوماتيك بعد كده ومش بعيد كل مولود جديد اسمه ح يتحط في شهادة الميلاد ومعاه اسم الشارع اللى ح يتولد معاه

ده احنا ح نشوف ايام

هههههههههههههه

Bella said...

عصفور المدينة

مرحبا بك

ايوة كده ياعم

انت اكيد معانا في الحملة

عايزين حشد تدويني بقى ونفسك معانا الحملة ح تمشي اخر تمام

واوعدك الشارع اللى ح يبقى باسمي ح نعمل فيه مشروعات معتبرة ونعلم الناس ترشيد استهلاك المياه

Bella said...

باحبك يالبنان

مرحبا بك

شوف يااخي العزيز يعجبني الناس اللى عندها تدفق في الافكار

احنا طبعا نفضل ان الشوارع تكون لاهل البلد
بدل الاسماء الاجنبية والحاجات اللى بتفكرنا بتواريخ الاحتلال والمصيايب دي

وكويس انك اتكلمت عن الحملة على مستوى العالم العربي علشان اتساع الحملة يعطيها زخم اكبر ويساعدنا نحقق انتصارات اوسع

وبالمرة يعمق المشاعر العروبية ويصحي المشاعر القومية اللى نامت من زمان

خلاص ياجو ح تبقى مدير الحملة القومية فرع لبنان

ايوة كده الافكار العابرة للحدود ح تظهر اهي

ههههههههههههه

Bella said...

بنت القمر

مرحبا بك

يعني يااختي عدي النهار بيقول على طلبي افترا

شوفي بقى ح يقول على طلباتك انت ايه

هههههههههههههههه

بعدين ياعزيزتي لما نخلص من موال الشارع نبقى نشوف الحاجات التانية
كده دخلتي في منطقة محظورة وشكلك كده ح تدخلينا في الممنوع

ههههههههههه

يعني مش حاسة انك بتنافسي ناس معينة في تسمية كل حاجة باسمهم

مش ناقص غير تقولي نسمي كوبري باسمك

ولا تطلبي يتسمى مشروع قومي باسمك

يالهوي

هههههههههههههههههههههههه

شوفي بتحبي تاكلي ايه مع العيس والحلاوة علشان نعمل حسابنا واحنا جايين نزورك

ههههههههههه

Alexandrian far away said...

الأخت والصديقة العزيزة بيللا
لن أعتذر عن تقصيري في الدخول لمدونتك، فهو تقصير في حق نفسي أولا وأخيرا
أن أحرم نفسي من قراءة كتاباتك

أنا أعترض على تسمية شارع بأسمك
أنتي مقامك ميدان بحاله
وأقترح دمج ميداني التحرير وعبد المنعم رياض وتسميته ميدان بيللا شريف
وبالمره أكيد نغير أسم كوبري أكتوبر ونسميه كوبري بيللا
أمال أيه
سيادتك مقامك كبير قوي عندنا

مؤتمر قومي لتسمية الشارع بأسم مين؟
يا ليله مش فايته
ولو في تصفيات كاس العالم خاب وجلاوضيع البطوله يبقى نولع في الشارع مثلا ولا نرجع نغير أسمه
أيه الخيبه ديه بس؟

خمسة فضفضة said...

السلام عليكمورحمة الله وبركاته

ايه الحكايه تاني حد انهارده الاقيه متكلم في نفس الموضوع

ماتقلقوش يا جماعه كل واحد ها ياخد شارع باسمه ، الشوارع كتير والحمد لله ، بس اهم حاجه تقفوا منظمين ، وكل واحد هايجيلوه الشارع بتاعه لحد عنده وفوقيه حارتين هديه

والناس الحلوين اللي هايسمعوا الكلام هايخدوا ميدان بحاله

:-)

حبه جد بقي
اعتقد يعني ان كل الكلام اللي عمال يتقال ده عن تغيير اسامي الشوارع مجرد طق حنك وكلام تحت تأثير الفرحه الصادمه ، وشويه كده وكل حاجه هاتهدي ولا اكن حاجه حصلت اصلا

مـحـمـد مـفـيـد said...

