Tuesday, April 8, 2008

سقطة العاشرة مساء

بعد السقطة التي وقعت فيها منى الشاذلي بالأمس وطبخها الحلقة بسرعة غير طبيعية وتحويل الحلقة للحديث عن غاندي والارتباك الواضح في طريقة تقديمها للحلقة كان يمكن أن اعذرها ولو ان الإعلامي ليس له أي عذر عندما يرضخ لتهديدات أمنية ويصبح كالفأر المذعور ويهرب ليتخبئ في اقرب جحر !!!

أما أن تحاول في حلقة اليوم تلبيس التهم لعمال المحلة بطريقة مكشوفة جدا وحتى طريقة مقاطعتها للاتصالات الهاتفية التي تحاول الحديث عن تردي الاحوال المعيشية وموجة الغلاء التي يعلم بها الجميع في محاولة منها للتشويش المتعمد على الاسباب الحقيقية وراء اللجوء للإضراب بعد نفذ صبر الجميع وقبلهم عمال المحلة المساكين الذين يحيكون لهم التهم حتى يصبحوا عبرة لغيرهم وحتى لايفكر أي شخص مجرد التفكير حتى في المطالبة باي شيئ!!!

لاعذر لك يامدام منى وعيب جدا ماحدث منك

هذه سقطة مدوية لن يغفرها لك الملايين الذين رفعوك لمصاف مذيعات برامج الحوار حتى وصل الأمر بالبعض لتشبيهك بسيدة الحوار أوبرا وينفري مع تحفظي على طريقتك في إدارة حواراتك المختلفة

ولنا حديث آخر عن الإضراب وتداعياته في تدوينة مستقلة

فقط أحببت أن أعبر عن استيائي الشديد مما حدث في برنامج العاشرة مساء على مدى يومين إستهانت فيه مذيعة البرنامج بمشاعرنا كمشاهدين واستهانت اليوم بمشاعر أهالي الضحايا الابرياء الذين يخططون للزج بهم في السجون مستخدمين في ذلك كل الاساليب القذرة بما فيها الإعلام في حرب غير متكافئة على الإطلاق !!!

لاتستهيني بذكاء المشاهدين يامدام

تحديث

تم تعديل العنوان لسقطة العاشرة مساء بدلا من العاشرة مساء فقط حتى يكون أكثر تعبيراً عن محتواه

هناك مدونة أخرى تحدثت عن نفس الموضوع

سقوط المحلة في العاشرة مساء


في مدونة أحمد الحسيني

تحديث 2

وجدت هذا الفيديو لحلقة العاشرة مساء الاولى التي تمت فيها تغطية الاضراب

اللينك اهو


36 comments:

Anonymous said...

مذيعين و مذيعات معندهمش ضمير

نظام حكم فاسد

و مجرم

و ديكتاتوري

هي دي الحقيقة مهما كدبوا

Anonymous said...

سبحان الله أنا لسه كاتب تدوينة في نفس الموضوع
طبعا أنا معاكي في كل اللي قلتيه
وواضح أن كتير لاحظوه
منى الشاذلي سقطت من عيون الكثير
وأولهم الغلابة التي كانت تدافع عنهم
تحياتي

محمد عبد الغفار said...

تسقط تنجح تولع بجاز لا يقدم ولا يأخر

انما ما حدث فعلاً كان سقطه مدويه لجميع الأطراف

Anonymous said...

حين لاتمس الحقيقة مصالحي فالحديث فيها شيء مقدس وتصبح من المحرمات حين تمس تلك المصلحة..فقد وجدت السيدة منى الشاذلي وهي الممثلة القديرة والتي تتصنع التأثر في كثير من الأحيان ولكن لم أكن يوماً أصدق هذا التمثيل الذي تقوم به وكنت دائما أشفق على من يعجبون بها وكنت متأكد أنها هي كما ظهرت الآن.. فبقدر حزني على أهدار حقوق الغلابة ألا أنى فرحت أني مازلت أستطيع قراءة تصرفات الناس حتى لوكانو ممثلين بارعين كمنى الشاذلي.

عمرو سلامة said...

