Friday, April 18, 2008

مبروك ياجماعة

أعاني منذ عدة ايام حالة ارق تدويني حاد يتقاطع مع حالتي المزاجية التي ترتبط ارتباطاً وثيقاً بحالتي الصحية المربوطة بحبل مشدود من طرفيه الأول مشدود في وتد السادس من إبريل والثاني في وتد الرابع من مايو ويمر بأحداث كثيرة وقعت وستقع بين هذين التاريخين !!!!!!

وفي محاولة مني للخروج من هذه الحالة العبثية الخانقة مابين متابعة نشرات الاخبار على الفضائيات والاحتراق بمشاهد القتل والتجويع لإخوتنا في غزة ومايصاحبها من حملات اعلامية مسعورة يقودها بامتياز اعلامنا البرتقالي وبين مشاهد الابادة الجماعية التي يتعرض لها أهلنا في العراق فكرت في التغيير ومعرفة الاخبار من النت !!!!

الحقيقة ياجماعة مش عارفة اقول ايه بعد هذا الخبر البديع المتناسب طرديا مع فصل الربيع
قرأت في شريط أخبار الجزيرة ان هناك حركة تعديل في المحافظات يتم بموجبها الاعلان عن محافظين جدد
وانتظرت ولم اسمع الخبر طازجاً
والحمد لله الذي رزقني الفطنة وجعلني ابحث عن التعديل على النت وربنا مايحرمناش من هذه الخدمة العبقرية
وكان ماكان

وقرأت الخبر عدة مرات غير مصدقة مارأته عيناي

اصبح لدينا محافظتين جديدتين وحصوة في عين العدو

حلوان والسادس من أكتوبر

لم افهم السبب العبقري وراء هذا التفصيل الجديد للمحافظات ولكني عثرت على ضالتي المنشودة في هذا التفسير الحصيف من السيد اللواء المحجوب جعله الله ذخراً لنا وافادنا من علمه الغزير

قرار إنشاء محافظتين يستهدف إعادة التوازن السكاني والاقتصادي

أفيدونا ياأهل العلم والمعرفة
هل من تفسير لهذا الكلام !!!
وهل نحن بحاجة لمزيد من المحافظات؟؟
وهل سنشهد المزيد من القرارات المماثلة؟؟
وهل لتوقيت هذا التغيير أي مغزى؟؟
وهل تتوقع المزيد من المحافظات !!!
وماذا تتمنى؟؟

عن نفسي اتمنى أن يتحول شارعنا لمحافظة مستقلة يُعين لها محافظ يأمر بإنشاء منفذ توزيع خبز على ناصية الشارع وياريت بالمرة يجلب لنا العيش من مخابز الداخلية رأساً حتى نقف بأنفسنا على مزايا التقسيمات الجديدة

ودمتم بخير


13 comments:

عدى النهار said...

أول إنطباع جالي عند قراءة الخبر على موقع مصراوي هو محاولة شغل الناس بالحديث فى شىء غير 4 مايو والعيش والأسعار وخلافه... مش هى دى عادتهم برضه؟

الغريبة إن حلوان دى قديمة جداً وكان لها ثقل كبير لسنوات طويلة وكان من الأولى ساعتها عملها محافظة منفصلة عكس ما هو حاصل الآن. طب والقاهرة الجديدة وبدر ومش عارف إيه تانى حايعملوا فيهم إيه

Bella said...

عدى النهار

مرحبا بك

هذا أيضاً ماخطر ببالي عقب صدور قرار تشكيلات المحافظين
والمضحك في الاخبار التي تتوالى علينا كالسيل أن السيد وزير التضامن الاجتماعي اعلن انتهاء أزمة رغيف العيش بنسبة 80 %

والصراحة باعتباري من سكان القاهرة الكبرى اقولها وضميري مرتاح ان هذا الكلام غير صحيح

فإذا كنا في القاهرة الكبرى ولم تنتهي الطوابير كلياً والعيش في حالة يرثى لها من حيث الشكل والمضمون فمابال المحافظات الاخرى

النهاردة بدون جدال يوم الاخبار الغريبة جدا والواضح منها طبعا التغطية على اضراب 4 مايو

شوف المقالين دول

انا اصلا مش من متابعي عبد الله كمال ولا سي كرم جبر ولكن عباس العبد الله يسامحه هو اللى كان عامل موضوع عن المقالين دول

ههههههههههههههههه

http://www.rosaonline.net/alphadb/article.asp?view=3878

وده مقال عبد الله كمال يقطر كوميدية الحقيقة

http://www.rosaonline.net/alphadb/article.asp?view=3877

العدد طبعا لايخلو من سموم في كل كلمة مكتوبة

ربنا يورينا فيهم يوم

تحياتي

عصفور المدينة said...

