Saturday, January 5, 2008

العلبة فيها فيييييل


هل تتذكرون الفيلم العبقري سر طاقية الاخفاء بطولة الرائع عبد المنعم إبراهيم في دور عصفور المندوب الصحفي الفاشل في عمله والذي يتقدم لزميلته في العمل والتي يحبها فترفضه امها بسبب فشله.
وينافسه في حبها توفيق الدقن ابن خالة زهرة العلا والذي يعمل صائغ ويرغب في الزواج من ابنة خالته ويسخر من عصفور ويهينه في الطالعة والنازلة حتى أنه ابتكر له وسيلة عبقرية لاهانته بأن فتح له علبة بها خاتم وسأله
العلبة فيها ايه؟

فرد عصفور
العلبة فيها خاتم

فماكان من الصائغ الا ان نزل على وجه عصفور بالصفعات وسط ذهول الثاني
وكرر على مسامعه السؤال ولكن بحدة أكثر
باقول لك العلبة فيها ايه؟؟؟؟؟

فرد عصفور متحسساً خده
انت عايزها فيها ايه؟

فقال الصائغ بمكر مصاحب للصفعات المعتادة
العلبة فيها فييييل

ووسط ذهول عصفور كرر عليه السؤال

فأمن عصفور على كلام الصائغ حتى يتجنب المزيد من الصفعات
فيها فيييييل

هذا بالضبط ماتفعله معنا الحكومة
تصرح تصريحات
ثم يعقبها صفعات
وتظهر لنا علبة الفيييييييل
وإتقاء لشر الصفعات نبتلع الاهانة تلو الاهانة ونؤمن على الكلام ونؤكد ان العلبة فيها فيييييييل
والامثلة على التصريحات المضروبة اكثر من ان يحصيها مواطن لايعترف بأهمية وجود الفيل في العلبة
فإذا أردت السلامة عزيزي المواطن فعليك التحلي بقدر كبير من سعة الصدر واتساع المخيلة حتى تهضم التصريحات المتعلقة بعدم المساس بالدعم وخصوصا دعم المواد البترولية والذي مالبثت الحكومة أن لحسته وصفعتنا جميعا بصفعة على الخد اعقبتها صفعة اقوى على القفا أعزكم الله ورفعت سعر المازوت بنسبة 100 %.

سأترك المجال لخيالكم الخصب لتخيل السلع التي سترتفع تأثراً برفع سعر المازت وحده !!!!

واترك لكم ايضاً البحث وراء كل قرار صدر في الفترة الاخيرة في غفلة من الجميع !!!

وقد تركت الحكومة العنان لاصحاب المنافع ليرفعوا الاسعار كيفما تراءى لهم حيث رفع احمد عز سعر طن الحديد وحده 250 جنية مرة واحدة ليرتفع سعره إلي 4050 ضارباً عرض الحائط بمصالح المواطنين شأنه في ذلك شأن الحكومة التي سمحت له باحتكار سلعة هامة كحديد التسليح !!!

نحن في شهر يناير
شهر له في ذاكرة المصريين مكانة لاتدانيها مكانة حيث انتفض يوماً عندما ارتفعت اسعار بعض السلع مرة واحدة
فهل الشعب المصري ايام انتفاضة يناير غير الشعب الحالي ؟؟؟

وفي الوقت الذي تتحدث فيه الحكومة عن مشاكلها المادية والتي بسببها قررت التخفيف عن الميزانية برفع الدعم عن بعض السلع نقرأ عن استجواب في مجلس الشعب بسبب إهدار التليفزيون ل 20 مليون جنية في رعاية الفنانة آمال ماهر !!!!

وللفرنسيين مثل شهير ينطبق علينا تماماً الشعوب تستحق حكامها

فنحن بالفعل نستحق مانحن فيه وينتظرنا المزيد

31 comments:

عدى النهار said...

كان يناير 77 وعندما طٌلب من الجمسى إنزال الجيش للسيطرة على الشارع رفض وطلب إلغاء القرارات التى أدت بالناس للتظاهر وبعد ذلك إذا لم تتوقف المظاهرات سيسمح بإنزال الجيش

الأمر المدهش الذى يستحق الدراسة - لدنائته - هو كيفية جعل ماضى وحاضر وربما مستقبل المصريين فيه يناير واحد فقط

عصفور المدينة said...

طب انت جبتي سيرة فرنسا ساركوزي ليه

النقلة من الخاتم للفيل غير متقبلة لدى الشعب


لكن النقلة التدريجية وفرق تسد مقبولة وتنسى وهذا أمر مدروس تماما
رفع سعر الجاز لا النبزين 90 وسيب 80 ثم المازوت وهكذا

Bella said...

عدى النهار

مرحبا بك

لم يتحرك الجيش لقمع الشعب وقتها لأن الحال كان غير الحال
فقد تجرك الجيش لقمع اهالي القرصاية في زمننا الاغبر هذا

يبدو ان شهر يناير فيه سحر غريب يجتذب الحكومات المتعاقبة لتفاجأنا فيه بقرارات من تحت لتحت

ولكن يبقى السؤال معلقاً
كيف سيتصرف سكان يناير 2008؟؟

هل سعترفون بوجود الفيل ام سيحطمون العلبة فوق أم رأس من يمسكها !!!

Bella said...

عصفور المدينة

مرحبا بك

فرنسا ساركوزي كنت انوى الكتابة عنها ولكني اكتأبت لعدة ايام
ولكن احنا لسه فيها
فمازالت توابع الساركوزية تضرب بعنف

هههههههههه

طبعا الحكومة تعلمت من ثورة جياع يناير 77 وتفتق ذهن عباقرة الاقتصاد بعدها لرفع الاسعار بالتدريج ودون ان يشعر المواطنين الذين اصابتهم اعراض الصمم والبكم وكل الاعراض التي لاتسمح لهم برفض اي قرار او حتى مجرد ابداء الرأي فيه
فصار رفع الاسعار من طبائع الامور واصبحت الناس مصابة بزهايمر حاد يجعلها تنسى كل المصائب التي تنهال عليها من كل جانب
وليس هذا فحسب بل اصبح الناس مقتنعون بأن ارتفاع الاسعار ارتفاع عالمي واحنا مش لوحدنا اللى عندنا غلاء
ده حتى امريكا فيها جعانين
على راي واحد مااعرفوش دايما يردد المقولة دي

لسه شايفة خبر من شوية على المصري اليوم ان سعر طن الحديد ارتفع 400 جنية بعد رفع عز له

يعني دي بداية سلسلة ارتفاع الاسعار

والباقي في الطريق

القادم اسوأ

بنت القمر said...

عزيزتي بيلا
اولا احييك علي اللقصيده بتاعه جويده
كان نفسي انزلها بوست بس السايت كان مهنج وقلت اكيد الكل ها ينزلها دي رهيبه
فوجئت ان محدش نزلها غيرك
يبدو اني انا بس اللي بهرتني
او اننا لم نعد في زمن القصائد
*****************
تانيا بصي هو في ريحه حاجه غريبه في البلد
اة والله يبدو كده
اعتقد ان الامور وصلت لنهايتها وفاض نقط قليله والكوب يطفح شيزوفرنيا اخلاقيه واجتماعيه حاده
هوة طبقيه رهيبه
غلا
فساد اجتماعي وسياسي
تطرف من جهه وانحلال من جهه
كده الامور ماشيه ناحيه الانهيار
صدقيني مسأله وقت
وتيجي علي اهون سبب

الطائر الحزين said...

اعتقد انه قرب اليوم الذي يخرج من يقول فيه

انا ربك الأعلى وتكون النهاية


تحياتى

بجد حزين

خمسة فضفضة said...

السلام عليكم ورحمة الله وبركاته

ربنا يسترها علينا ويعدي الايام الجايه علي خير
لان خلاص شكل الحكايه وصلت لاخرها وقربوا ينزلوا كلمة النهاية علي تترات الفيلم اللي في آخره الشعب هوه اللي هايمسك العلبه للحكومه ويقولها العلبه دي فيها ايه
وعلي الله بقي تقول خاتم واحنا نوريها

ibn_abdel_aziz said...

مش يمكن الناس اقتنعت ان في العلبة فيييييل بجد؟

علي فكرة لازلت اسعار البنزين مثلا في مصر من أخفض الاسعار في العالم
حتي وهي تزيد بشكل تدريجي 30 قرشا او تقل او تزيد كل كام شهر

سعر اللتر في مصر حوالي 130 قرشا
وهو سعر متواضع جدا

هناك زيادات أسعار قهرية وهناك نصب واحتيال
والمشكلة اننا مش عارفين الفرق لاننا لا نصدق احدا

ihapoof said...
This comment has been removed by the author.
ihapoof said...

قادر اللى خد مننا الفيل يرجعهولنا :)

AHMED SAMIR said...

طبعا احنا نستحق حكامنا..ونستحق اسوأ منهم بكتير
شعب لا يغضب...لا يغضب ...لا يغضب
ناقص ايه علشان يثور
فقر بطالة فساد اذلال فساد سلب نهب
مفيش فايدة

بنت أبيها said...

فنحن بالفعل نستحق مانحن فيه وينتظرنا المزيد


فعلا

بناخد على قفانا وبنسكت .. وبعدين ناخد على دماغنا وبنسكت تانى

مشكلتنا السكوت

والسكوت الجماعى كمان

محمد عبد الغفار said...

لأ فيها خاتم

Bella said...

بنت القمر

مرحبا بك

القصيدة ناس كتيرة جدا اهتمت بها ولكن ربما لاتعرفي مدوناتهم
عن نفسي اخدت القصيدة مكتوبة بالكامل كده من مدونة استأذنت صاحبها وسمح لي بنقلها
وفيه مدونات تانية حاطة الفيديو من برنامج العاشرة مساء لالقاء فاروق جويدة نفسه لها

القصيدة مؤلمة فعلا وتصيب من يسمعها بكآبة غير عادية وربما هذا يكون احد اسباب صمت الناس بعد سماعها وليس عدم اهتمام منهم

اما بالنسبة للكوب الذي فاض وقرب الهاوية
فصراحة لااعرف اي تفسير لهذا الصمت الغريب من الناس رغم كم المصائب الذي ينزل فوق رؤوس الجميع خاصة وان نسبة الفقر في إزدياد

ربنا يهون

تحياتي

Bella said...

الطائر الحزين

مرحبا بك

وانا ايضا حزينة
خاصة اني المس كل يوم سلبية غير عادية من الناس وحتى لو فكرت توعيهم وتفهمهم تجدهم يصمون آذانهم وكأنهم لايريدون ان يعرفوا

إن الله لايغير مابقوم حتى يغيروا مابأنفسهم

تحياتي

Bella said...

خمسة فضفضة

مرحبا بك

ربنا يسمع منك والناس اصلا قبل ماتمسك العلبة للحكومة تقتنع بأن العلبة فيها خاتم الاول لان يبدو ان الناس بالفعل اقتنعت بوجود الفيل وبدأوا يتصرفوا بناء على هذه الحقيقة

تحياتي

Bella said...

ibn_abdel_aziz

مرحبا بك

يبدو فعلا ان الناس مقتنعة ان العلبة فيها فيل
او مقتنعة انه لاجدوى من المجاهرة بأن العلبة فيها خاتم
فاكرينها شطارة انهم يوافقوا على وجود الفيل

صحيح سعر البنزين في مصر من اقل الاسعار عالميا ولكن قارن الدخول في مصر بدخول العالم الآخر لتعرف انه يعتبر في مصر بالنسبة لدخول الناس مرتفع نسبيا

هذا بالاضافة لارتفاع اسعار اشياء اخرى كسعر الزيت والتشحيم وغيرها من الامور التي لاغنى عنها وفي نفس الوقت لايشعر بها الناس بسرعة كالبنزين

فضلا عن قيامهم باضافة اشياء للبنزين تجعل سرعة احتراقه عالية فتجد نفسك تستهلك كمية بنزين اعلى للقيام بنفس المشوار

يعني النصب وتفتيش الجيوب له طرق كثيرة في مصر والحقيقة الناس تتفنن في تقليب جيوب بعض

قلة ضمير

تحياتي

Bella said...

ihapoof

مرحبا بك

الفيل في العلبة قدامك اهو

العلبة فيها ايه؟؟

هههههههههههههه

Bella said...

A.SAMIR

مرحبا بك

الحقيقة نفسي احط ايدي على اللى فهم الناس ان الصبر والتسامح ميزة في الشعوب فوصلنا لهذه الدرجة من الخنوع والذل والاستكانة والناس متصورة انها بتعمل حاجة كويسة لما تستحمل كل ده

تحياتي

Bella said...

بنت ابيها

مرحبا بك

الحقيقة ان العيوب الجماعية هي مانجتمع عليه

فامر غريب فعلا ان تجتمع سلبيات في مجتمع ما وتنتشر بهذه الطريقة

المؤلم ان الناس بالفعل تتصرف منذ فترة على ان البلد ليست بلدهم ويبدو انهم صدقوا هذه الحكاية

طيب لو هي البلد مش بلدهم وسايبينها لغاية ماتخرب

ح يروحوا فين لما اللى اشتروها ييجوا يطردونا منها

ربنا يستر

تحياتي

Bella said...

Mohamed A. Ghaffar

مرحبا سي محمد

طيب بص كويس كده
يمكن تلاقي حاجة تانية غير الخاتم

ماهو فيه خاتم فعلا

فيل ولابس خاتم

هههههههههههه

Waleed Fareed said...

تشبيهك جميل وفعلا بس مش فيل ده قرد

DR.HAMAS said...

حسبنا الله و نعم الوكيل

كل كلامك عن مآسى يا أختنا

أنا لا أعرف متى سنغضب ؟؟

و هل دائما غضبنا سينحصر فى كلمات
و تنهيدات
و صيحات غضب
ثم لا يلبث يتلاشى

لا أدرى


د.حمــــاس

micheal said...

إنسي يناير 77 ده خالص يا بيلا...الشعب عمره حيتحرك الا بسبب مكشله زي بتاعه إسنا أو لان حسني عبد ربه حيروح من الاسماعيلي للاهلي
:)
أكتر من كده يبقي بتحلمي
تحياتي

شقاوة شعب said...

الناس فى يناير 77 انتفضت كلها مرة واحدة لان الحكومة رفعت الاسعار كلها مرة
لكن الحكومة انهاردة ماشية معانا ببطء
وبالتالى صحوة الناس برضه ماشية ببطء
لكن ده لا يمنع ان بقى فى صحوة وزيادة وعى فى الناس ...لاننا انهاردة بقينا نشوف كل يوم والتانى اضرابات هنا واعتصامات هنا
حتى الناس البسيطة بدات تشارك بحجة انها كدة كدة خربانة

استشرافى للمستقبل بيقولى ان فى يوم من الايام مسير كل الجهود المبعثرة دى تنتظم ووتتوحد
وساعتها هنشوف يناير 77 تانى بيكرر نفسه

تحياتى
شيماء

يا مراكبي said...

من مصادر موثوقة: دي بداية بس على فكرة

بيتنا القديم said...

"هذا بالضبط ماتفعله معنا الحكومة"
.
.
.
عزيزتي
من وجهة نظري اري اننا تخطينا مرحلة الصفع الي بلادة الوجه..وتخطت الحكومة الصفع ايضاً من شدة مللها للعبة!
تأكدت السلطة الحاكمة ان الشعب تم تحويله الي دمي ميتة لا حراك فيها
تؤمن بالآخر اللي هو الحكومة هنا..اما الآخر فيؤمن بتهميشها..القرارات قراراتهم هم..الاتفاقات اتفاقاتهم هم..حتي المعونات فلهم ولأولادهم وما تبقي فيوضع في حسباتهم لتأمين غدرة الزمن او الشيخوخة او الانقلاب هذا ان حدث...واشك
(:
العلبة
مافيهاش
فيييييل
العلبة
فيها
شعب مستخف
اطاع جلاده
وعبده
نحن شعب
كلما طغي
الباغي علينا
لعقنا الاقدام
هذه هي الحقيقة
عارية
لا كرامة للوطن
ولا مكانة للدين
اقول قولي هذا
واستغفر الله
لي ولكم
):
دمت بـ....تفاؤل
ان وجد!!

أحمد said...

اسمحيلى الأول احييكى على مدونتك الجميلة اللى من أجمل المدونات اللى الواحد متابعها من زمان .. ربنا يكرمك ويعزك , ودايما يعينك على كتابة كل ماهو مفيد يا بيلا

جميل التصور والاطار بتاع البوست نفسه
:))

الشعب محتاج طاقية اخفاء ترجعله ثقته فى نفسه , وتخيله يبطل خوووووووووف , ويقول بعلو صوته خاااااااااتم .. محتاج قوة ذاتية يحتمى بيها من الصفعات المتتالية , وتخيله يقول "لأ" بعلو صوته

غمض عينيك said...

وحتى لو قولتي خاتم
صدقيني هتلاقي ابتسامة عريضة
وشكرا سيدي المواطن
واللي عندك اعكلوا وهو بردوا فيل

Anonymous said...

هل ليس هناك شئ مضئ وسط هذا الركام الهائل من الكآبة ؟

واذا كان موجودا فلماذا لانتحدث عنه؟

To a friend said...

كلنا نظرنا لموضوع زيادة اسعار المازوت و البنزين بغضب و لم نفكر انها ربما تكون طريقة المسئولين (الحكيمة) في جعل الشعب يفكر في بدائل للطاقة

انا-صخصيا- باقترح نسيبنا من البنزين و مشتقاته و نبدع طرق جديدة لتسيير عرباتنا
يعني مثلا ليه ما نحطش مكان خزان البنزين حلة مية و تحتها شعلة و نمشي عربياتنا بالبخار؟؟ مش كده ارخص و احسن للبيئة؟؟

و لما المية تغلي نبقي مثلا نخترع عربيات تمشي بالفحم و الخشب؟ و لما يغلوا نبقي نمشي و هو اوفر الحلول
و لا ايه؟
:P