مش منى الشاذلى بس لو تلاحظى يا اختى ... ده الجزيرة كمان عملت تعتيم اعلامى حول اضراب المحله ... كمان بعض القنوات الفضائيه ... مش عارف ايه اللى حصل فى اضراب المحله ده .... الاعلام حاول انه ما يديش لبتوع المحله حقهم ويوضحوا اللى جرا .. حسبنا الله ونعم الوكيل ... حسبنا الله ونعم الوكيل... مع ان منى الشاذلى قبل كده كانت بتقدم حاجات جريئ جدا مش عارفين ايه اللى جرى ... يظهر ان احنا لسه مستنين الجرئ .. مشتنين اللى لا بيخاف من امن الدولة ولا غيره .. ربنا معانا ... يارب ارحمنا من نظام لا يعرف للشعب الرحمه ... وشكرا ليكى يا اختى على طرحك الموضوع وربنا يجزيك كل خير

جبهة التهييس الشعبية said...

لا استني بس يا بللا
هي عملت ايه بخصوص عمال المحلة
انا ماشفتش الحلقة دي
ممكن تحكي لي بالتفصيل؟

انا شفت حلقة غاندي
:))
ما فهمتهاش بس كل اللي فهمته ان الامن هددهم كلهم
بس انا كنت متصورة انها بما انها اتهددت من الامن انها ح تتجاهل موضوع المحلة ده ما كنتش متصورة انها ح تتكلم فيه

اتهمتهم ازاي بقى احكي لي كده

Bella said...

Anonymous 1

مرحبا بك

متفقة معك ولو اني كنت اتمنى ان يكون هناك استثناءات بين صفوف المذيعين

لكن يبدو انه لافائدة

ربنا يسد نفسهم

تحياتي

Bella said...

أحمد الحسيني

مرحبا بك

ح اشوف تدوينتك اللى كتبتها
اصلي كتيت عن حلقة منى بسرعة
وياريت لو عندك فيديوهات للحلقة او تعرف تتصرف لنا فيهم ينوبك ثواب
علشان اللى ماشفش الحلقة يعرف الحكاية ايه

اصل مهما حكينا مش زي مايشوفوا بنفسهم

وعلى فكرة انا مبسوطة انها ظهرت على حقيقتها علشان المبهورين بيها وطالعين بيها السما يعرفوا حقيقتها

تحياتي

Bella said...

محمد عبد الغفار

مرحبا بك

السقطة فعلا مدوية للجميع
الوحيدة التي حاولت تقديم تغطية معقولة كانت البي بي سي

اما الباقين فالضغوط الامنية عليهم كانت كبيرة والخوف من الغاء تراخيصهم وغلق مكاتبهم ايضا

ولسه بركات وثيقة اونكل الفقي

ربنا ياخدهم كلهم

تحياتي

Bella said...

Anonymous 2

مرحبا بك

معك كل الحق

الحكاية بالفعل حكاية مصالح وعندما تتقاطع المصالح كل يختار مايفيده

وليذهب الجميع للجحيم

انا ايضا لم اكن اصدقها وكثيرا ماكنا نختلف انا ووالدتي عليها حيث تتهمني امي باساءة فهمها او التجني عليها

الآن وبعد حلقة تغطية احداث الشغب في المحلة كل شيئ انكشف وبان

تحياتي

Bella said...

عمرو سلامة

مرحبا بك

الوحيدة التي غطت تغطية معقولة كانت البي بي سي

لكن الجزيرة لم تفعل مثلما فعلت منى وعملت حلقة مخصوص لتصور عمال المحلة على انهم هم من قاموا بالتخريب وكل ماحد يتكلم عن ارتفاع الاسعار تقاطعه وكأن مافيش اي حيثيات ولا اسباب تدعوا للاضراب

حتى الراجل اللى اتصل يتكلم عن ان قوات الامن عارفة العيال البلطجية دول شوشت عليه

وواضح طبعا ان التخريب ده اخراج الشرطة بامتياز لانهم كانوا واقفين يتفرجوا على اللى بيولوعوا اطارات السيارات ولم يحاولوا منعهم وتركوا من اراد التخريب ليخرب

كلنا عارفين انهم مارسوا ضغوط امنية شديدة على المراسلين والقنوات الفضائية

ولكن اللى حصل من منى مختلف عن باقي القنوات

حتى الجزيرة عملت حلقة ماوراء الخبر لتغطية الاضراب

يعني ماكتموش على الموضوع ولا اظهروا العمال على انهم هم اللى حرقوا البلد

اما تقديمها لحاجات جريئة فده محسوب كمان يعني مش كل جرئ كانت بتتكلم فيه خصوصا ان فيه مرات كانت بتتكلم بجراءة في امور وبعدها مباشرة نلاقيها هدت صوتها

يعني كل بالتنسيق معاهم

مافيش فايدة للاسف

تحياتي

Bella said...