والله عندك حق
بجد الواحد زهق
وبس خلاص
بس ابقي بلغيني العنوان علشان ابقي اروح انا والاولاد
:))))

صوت من مصر said...

قريت بوست عند حد بيقول نفس الكلام بس فعلا هو احنا مبنهتمش غير بالرياضه بس
انا كمان والنبى يا اسطى عايز انزل ميدان عمرو زكى

Sherif said...

Bella

تخيلى .. كان لدى نفس الرغبة

ولكن ببعض التمحيص .. وجدت أن هناك اسماء كثيرة لشوارع لاندرى على وجه التحديد من هم اصحابها .. ليس شوارع فقط .. بل قرى وربما مدن صغيرة ..

يعنى هناك شوارع لكل من هب ..

وانت فى رأيى تستحقين أكثر من ذلك ..

مارأيك؟

fad-fadat nour said...

الحقيقة يا بيلا الموضوع فعلا يستاهل وقفة .. يعني ايه لحد دلوقتي مفيش شارع بأسمك؟ دي مهزلة فعلا

و لكن حيث اننا جميعا مواطنون مطحنون في بلدنا الحبيب يبقي نعمل نظام شارع لكل مواطن عشان تحقيق العدل الاجتماعي و ما حدش ينفسن لحد في شارعه

و زي ما فضفضة قالت نقف طابور و بالدور
.
و بمناسبة اسامي الشوارع عندنا في اسكندرية شارع صغير (في ستانلي) اسمه هياتم تمجيدا لأعمال السيدة العظيمة

Bella said...

Alexandrian far away

مرحبا اخي العزيز
والله لك وحشة
خصوصا انك مقل في تدويناتك الفترة الماضية

معلش انا عاذراك
اكيد طبعا مشغول جدا

بس ماتطولش الغيبة

بعدين يعني انت اثلجت صدري صراحة بحكاية الميدان والكوبري

على راي المثل ان سرقت اسرق جمل

يعني لو فيها حبس مايبقاش على شارع بس خليها ميدان وكوبري

ههههههههههههههه

بعدين لو المنتخب خرج من الكاس بقى مش ح ازعل لو غيرتوا الاسماء

ح نشوف لنا هليلة تانية غير الكاس دي

ثم احنا من دعاء التمثيل المشرف
يعني لو المنتخب رجع قفاه يقمر عيش هتيفة الموالد ح يلتمسوا له مليون عذر وح يقولوا احنا مش رايحين نفوز احنا رايحين لرفع اسم مصر وكفاية الاحتكاك بالفرق الاجنبية

واهو اي كلام والسلام

وقتها نبقى نتصرف

عايزين بقى نعين متحدث رسمي باسم المشروع القومي الكبير ده علشان يتحدث مع وسائل الاعلام المختلفة

هههههههههههههههه

Bella said...

خمسة فضفضة

مرحبا بك

الخوف بقى لما نوقف الطوابير حد يطلع لنا في الموضوع ويخرب علينا السبوبة دي ويقعد يلم رسوم من كل صاحب طلب بحجة فحص طلبه من حيث كونه مستحق لشارع مدعوم ولا شارع بدون دعم
يعني شارع ع المحارة ويشطبه هو

ونبص نلاقي العملية دخلت فيها جهات مستفيدة كتيرة والاحتكار يدخل في الموضوع

ههههههههههههه

نرجع للجد

صحيح الحكاية مجرد طق حنك معاكي في دي
بس طق الحنك لما يزيد عن حده بينقلب ضده
والمرة دي الحكاية وسعت قوي وبهوقت كمان

صحيح يعني حسن شحاتة عمل من الفسيخ شربات بس مش معنى كده ان ناس تطالب بتعيينه رئيس وزراء علشان يحول فسيخ حياتنا لشربات

يعني المبالغة في بعض الامور بتأتي غالبا بنتائج عكسية وبتعود الناس على سلوكيات معينة

ربنا يفك اسرنا بقى ونبطل الهم ده

تحياتي

Bella said...

محمد مفيد

مرحبا بك
وسلامتك من الزهق

لما تزهق انت بقى مين ح يقف في الطابور يستلم لك الشارع بتاعك

وطبعا ح تعرف العنوان
بس استلم الاول وح اعمل لكم حفلة معتبرة

هههههههه

تحياتي

Bella said...

