Thursday, September 13, 2007

في الأول من رمضان


كل عام وأنتم جميعا بخير وصحة وسعادة

كنت أفكر في كتابة ذكريات رمضانية
ولكن ماحدث اليوم جعلني أغير رأيي

يبدو أن تهنئة الحكومة بقدوم رمضان أخذت شكلا مختلفاً هذا العام فقررت أن تكمل علينا البهجة بهذا الحدث

سجن 4 رؤساء تحرير صحف مصرية مستقلة بتهمة سبَ مبارك وابنه

يحدث هذا فيما ينتظر إبراهيم عيسى التكييف القانوني للتهم التي تطبخها له الحكومة على نار هادية وتسبكها بتسبيكة الاشاعة اياها التي قلبت مصر راساً على عقب وكشفت عوار الجميع

مابين اعلام حكومي منافق يتصدر سدنته قائمة المدافعين عن القوانين المقيدة للحريات وإعلام مستقل يسعى ليصل صوته لنا دون تشويش وتحريف.

ومن يتفق أو يختلف مع إبراهيم عيسى لايقبل باي حال حبس حرية الصحافة لانها تعني ببساطة شديدة القضاء على البقية الباقية لنا من هامش حرية ضعيف نتشبث به جميعاً.

هل مازال النظام على حاله وسيطلع علينا مطبليه ومهلليه ليتحدثوا عن الحرية التي نرفل فيها والعهد الذي لم يُقصف فيه قلم ولم يُسجن فيه راي !!!!

حسبنا الله ونعم الوكيل

الغريب ان تهمة تكدير الصفو العام او السلم العام حسب الاحوال عادت لتطفو على سطح حياتنا الراكدة ولتذكرنا بمصير كل من يفتح فمه في هذا البلد حتى ان الذهاب لطبيب الاسنان سيكون فعل ينبغي إجتنابه.

والمتابع للتهم العبثية الموجهة لابراهيم عيسى سيقع على قفاه من الضحك لشدة سذاجة التهم وغرابتها في الوقت نفسه

فهو متهم ليس بتكدير الصفو والسلم العام فقط ولكن متهم ايضاً بهبوط البورصة وسحب ملايين منها بسبب الإشاعة اياها !!!

ومن عندي اقول أن التكييف القانوني للتهم الموجهة لابراهيم عيسى غير دقيق لانهم نسوا أن

ابراهيم عيسى هو سبب كل كوارثنا القومية

دي مش محتاجة فتاكة ولا يحزنون

هو السبب في ارتفاع اسعار السلع الغذائية كلها وارتفاع اسعار كل حاجة ممكن تطالها ايدينا

وهو اللى نشر انفلونزا الطيور بتصرفاته الحمقاء ومقالاته الناشرة للفيروسات

وهو السبب في قلة عقل ايمن نور يرشح نفسه امام السيد الرئيس

وهو السبب في دخول محمد حجازي للمسيحية علشان يسيب الدين الاسلامي لابراهيم عيسى براحته

يعني لو دورتم ح تلاقوا ابراهيم عيسى هو السبب في حادث قطار الصعيد
وغرق العبارة
والسبب في احداث سبتمبر

وكل البلاوي دي

وهو كمان السبب في غزو امريكا للعراق علشان امريكا كانت بتدور على مقال مدمر شامل من مقالات ابراهيم عيسى

صراحة بقى ابراهيم عيسى السبب في لخبطة كل حياتنا

مايحدث من مهازل وطريقة الحكومة في معالجتها يدل على أن القرار قد صدر منذ فترة بتربية ابراهيم عيسى وغلق الدستور

وبالمرة باقي الصحفيين المشاغبين امثاله يتربوا

وهو خير وبركة برضه واحنا داخلين على ايام مفترجة مطلوب فيها برضه اشاعة جو من السلام والوئام

علشان كده كلنا في حس واحد لازم نهتف باسم القرار الحكيم الذي سيخلصنا من المفتري ابراهيم عيسى سبب كل كوارثنا القومية

يمكن النيل يرجع يفيض وتتحل ازمة المية

يمكن الكهربا ترخص

يمكن المجاري تبطل تطفح

يمكن
ويمكن
ويمكن

حاجات كتيرة قوي حلوة ح تحصل لو ابراهيم عيسى اختفى

جاتكم القرف عالم غبية صحيح

مش مقدرين سهر الحكومة على راحتكم

شعب ياكل وينكر

الطبخة مترتب لها منذ فترة

والغاية التخلص من ابراهيم عيسى لتأديب غيره

يعني عصفورين بدبشة واحدة

ابراهيم عيسى يترمي في السجن واي ابراهيم عيسى تاني يخاف ويكش

بالأمس على قناة الجزيرة في برنامج ماوراء الخبر ظل المدعو مجدي الدقاق ينعق كالغراب ويتباكي على حق المواطن والمحافظة عليه من الصاحفة التي تنهش لحمه