جبهة التهييس الشعبية

اهلا نوارة

انا كمان شفت حلقة غاندي وقلت اكيد هددوها وحاولت تعمل تمويه وتغطي الموضوع بالطريقة التاريخية الحلزونية دي
وقلت خلاص بقى نعرف الاخبار من اماكن تانية

بس لما تاني يوم اتكلمت في الموضوع ماكنتش متصورة انها ح تعرضه بالمنظر ده

ياستي استضافت اتنين لواءات

الاول كان مدير كلية الشرطة سابقا

والتاني عضو مجلس شعب

واستضافت عضو مجلس شعب عن الاخوان

وكمان واحد مش فاكرة اسمه سبق وجه قبل كده من القيادات العمالية في مجلس الشورى وده يمكن اكتر واحد اتكلم كويس في حق العمال

صحيح الباقيين لم يتهموا العمال بشكل مباشر

بس مابين اللى قعد يقول فين الانتماء وليه الناس واقفة تتفرج وماحدش حاش المخربين وكأن المواطنين العزل مطلوب منهم يدخلوا وسط مجموعة بلطجية بيولعوا اي حاجة تقابلهم وبيضربوا مولوتوف
وقعدوا يتناقشوا متجاهلين ان ارتفاع الاسعار ورا كل المشاكل دي

وكمان غياب ثقافة التظاهر الحقيقية بسبب عدم ممارستها من قبل

يعني مش عارفة منتظرين ايه من شعب اصلا مايعرفش الفرق بين التظاهر والاعتصام وعدد كبير من اهله يعيشون حرمان حقيقي غير طبعا الفمع والقهر الامني اللى بيمارس عليهم اغلب الوقت

وجابوا تغطية بالصور تبين المشاهد والنائب العام بيتفقد الاماكن اللى تم تخريبها وشكل المدارس وهي عبارة عن خراب لايمكن يتصور عاقل ان اهل المحلة يعملوا التخريب ده
وواحد قعد يحكي عن عدد اعمدة الانارة اللى تم تكسيرهم ويحصر الخسائر

وبعد كده جابوا شريط تاني فيه تعامل الامن مع التظاهرين وفيه مقاطع كتيرة في الشريط كاتمين الصوت علشان صوت الرصاص الحي طبعا باين
حتى كان فيه لقطة واحد بيقول اضرب

بعدها اتكتم الصوت

واغلب الحلقة لما بيعرضوا المشاهد كانوا جايبين صورة العيال الصيع اللى بيولعوا الحرايق

ولما عملوا لقاءات مع اهالي المحلة وحكى الناس حصل قطع كذا مرة لكلام الناس علشان ابتدوا يتكلموا عن مين اللى بدا بضرب النار والاعتداء

غير بقى مكالمات التليفون يانوارة اللى غلوشت فيها على شخص اتصل وليه وليه انه قال انه مش من المحلة وحب يقول وجهة نظره في موضوع الاضراب ومشكلة ارتفاع الاسعار والكلام ده

راحت مغلوشة عليه بطريقة باينة قوي ولولا اصرار الراجل يتكلم ماكناش عرفنا نسمعه من تدخلاتها

يعني حلقة كانت اخر سخافة

محتاجة انك تشوفيها مش تتحكي لك بس
لان فيه تفاصيل كتيرة في الحوارات وطريقتها الحماسية في الكلام وطريقتها كمان بالتلميح للمخربين وكأنها ناقص تحط الكلام على فم المتكلمين علشان يقولوا ان العمال هم اللى خربوا الدنيا

حاجة تقرف

ح اشوف لو عرفت الاقي الفيديوهات دي اوعدك احطهم لك تشوفيهم

تحياتي

أفندينا said...