قلت لزوجتي منذ أسبوع

ستشهد هذه الفترة القادمة كثيرا من الأخبار التي تشغل العقول

سنسمع كثيرا عن انفلونزا الطيور وقضايا نائمة تستيقظ وربما تغييرات وزارية وربما تغييرات في المحافظين وربما صور مسيئة هنا أو هناك


وقد كان تقريبا كل ماقلت وزيادة

انفلونزا الطيور في الأسكندرية كان أول خبر وكان يحمل نوعا من التجديد الطريف

والعفو عن أصحاب هايدلينا وتغيير محافظين بل وإنشاء محافظات جديدة وربما نرى أشياء جديدة وطريفة

Anonymous said...

مش عارفة إذا كان ده عشان يشغلوا الناس و يلهوهم فى أى حاجة ... و لا القادة حسوا بفراغ فقالوا يلا نتسلى شوية ! يعنى افتكر أن فى الدرااسات الإجتماعية لما كنا بناخد عدد المحافظات كنا بنبقى مش متأكدين إذا كانوا 26 و لا 27 ... فدلوقتى بقم كام ؟!

الشعب واقف ع المحطة ...
و القادة عملوها سلاطة ..
و أنا يا عينى جتلى جالطة ...
( كلمات سمعتها قريب فى حفلة .. مع بعض التعديلات الصغيرة )

الطائر الحزين said...

ما رأيك ان تحت عنوان
وظائف خالية

نطلب محافظين

بنت القمر said...

بيلا
شوفي هو تقريبا كل المحافظين اتعيروا الا بتاع اسكندريه والجيزة
وتقريبا مفيش حد في اسكندريه ا بيدعي عليه بعد ما وقف تصاريح البنا واسعار الشقق ولعت وبهدل الرصفه وشال الحجارة الطبيعيه البازلتيه وجاب بدالها اسمنتيه كئيه
ولاوي كتير
وهو تقريبا زي ما تقولي اتعب الزبون
تريحه ليه؟ ده بقا المبدأ اللي ماشي غيروا كله الاهو
تانيا واشمعني انتي يغيروا شارعكوا لمحافظه
طب وانا كمان
:)))
شارع قمر يبق جميل جدا
ما قلت لك قبل كده
تحياتي

مدحت محمد said...

ان شاء الله هعمل محافظتى دولة واستقل عن مصر

محمد عبد الغفار said...

التفسير بسيط خالص

بدل ماكان فى القاهرة والجيزة مدريتين امن فقط

هيبقوا اربعة

بس خلاص

Che_wildwing said...

والله انا كمان عندي البتاع التدوينى ده
من ساعة الاضراب وانا مضروب خالص
بس يارب الاضراب التانى يعمل حاجة
مع الاغنية اللى اختارناها "اللى بالى بالك"
ونعمل شغل بقى والدنيا تزهزه بقى

أما بخصوص موضوع المحافظتين
فبالظبط زي ما الاستاذ محمد عبد الغفار قال
مديريات أمن بزيادة
والعب ياعادلى

يا مراكبي said...

أما إننا شعب جاحد صحيح .. الراجل بيقول إن ده هيسهم في دفع عملية التنمية البشرية والاقتصادية

ونيجي إحنا نوقف الكلام ده؟

ألا صحيح .. هي عملية التنمية البشرية والاقتصادية دي كانت بتتعمل في أي مستشفى؟ مش دي اللي كانت في العناية المركزة؟

آفاق الحرية said...

السلام عليكم
هو طبعا كلما كانت المساحة الجغرافية اقل كلما كانت الخدمات المتوافرة افضل
لكن طبعا ابتسمي انت في مصر
هههههههههه

قلم جاف said...

أصبحت القاهرة بلا ظهير صحراوي..وبالتالي سيصعب عليها التمدد لتتسع للأعداد الهائلة التي ستسكنها..خطأ فادح آخر يتكرر وسبق أن تكرر في مدن مصرية كبيرة منها المنصورة على سبيل المثال..

أن يحدث مثل هذا الخطأ في مدينة هي الأكبر في مصر ، محافظة هي الأكبر من حيث تعداد السكان (فالقاهرة محافظة مدينة) وفي العاصمة فهذه مشكلة..

Mohamed Fouad said...

الف مبروك يا بيلا احلامك اوامر تم صباح اليوم تحويل شارعكم الى محافظة و صدر قرار جمهورى بتعيين السيد اللواء الدكتور الوزير حافظ المحافظ محافظآ للشارع و تعيين 23000 سكرتيرآ عامآ 780 نائب محافظ
اما كشك العيش المطلوب فتعذر توفيره