ونسى جنابه ان مرتزقة الصحافة من امثال المدعو كرم جبر والقط والتاني بتاع الجمهورية ده شغالين اصلا على نهش لحم المواطنين ومن قبلهم المبتز الاكبر سفيه رجب الذي كان يفرض اتاوات على مخاليق ربنا والا يمسح بيهم بلاط صاحبة الجلالة

وماموضوع الممثل المحترم عبد العزيز مخيون ببعيد عندما انطلقت كلاب الصحافة تنهش في لحمه وعرض زوجته كقرصة أذن حتى يخاف غيره ممكن يفكرون في الحديث في الشأن العام بما ينفع المواطنين

هذه الصحافة التي يمثلها كرم جبر وامثاله لاحاجة لنا بها ولانريدها

هم يريدون تكميم افواه الجميع

وهم من اطلق الشائعة كجس نبض واهو بالمرة يتم تمرير ارتفاع الاسعار في غفلة من الشعب الغافل الذي ماأن يفيق من غفلة حتى تعاجله ضربه تجعله غافيا لبعض الوقت

رمضان كريم
وربنا يطول عمر الريس

ويقصف اجلنا كلنا علشان يرتاحوا


26 comments:

يا مراكبي said...

أنا معاكي

جتنا البلاوي .. ملينا البلد

ناكل وننكر بصحيح

Bella said...

يامراكبي

مرحبا بك

كل سنة وانت طيب

احنا فعلا ملينا البلد ومش بس كده
وكمان جتتنا منحسة وبناكل وننكر

يعني مش كفاية الجهد المبذول لراحتنا واسعادنا

لا وننكش ورا الناس ونقعد نطلع عليهم اشاعات ونرددها كمان

اهو بقى القلة المندسة دي المتهمة بتكدير الصفو العام ستكون عبرة لكل من لايعتبر

خلينا نتربى بقى مش كويس ابدا نفضل بالاخلاق دي كتير

حاجة تنقط صراحة

انت لو كنت شفت حلقة ماوراء الخبر وشفت مجدي الدقاق وهو بيتكلم كنت حسيت انك عايز تجره من رقبته وتطلعه برة الشاشة وتخنقه براحتك

العالم الجبلات دي مش عارفة بيجيبوهم منين

شخص جلده سميك بشكل غير طبيعي

عدى النهار said...

كل سنة وإنتى طيبة

منهم لله
click

مراقب مصري said...

يا بنتي ما عادل حمودة قالها النهاردة
دا ياميش رمضان الحكومة بتظبط بيه الصحفيين... وأحكام الحبس دي غزل عفيف بين الحكومة والصحفيين... هو مش عفيف أوي وممكن يندرج تحت بند التحرش بس قشطة شغال يعني... ياميش رمضان بقى!!

مش قلت لك يا بنتي رمضان كريم أوي أوي
والنظام أكرم كمان وكمان

وسلمي لي على أبو لهب

غمض عينيك said...

وياريتها جت على ابراهيم عيسى بس...دي طالت كل اللي جابوا في سيرة الموضوع
يانهار ابيض..انا بجد مكنتش متخيل انها ممكن توصل للدرجه دي

بجد بجد خلاص الموضوع سخف اوي اوي
انا رأيي انهم يخصخصونا عشان يخلصوا منا طالما تاعبينهم اوي كده

تحياتي ليكي يا بيلا
محمد سمير

Bella said...

عدى النهار

كل سنة وانت طيب ورمضان كريم

الدعاء اللى بعته ده تحفة جدا

هههههههههههه

Bella said...

مينا ذكري

مرحبا بك

والله الغزل بين الحكومة والصحفيين مش باينه عفيف خالص

لكن تفوح منه رائحة غير مستحبة بالمرة خصوصا اذا تحدث احد صحفيي الحكومة او من يلف لفهم

وطبعا حرية الصحافة حرية عرفية تمسك بها الحكومة بخطوط حريرية وكلما ارادت شدت وكلما ارادت أرخت

والدور الآن على الشد

ربنا يستر
الايام القادمة واضح جدا لونها

Bella said...

غمض عينيك

مرحبا بك
وكل سنة وانت طيب ورمضان كريم

الحكم على الاربعة غير متعلق باشاعة مرض الرئيس

هذه قضية قديمة رفعها محامي مغمور تابع للحزب الوطني وتم دفعه لرفع القضية حتى تقول الحكومة ان هذه رده فعل مواطن عادي ولادخل للحكومة بالقضية

وطبعا التصعيد الحادث سيطال رؤوس الكثيرين والاربعة ليسوا الا بداية ومن سيفتح فمه سيلحق بهم

ربنا يرحمنا من قادم الايام

اما بقى حكاية خصخصتنا احنا فدي تمت من زمان قوي

انت ناسي ان المصريين بيتبهدلوا ويتهانوا في البلاد الشقيقة وحفاظاً على اواصر الاخوة بين الشقيقة الكبرى وشقيقاتها الصغيرين ايه يعني تعذيب كام مواطن على اهانة طابور غيره

كله فداء للاخوة

بلانيلة

محمد عبد الغفار said...

انا هسكت احسن

He and She said...