ليست منى الشاذلي الوحيدة في ذلك يا بيلا ولكن جميع أصحاب البرامج الحوارية من معتز إلى عمرو أديب ناهيك طبعا عن البيت بيتك والغريب أن القنوات الأخبارية جميعاٌ عدا البي بي سي العربية تجاهلت ما يحدث على الأرض في المحلة ... ولكن فعلاٌ الأمل في المدونيين الذين قادوا الأعلام في تلك الأزمة على شبكة الإنترنت
سوف أحاول العثور على تلك الحلقة وبما نجدها في عرب تيوب وسوف أرسل لك الرابط في حال عثوري عليها

آفاق الحرية said...

السلام عليكم
حسبنا الله ونعم الوكيل
يعني بدل ما نبحث عن الحقيقة نحاول نلفق للناس التهم
ويبقي ايه الرفق بين البرامج والشرطة

السـيد شبـل said...

عندك
حق تماماومش هى بس كل البرامج طلعه جبناء وليهم مرحله معينه بيقفوا فيها " عمرو خرا والجزيره "
كلهم
بشكرك انك كتبتى عن الموضوع ده

Lasto-adri *Blue* said...

أنا فى قمة نرفزتى من منى الشاذلى
ماكنتش أتوقع إنها تقلب على كدة
هو أصلا أفضل سنة لها كانت الأولى لما كانت بتتكلم عن الحق
بعدين أخدوها أجازة ومن ساعتها وهى موالية

وياريتى فاهمة السبب

... said...

هي كانت مش في طبيعتها ولا حماسها المعتادين
بس أنا حطيت نفسي مكانها
لو وجهت لي اتهامات باثارة الناس وعرض كل الاعتصامات السابقة
مما دفع بالبلطجية للتخريب
أكيد هاخاف اني اكون سبب
يمكن افكر وانا في مكانها اني تسببت في موت روح واحدة مثلا لأن كلامي كان موجه لناس مش فاهمة
متهيألي لو فعلا في مكانها كنت اعتزلت
مش عارفة ليه دة اللي خطر في بالي
احنا بشر

Bella said...

أفندينا

مرحبا بك

إختصاصي منى الشاذلي بالتقريع لايعني أن غيرها قد أجاد وهي وحدها المخطئة
كل مافي الامر اني ممتنعة عن مشاهدة غيرها
يعني البيت بيتك لو مافيش اي وسائل اعلام في الحياة كلها صعب جدا اتعب مرارتي واتفرج عليه

وشرحه سي معتز الدمرداش وإن كان اقل سخافة الا ان الفرسة التي تصيبني عقب كل حلقة استدعت الامتناع عن المتابعة حفاظا على صحتي

اما الاخوة أديب فنحن لسنا مشتركين في الاوربت ولله الحمد

مشكلة برنامج العاشرة مساء ان له جماهير عريضة وشعبية كبيرة ولهذا كانت الصدمة فيه كبيرة لاننا اعتقدنا خطأً اننا لدينا حرية ولو نسبية وعندنا برنامج مصري يغطي مانريده ويلمس نبض الجماهير

ولكن يبدو ان لمس نبض الجماهير لايستقيم مع ارتداء الطبيب لقفاز جلدي سميك يحجب عنه الاحساس بالجماهير اصلا ناهينا عن قياس نبضهم

عموما ماحدث في هذه الايام اسقط الاقنعة عن الكثير من الوجوه سواء اعلامية او وجوه اخرى كالاخوان وغيرهم من القوى الموجودة في الساحة والساعية دوماً خلف السلطة ولا يعنيها من قريب او بعيد ان تبحث عما يريده المواطن المطحون

واشكرك كثيرا على بحثك عن الفيديو وياريت الله يكرمك اول ماتلاقيه تعرفني

تحياتي

Bella said...

آفاق الحرية

مرحبا بك

يبدو أن دور الاعلام الحديث اصبح مكملاً لدور الشرطة كالمكملات الغذائية بالضبط

لاغنى عنها لكل مواطن في هذا البلد

ربنا يستر علينا

تحياتي

Bella said...

