Friday, July 31, 2009

ياماجاري يامجاري


يبدو أن مياه المجاري والمسماه تجملاً بالصرف الصحي (وهو غير صحي بالمرة) تأبى إلا أن تشاركنا في كل شيئ بداية من محاصرة بيوت الناس حتى تحولت بعض الاحياء لفينيسيا ذات عبير خاص وأصبح القفز فوق قوالب الطوب من أهم الرياضات المعتمدة في هذه المناطق مروراً بتسربها لمياه الشرب حتى تكون أكثر حميمة مع عدد أكبر من المواطنين أنتهاءً بوصولها للخضروات والفواكه حتى تضمن الانتشار والوصول للجماهير العريضة من هذا الشعب الذي تهضم معدته الزلط كما يقولون في الاساطير القديمة !!!!

طالعت هذا التحقيق المفجع بكل المقاييس في صحيفة المصري اليوم عن كشف بالصور والوثائق لزرع مساحات شاسعة من الاراضي بالخضروات وريها بماء المجاري الخام كما تقول الصحيفة وأترك لكم الحكم بأنفسكم على مدى ماوصل إليه حالنا من تلوث بيئي وصل لمستويات غير مسبوقة في أي بلد تسعى لزيادة معدلات الانتحار الجماعي بين مواطنيها وتتفنن في طرق مبتكرة للابادة الجماعية فلم تكتفي بالحوادث والمبيدات المسرطنة والسحابة السوداء وغيرها من وسائل الابادة الجماعية حتى وصل بنا الحال لهذه الطرق

«المصري اليوم» تكشف: زراعة خضروات بمياه «المجارى الخام»..

«المصرى اليوم» تكشف بالصور والوثائق: خضروات بـ «المجارى الخام» فى زراعات «الصيف»..

****

تابعوا كذلك تعليقات القراء وردود أفعال الفلاحين الذين يستخدمون هذه المياه ولايرى البعض منهم غضاضة في الري بها

وياما جاري في هذا البلد يامجاري


10 comments:

Azza Moghazy said...

اول ما نبدى نقول نصلى على الرسول
بعدين نوضح ان الحدوتة دى مش جديدة
من كام سنة الاحرار مشكورة عملت تحقيق عن واقعة طبق الاصل فى عدد من قرى الفيوم مش قرية واحدة

وطبعا طبعا الفيوم فيها ذات نفس المشكلة وبتصدرها للقاهرة والجيزة فى صورة خضروات فيها " خيرات الله " نظرا لان كميات الاراضى اللى اشتراها يوسف والى الله يحرق مطرح ماهو قاعد ومعاه حبايبه هى اللى اتمدتلها خطوط المية من النيل وحدها
بتروى الاف الاف فدادينهم هناك
وحتى الناس اللى خطوط المية ماشية فارضهم مش من حقهم يرووا منها

فالنتيجة هى انتشار الفيلاريا وغيرها من الخيرات الناتجة عن التعامل مع المياه الملوثة ومياه الصرف فواحد من اهم المحافظات الزراعية فمصر
واللى مش محرومة خلقة ربنا من مية النيل بس محرومة خلقة يوسف والى

وانتى ازيك كدة يا بيللا هانم؟؟

Bella said...

اهلا عزة هانم

تفتكري يعني بعد الفواجع اللى بنشوفها دي ح يبقى حالي ازاي

هههههههههههههههه

انا عارفة ان حكاية ري الخضروات بمياه المجاري ليست جديدة ولكني لم اكن اتصور انها منتشرة على مساحات شاسعة
واعرف ايضا ان هناك مزارع سمكية تتغذي على هذه الخيرات

يعني الواحد مش عارف يلاقيها منين ولا منين

واذكر اني كنت في رحلة عمل في ضواحي القاهرة وعلق احد الاجانب على كميات البصل غير العادية التي تنقلها العربات ورد سائق العربة التي تقلنا بأن الشعب من حقه ياكل من خيرات البلد فعلقت على كلامه بان خيرات البلد التي يعتبرها خيرات ماهي الا سموم متحركة رفضتها الدول التي كانت تستورد من مصر لتجاوزها النسب المسموح بها في كمية المبيدات بخلاف الملوثات الاخرى واصبحت المنتجات الزراعية المصرية سيئة السمعة في الدول التي تخاف على حياة مواطنيها

فما كان من السائق وياللعجب الا ان كرر ان الناس محرومة ومش مشكلة الملوثات والمبيدات المهم ان يجدوا الطعام !!!!

Unknown said...

طب حضرتك قريتى تحقيق القليوبية و قرية البرادعة عن التيفود
بجد حسبى الله و نعم الوكيل
معلش اصل التقريرين لا ينفصلان عن بعض


و الأرض لو عطشانة نجيب مجارى بيها نرويها

Bella said...

اهلا بدراوي

ايوة قريت وشفت كمان تصريحات وزير الصحة بعد ظهور حالات الكوليرا لما قال بمنتهي البساطة تلاقيهم شربوا من مية اختلطت بمياه المجاري

وكان الامر عادي وبسيط

Unknown said...

السلام عليكم

يعنى مش عارف أقول إيه
بس بصراحة
منتظرين إيه من دولة
يحكمها الحزب الوطنى

المشكلة مبقتش مشكلة ناس و وعى والكلام بتاع الأعلام الفاسد بتاعنا
المشكلة مشكلة إدارة وتخطيط
وهى دى المشكلة من زمااان


واللى يعيش ياما يشوف

Bella said...

اهلا بلال

انا عارفة ان المشكلة مش مشكلة الناس لوحدهم خاصة في مشكلة الري لان مش معقول يعني نفترض ان المياه العادية متاحة وهم قرروا يغير ويستخدموا الري بالمجاري
اكيد طبعا لان الدولة لم تمدهم بمياه الري لانها حولتها لاستخدامات اخرى كالعادة

بس فعلا امر لايجب السكوت عليه خاصة وهناك تعمد لاستمرار هذه المهازل البيئية

مـحـمـد مـفـيـد said...

فعلاً ياما جاري
:(
مره كنت في حديقه الفسطاط
وقلت اصلي علي النجيله علشان مفيش مسجد وانا ساجد
ريحه النجيله
ايه ؟
مش هقولك
خرجت من الصلاه لان لا يجوز
فقالي واحد
ياعم ده قرفان وانت بتصلي عليهاعلشان بيسقوا بيها الزرع
انا اعمل ايه اللي ساكن ورا الجنينه وبشربها ليل نهار

Die said...

لسه شايف التقرير امبارح تحفةةةةة
بسم الله ماشاء الله

حاجه تفرح
تخلي الواحد يبقي عنده نفس للاكل
و الشرب و ((الانتاج)) علشان نساعد العالم دول يعني

الطمممممممممممممممممممم

.................................
و النبي لو ينفع تشرفوا الواحد ف المدونة و تنشروها يعني و تقولو رايكم ايه يبقي متشكرين منكم قوي http://balckrain.blogspot.com/

محمد said...

الناس تشرب مياه الصرف, ونتعجب من الري بها !!

فرعون كان يقول: "هذه الأنهار تجري من تحتي".. وفرعون زماننا حري به أن يقول: "هذه المجاري تجري من تحتي".. وستجري المجاري من فوقه كما جرت الأنهار من فوق السابق

Sarah said...

شوفت بعينى محدش قالى

ف طريق طنطا المنصورة
تتعجبى ... وتتأرفى وتتقذذى واى كلمى غريبه وعجيبه تتقال على بلد حالها ميؤس منه على رايها ()
عربيات المجارى بتحط الميه بالظبط بالظبط ف قنايا الزرع والصور عمرها ماتوصف الواقع... العين بتشوف وانفك بيشم مجارى بيتسقى بيها اكلنا

مش عارفه
ياعنى منها واليها
وبعدين يقولوا كوارث وموارث بتحصل لمصر ماهو من ايه

مش محتاجين تحقيق ف الدستور والمصرى
ومهما اتكلمنا المصرى دايما مصرى ومش هيتغير
الا على اعتاب زمن عمره ماهيجى