7aga te7zen. I never know that Adel 7ammodah is now the chief editor of Al Fagr. I was wondering where did that strong guy go after Al Ahram. I hope if anyone knows an online link to Alfagr news to send to me please. Very strong post Bella

Bella said...

Mohamed A. Ghaffar

كل سنة وانت طيب ورمضان كريم

السكوت لم يعد اختيار بل اصبح اجباري كأمتحانات الثانوية العامة
وحتى نجيب مجموع وندخل كلية عليها القيمة لازم نسكت اكتر

Bella said...

He & She

مرحبا اخي العزيز وكل سنة وانت طيب
رمضان كريم

هي فعلا مش بس حاجة تحزن لا دي حاجة تقهر
خلاص حتى المتنفس الوحيد لنا اصبح مهددا بالاغلاق ولم يعد لنا مكان نلجأ إليه ولم يعد هناك من يتحدث باسمنا إلا مارينز الصحافة الذين ينافقون ويداهنون ولو فوق جماجمنا ليحققوا مكاسب شخصية

وهذا هو موقع جريدة الفجر

http://www.elfagr.org/index.aspx

جوستيـن said...

معلشي بقي

كل سنه وانتي طيبه احسن

:)

Layla said...

حلوة قوي تهمة تكدير السلم العام

قلنا ميت مرة محدش يلعب على السلم عشان صاحب العمارة راجل عيان ومش بيحب الدوشة..سيبوه يرحل في سلام ولما ابنه يورث العمارة ابقى اعملوا اللي انتوا عايزينه

كل سنة وانتي طيبة

آه يـا دمــاغــي said...

bell الجميلة

ازيك اخبارك ايه

والله يا بنتى انا خايفة بكرة

يصرفوا الجرايد على البطاقة

وكل واحد على حسب المهنة حيدولوا الجرنال المناسب لثقافتة
وبعدين حنطلع كلنا شعب جاهل وحناخد ورق الجرايد عشان نلف فى بطاطااااااااااا

تحياتى يا قمر

الطائر الحزين said...

مش تنقى دعواتك كدة حلوة
كنا نعرف نؤمن عليها واحنا فى رمضان

He and She said...

Thank you bella

david santos said...

Very good posting, Bella!
thanks
have a good day.

Bella said...

جوستين

كل سنة وانت طيبة وربنا يكرمك يارب

Bella said...

Marvel

مرحبا بك وكل سنة وانت طيب

اللعب على السلم مزاج بقى لعلمك
حتى لو السلمة مكسورة فاللعب ممتع جدا

المشكلة بقى ان صاحب العمارة رش مية على السلم واي حد يفكر يطلع بيتزحلق وينزل على جدور رقبته

تصور بقى ابنه لما يورث العمارة ح يعمل في السكان ايه

هههههههههههههه

طبعا ح يهدها علشان يبني مكانها برج ويمشي السكان العرة اللى هم احنا طبعا لاننا لانناسب سكن الابراج

Bella said...

آه يادماغي

مرحبا ياعزيزتي وكل سنة وانت طيبة

حكاية صرف الجرايد ع المرتب دي ح تبقى مشكلة صراحة لاني مقاطعة الجرايد الحكومية من فترة وماعنديش اي استعداد المس اي جريدة فيهم

فتصوري بقى لما ييجي اليوم اللى كلنا نبقى مجبرين ناخدها ع المرتب

ههههههههههههه
دي ح تبقى مسخرة

وممكن مايكونش فيه فكة الصراف يدينا صفحتين من جريدة الجمهورية بدل الفكرة

ههههههههههههه

Bella said...

الطائر الحزين

كل سنة وانت طيب اخي العزيز

الحقيقة حبيت اقول الدعاء اللى هم بيدعوه علينا اصلا علشان اوفر عليهم الجهد والتعب

احنا رعايا طيبين ونحب نخدم

هههههههههههه

Bella said...

He & She

مرحبا اخي العزيز

العفو واي خدمة

لاتتردد في السؤال عن اي شيئ ولو في استطاعتي تأكد اني لايمكن اتأخر

تحياتي وكل سنة وانت طيب

Bella said...

david santos

Thank you very much & have a good day too.

ملك الكبدة said...

على رأي عمونا الكبير أوي احمد فؤاد نجم تهمة تكدير الأمن العام دي تمييز عنصري ليييييييييييييه؟
لإن الأمن العام على طول بيكدرنا و دي موش تهمة إشمعنى إحنا بقى

عموما لكي الله يا مصر و حسبنا الله و نعم الوكيل فيمن لا يريدون الخير لهذا الوطن ده تعليقي عالموضوع

لو وافقتي طبعا يشرفني نعمل باك لينك لبعض و اللي انا مستغربله انتي عرفتي عنوان مدونتي المتواضعة منين ده انا اللي عارفينني قليلين قوي
عموما شرفتيني بالزيارة و أتمنى تكرريها و أتمنى اشوف تعليقاتك على باقي مواضيعي

Alexandrian far away said...

جميل أننا نعزف وكثيرون نفس اللحن
ربما يصم اذانهم
ربما يوقظ النيام
ربما يحمينا من الأصابة بالضغط والقرحه
تحياتي