السيد شبل

مرحبا بك

الحقيقة ان الجزيرة وإن كانت قد مورست عليها ضغوط للتعتيم على الخبر فهي ملومة بالتأكيد ولكنها لم تشارك في مهزلة التلفيق التي قدمتها بامتياز منى الشاذلي

ثم ان الجزيرة في اليوم التالي اي اليوم واثناء تغطيتها لانتخابات المحليات تم القبض على مصورهم ومساعده وحتى الآن غير معروف مصيرهم

ربنا يستر

عموما اهي فرصة نعرف العدو من الصديق في هذه المحنة

تحياتي

Bella said...

Lasto-adri *Blue*

مرحبا بك

لاتندهشي ياعزيزتي

كله محصل بعضه الصراحة

على موقع مصراوي كتب احد القراء تعليق يتحدث فيه عن مرتباتهم

سواء منى الشاذلي او غيرها من مذيعي البرامج الحوارية
ولو عرفت المبلغ ربما تفهمت دوافعها للمحافظة على المكان حتى لو كان على جثث الابرياء

كالعادة

الاساليب الميكيافيلية هي قدرنا في هذا البلد المسكين اهله

تحياتي

Bella said...

بثينة

مرحبا بك

خللى بالك ياعزيزتي

انت بنفسك قلت لو في مكانها كنت تركتي المكان او على اقل تقدير تحججتي باي حجة ولم تقدمي الحلقة

لكن ماذا عن المشاركة في تلبيس التهمة للمقبوض عليهم ونحن لانعرف إن كانوا هم من قام بالشغب أم لا

هذه جريمة أكبر

ولا يشفع لها اي شفيع وليس هناك مايبرر اشتراكها في هذه المهزلة

ابسط شيئ لو كانت تحترم مشاهديها وتريد المحافظة على رصيدها لديهم لكانت اعتذرت عن تقديم الحلقة وليكن مايكون

اما ان تشارك في هذه المهزلة

فمع احترامي يعني لاعذر لها

تحياتي

الطائر الحزين said...

محدش حاسس بالنار اللى الناس فيها

مع تحفظى على موضوع الاضراب والذى تم فى المحلة

الامر له اعتبارات كثيرة وقد رأيت الأمر عن قرب بعض الشىء



تحياتى

قلم جاف said...

باستثناء ما قلتِه عن منى الشاذلي اسمحي لي بالخلاف معك ..

عمال المحلة ، أو للدقة: قيادات عمال المحلة تتحمل جزءاً من المسئولية السياسية والمعنوية عما حدث ، وليس الجنائية بطبيعة الحال..

1-عدد كبير من تلك القيادات كان من أشد المشاركين في مظاهرات "بالروح بالدم" لمن وصفوهم لاحقاً بالفاسدين واللصوص وآكلي مال الشعب!

هؤلاء أهانوا الحركة العمالية المصرية بالكامل وصوروا عمال مصر بأنهم مثل "الفرزدق" و"جرير" و"أبي نواس" إن أعطوا منحوا وإن منعوا ردحوا..

وطبعاً لم تدن السيدة الوزيرة ذلك..

2-بل إن السيدة الوزيرة مضت في نصر تلك القيادات ظالمة أو مظلومة بالذوق بالعافية بالعصب وبالغصب وربما بالنصب.. قالت لا فوض فوها أن الحركة العمالية المصرية غير مخترقة من أي فصيل سياسي حتى ولو كان الحزبوطني.. وقالت أيضاً ما معناه أن "عمال مصر" ينأون عن الدخول في مهاترات حزبية ضيقة..

التصريح الأول يحتاج من السيدة الوزيرة للبحث في السبعين مليون شخص عن مغفلين ليصدقونه ، القاصي والداني والعمال أنفسهم يعرفون أن العمال بين مطرقة الحزبوطني وسندان اليسار.. ومن أنصار نظرية المؤامرة من يقول أن تلك القيادات فعلت ما فعلت وحرضت ما حرضت على الإضراب عندما أحست أن الحزبوطني سيتخلى عن تلك المصانع وبالتالي عنها (لو خصخصت الشركات والمصانع فلا حاجة للحزبوطني لاختراقها ، وإلا لكان اخترق مصانع "بهجت" وشركات "ساويرس".. لأن بعض تلك القيادات-بصريح العبارة- كانت تقوم بنفس الدور الذي قام به "عزت حنفي" .. قام به "حنفي" مع المتطرفين بينما قاموا هم به مع حزب التجمع و"الشيوعيين المصريين"-الحزب الشيوعي المصري سابقاً..فلما وقعت الفاس في الرأس أعلنوا شعار "من النهاردة مفيش حاكومة..أنا الحااكومة"!

فاكرين السيد راشد؟

وفي الثانية أنه لو كانت تلك القيادات حريصة فعلاً على عدم اختراق الحركة العمالية لكان من باب أولى أن تنفي ما نشرته المصري اليوم بتاريخ 19 فبراير 2008 عن نيتها "بالتنسيق مع قيادات حزبية وشعبية" القيام بإضراب..الأمر الذي تعاملنا معه- نفر نفر- باستهتار حتى حدث ما حدث.. كان من باب أولى أن تنفي الكلام في حينه..

بمناسبة بي بي سي.. مراسل القناة "عمرو عبد الحميد" - صححوني إن أخطأت مراسل سابق للجزيرة ومذيع سابق بإذاعة الشرق الأوسط- ألمح إلى وجود "حرب منشورات" بين "مؤيدين للإضراب" و "معارضين له".. وألمح إلى وجود "صفقة ما" بين القيادات والحزبوطني وهو ما نشر بصيغ مختلفة في صحف مستقلة مصرية..

للمرة الثانية.. القيادات مسئولة معنوياً وسياسياً عما حدث .. لكنها ليست مسئولة جنائياً ولا قانونياً.. بل إن الحكومة كافأتهم تماماً على ما فعلوا بينما رتع الغوغائيون في الشوارع وأصيب أبرياء وكسب الحزبوطني كل شيء.. منها غطاء لمد قانون الطوارئ الذي أستبعد- تماماً- إلغاؤه الشهر القادم..

أخيراً.. تبقى نقطتان:

1-منى الشاذلي حتبتدي تجر ناعم مع عمال المحلة ..تراهني؟.. إذا كان إعلام الحزبوطني نفسه جر ناعم ووصفت الجمهورية النهاردة - على سبيل المثال- اللي حصل بإنه "عيد لمصر".. أنا لو منهم كنت أعلنته يوم حداد في المحلة بما إني -كابن مدينة- أرفض إن دة يحصل تحت أي ظرف في مدينتي اللي بأحبها..

2-لا يجب أن نسقط في تعميم أن عمال المحلة هم كل المحلة وأن المحلة صارت جمهورية مستقلة .. ما حدث في "زفتى" سنة 1919 -على ما أذكر- كان ظرفاً استثنائياً..وأن حكومة الحزبوطني والحزبوطني- أياً كان فسادهما الزاعق- ليست الاحتلال البريطاني..

عمال المحلة ليسوا المحلة ، وتجار بورسعيد ليسوا كل بورسعيد ، وفلاحو الأقاليم ليسوا كل سكانها.. هم جزء لا يتجزأ من تلك الأماكن لكنهم ليسوا هم الأماكن نفسها..

الحل الحقيقي تجمعات عمالية مستقلة سياسياً ، تجمعات طلابية مستقلة سياسياً ، تجمعات مهنية مستقلة سياسياً .. اللاحزبية واللاتيارية واللامذهبية ليست عيباً ولا حراماً..والله أعلم..

عذراً للإطالة..

Anonymous said...

ماذا فعلنا لكم وأي ذنب في حقكم اقترفنا حتى تقطعوا كل وصل كان بيننا وبينكم وتبخلوا علينا بمجرد السؤال

بحثنا عنكم في كل ركن وفج وأوصلنا بحثنا إلى هنا وأسعدنا أن واتتنا الفرصة أخيرا لإلقاء السلام

micheal said...

سلمليلي علي عمو الفقي و وثيقه الاعلام
:)
تحياتي

شقاوة شعب said...

رغم انى بحب منى الشاذلى ..بس اضايقت قوى يوم حلقة غاندى
وقلت فى نفسى غاندى ايه اللى جاية تتكلمى عليه دلوقتى يا منى ؟؟

بس طبعا كل ده يدل على ان مصر اصبحت دلوة بوليسية امنية من الدرجة الاولى
الامن بيدخل فيها فى كل تفتوفة فى البلد
شوية وهيدخل فى جوازتنا ويقولنا لأ الامن مش موافق على العريس ده
خدى ده

والله حاجة خيبة
لكن من المؤكد انها بداية النهاية

تحياتى
شيماء

khobayb said...

من قال أن منى الشاذلي وبرنامجها من البرامج الحوارية المحايدة ؟

لطالما شعرت أن هذا البرنامج موجه لامتصاص غضب الناس ، ولتمييع القضايا بشكل أو بآخر

طريقتها الحوارية وهدوؤها المستفز في كل الامور والجملة الختامية المنمقة المائعة التي تختم بها كل القضايا ...الخ

الله أعلم

rana said...

بعد انكشاف منى الشاذلى من يستطيع كشف البهلوان الاخر عمرو اديب

زمان الوصل said...

لاحظت أن الصور التى نقلتها العاشره مساء فى تغطية الاضراب لم تتضمن صوره واحده لمصاب من الاهالى !! بل تضمنت دائما صور مصابى الامن المركزى ولم نر صوره لاحدهم م وهو يرفع عصا كهربيه او هرّواه فى وجه الغاضبين !!

كان الاكثر احتراما لو هناك ضغوط امنيه على البرنامج عدم طرح الموضوع للنقاش اصلا و كانت الرساله ستصل لنا كمشاهدين !! امّا محاولة تلبيس الامر للعمّال بالذوق أو بالعافيه فكانت شديدة الدناءه و الخسّه ..

Unknown said...

متابعتش الحلقه

بس شفت حلقه بعدها أظن انها متوازنه حبتين

ولا ايه؟؟

زمان الوصل said...

العاشره مساء تفوّق على البيت بيتك !!
بالأمس المذيعه نوّهت إلى أن وزير الداخليه شاهد حلقه سابقه من البرنامج طلبت فيها طفله معاقه ذهنيا جهاز لابتوب و قرّر الوزير شراء الجهاز لها !!

ورغم تنويه المذيعه أن هذا كان طلب شخصى ممّا يلمّح بعدم رغبة الوزير فى الإعلان عن الخبر إلاّ أن البرنامج تطوّع بالتنويه عن هذه اللفته -بكسر اللام- الإنسانيه !! و ماكانش ناقص غير أن يطلق على "حبيب العادلى" صفة الأب الحنون بس دى محجوزه لأب تانى

Anonymous said...

عندك حق أنا يوم الاضراب ده كنت مستنية أسمع كلام يريحنى ويفهمنى وقلت أكيد فى العاشرة مساء الخبر اليقين بس للأسف أصبت بالاحباط الشديد

Alkomi said...

الباب اللي يجيلك منه الريح سده و استريح

والريسيفر اللي يرميك على دريم ارميه و عيش في نعيم

اصحاب العقول في راحة يا بيللا

مابتسمعيش الكلام خالص انتي ايه اللي بيخليكي تشوفي المرض ده

Unknown said...

يا اخواني نحن شعب يتألم من كثرة الأثقال التي علي كاهله ,ولا نجد مانخفف به الامنا غير البكاء ,فدعونا نبكي دون الانتظارلمن يأتي و يمسح دموعنا ,فلا تمسحها الا ايدينا ,,,,,,,,,,,,,,,ويا حسرتا علي شعب ابي ,, ان يلبس العز عباءتا ,,,,,,,,ورضي ان يلبس الذل جينسا وبالوزتا

Unknown said...

يا اخواني نحن شعب يتألم من كثرة الأثقال التي علي كاهله ,ولا نجد مانخفف به الامنا غير البكاء ,فدعونا نبكي دون الانتظارلمن يأتي و يمسح دموعنا ,فلا تمسحها الا ايدينا ,,,,,,,,,,,,,,,ويا حسرتا علي شعب ابي ,, ان يلبس العز عباءتا ,,,,,,,,ورضي ان يلبس الذل جينسا وبالوزتا