صوت من مصر

مرحبا بك

الحقيقة نحن لانهتم الا بالانتصارات السهلة

يعني حتى الرياضات الاخرى لاتهتم بها الدولة وبالتالي لايهتم بها الناس
هي يادوب كرة القدم ودمتم

وياريت حتى بيهتموا بتحويل الناس للمارسين للرياضة
الا يادوب كل الناس متفرجة

ميدان عمرو زكي مقفول دلوقتي علشان بيزينوه وبيعملوا فيه نافورة جديدة

تحب تروح ميدان ابو تريكة

التاني ده صحيح مقفول برضه بيعملوا فيه مدينة ملاهي جديدة علشان ولا ابو تريكة يلعبوا كويس

ههههههههههههههه

تحياتي

Bella said...

Sherif

مرحبا بك

حكاية ان فيه شوارع لايعرف الناس من هم اصحابها دي برأيي خيبة من خيباتنا الكثيرة
فما اسهل ان تتم كتابة لوحة في نهاية وبداية كل شارع تحت اسم الشارع ومكتوب فيها من هو هذا الشخص باختصار ومتى ولد ومتى توفاه الله وماهي انجازاته لحفظ التاريخ

تصور ان الكثيرين لايعرفون البطل احمد عبد العزيز المسمى باسمه شارع كبير جدا في المهندسين والعيب ليس عليهم ولكن على طريقتنا في التعامل مع اسماء الشوارع

اما بقى انا استاهل اكتر من الشارع ربنا يكرمك
انا قلت نبتدي بطلب صغير كجس نبض يعني

هههههههههههههه

وبعدين نفتح ع الرابع بقى ونطلب ونتطلب

ولا انت ايه رايك؟

هههههههههه

تحياتي

Bella said...

fad-fadat nour

مرحبا بك

شوفتي بقى يانور الظلم الواقع على
وبالتالي يقع عليكم جميعا

اذا لم يكن لي شارع فلن يكون لكم حتى رصيف

اعملوا حسابكم على كده
لو اخدت شارع ح انغنغكم واجيب لكم حقوقكم من فم الحي اللى ساكن فيه كل واحد فيكم

بس نظموا الحملة واول مااتلايم على الشارع ح اعمل لك واحد فيكم حملة ونهيص بقى وكل مواطن بالفعل يبقى له شارع

وممكن نعمل لوجو للحملة دي وشوية أغاني وطنية

هااااااااا
ايه رايك؟؟

ياسمين حميد said...

كل مواطن يبقى ليه شارع؟
كدة وشّ مصر كله حيبقى شوارع
;-P

قلم جاف said...

أنا شخصياً عايز أسمي شارع على اسم البطل الملهم العبقري المبدع الأستاذ الدكتور اللواء الفنان المستشار أركان حرب الباشمهندس المرحوم زكي جمعة..

زكي جمعة دة حكاية.. دة عمل حاجات كتير لمصر مش فاكر منها ولا حاجة لحد دلوقت!

فيه حد معقول ما يعرفش زكي جمعة؟ زكي جمعة.. قريب شفيق يا راجل.. ياريت نسمي الشارع اللي جنب شارع زكي جمعة شارع شفيق يا راجل رفيق الكفاح اللي كان بيمشي جنبه في الشارع!

في مصر مئات الشوارع مسماة على أسماء أشخاص لا يختلفون كثيراً عن "زكي جمعة"..فيه شارع في المنصورة مثلاً اسمه شارع "صابر النخلة"..مين صابر النخلة دة محدش تقريباً عارف.. وفي القاهرة الحال ألعن وألعن..

حسن شحاتة مدرب كويس وفاز ببطولتين أمم أفريقية.. لكن ما يستاهلش يتعمل له شارع.. إلا إذا كان فيه ناس شايفين كدة.. وشايفين كمان نسمي شوارع بأسماء فتحي سرور والدميري وبالمرة دافيد بن إليعازر!

غمض عينيك said...

وانا كمان

Ahmed Ashraf said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات