Friday, August 3, 2007

وسع منك له - اللجنة جاية


نحن بلد تنفرد بتشكيل لجان تنبثق عنها لجان تنعقد وتنفض اجتماعاتها ولاتسفر عن شيئ اللهم الا الملايين التي توزع على المحاسيب والشيئ لزوم الشيئ.

هذا الكلام ليس تجنيا على الطريقة المصرية العبقرية في تشكيل اللجان الحلزونية
فكلما اردنا عمل شيئ شكلنا له لجنة تنعقد لتوصي بتوصيات عظيمة تشكل لها لجنة منبثقة لمناقشة توصيات اللجنة السابقة وهكذا يظل الانعقاد والانبثاق شيمة من شيم لجاننا التي دائما ماتسفر عن صفر كبير يكلفنا دم قلبنا ويكون فيه الشفاء من كل داء.

عندما قرات هذا الخبر تذكر صفر المونديال العظيم الذي نلناه بجهود مضنية وبملايين كثيرة
يعني صفر متكلف مش زي اي صفر
وتذكرت اللجان التي انعقدت وانفضت وسافرت وتسوقت وكلفتنا الغالي والنفيس حتى جرجرتنا في المحاكم الدولية بسبب تصريحات أحد اعضاء لجنة الصفر الكبير.

هذه الايام ياسادة يتم تشكيل لجنة للترويج للسيد فاروق حسني وزير الثقافة العتيق وهو شاب في نفس الوقت ولا تسألوني كيف !!!
وترويج لايه بقى اسم الله على مقامكم

ترويج لترشيح سيادته لرئاسة اليونسكو

إمسك نفسك منك لها له اللجنة آتية لامحالة والملايين ستصرف لامحالة ايضاً
والصفر ايضا قادم لامحالة

كله يروح بيتهم عايزين نرش قدام المحل

الحقيقة ولو اني لاأشعر أنه يستحق أن يشغل هذا المنصب الرفيع الا أنني اتمنى ان يفوز بهذا المنصب ليس لجدارته لاسمح الله ولكن كي يحل عن سمانا ونتنفس بعيداً عن لوحاته السيريالية ومعارضه الفنية وطلعته البهية وتصريحاته السيليكونية وتوجهاته الطليعية.


16 comments:

الطائر الحزين said...

على رأى اللى بيقول يعنى هيكون رئيس مراجيح مولد النبى يا شيخة خلية يروح ويبعد عنا شوية اصل الفلوس دى لازم تروح لاصحاب نصيبها

وتيجى اللجنة ولا متجيش الفلوس هتنصرف

تحياتى

Bella said...

الطائر الحزين

مرحبا بك

منور

والله يااخي هو رئيس مراجيح مولد الثقافة ولا،ه طول شويتين تلاتة اربعة قول عشرين شوية في المنصب لدرجة اني نسيت اسم وزير الثقافة الذي سبقه في احتلال المنصب

وباتمنى انه يروح مولد اليونسكو علشان نرتح منه هنا صراحة
لكن ليس لكفاءته في إدارة المراجيح

بالعكس

المراجيح شافت على ايديه ايام اسود من قرن الخروب
حتى الآثار تم تهريب جزء كبير منها في عهده والفساد في وزارة المراجيح للركب

وطبعا لن نحلم بمن هو افضل منه لاننا لم نتعود منذ فترة طويلة ان يرحل شخص وياتي من هو افضل

بل دائما القادم اسوأ

ولكن رغبة بريئة في التغيير ودفعاً للملل لاأكثر ولا اقل

وعلى رايك خللى اللجنة تنعقد والعالم تسلك لها قرشين

اهي فرصة وسبوبة

Anonymous said...

هو يعني ايه وزير ثقافة ؟!؟!؟!؟!؟!؟!؟
و بيعمل ايه ؟؟؟

Bella said...

Mohamed

اهلا يامحمد

سؤالك صعب قوي ومحتاج دروس خصوصية علشان اعرف اجاوب عليه

همممممممممم
وزير ثقافة
وزير ثقافة

هي حاجة كده بيقولوا عليها مفروض موجودة في البلاد اللى هي الثقافة يعني
وبيجيبوا واحد فنان وشاب وشعره دايما أسود
وبيعملوه وزير عليها

قوووووم ايه

يروح الوزير ده بقى عامل شوية معارض يمثل مصر بيهم وكأن البلد مافيهاش فنانين تشكيليين غيره
ويقوم بايع لوحاته السيريالية اللى محتاجة قرون علشان الرعاع والدهماء اللى زي حالاتي يفهموها بىلاف الدولارات

ويفضل بقى رايح جاي يمثل مصر في المحافل
ومحفل جاي ومحفل رايح
وباقي الفنانين قاعدين مش لاقيين ولا محفل يوحد الله يعرضوا مواهبهم فيه

ده بفرض طبعا انهم اصلا موهوبين
لان الوزير الفنان شافط كل الموهبة الفنية من مصر كلها ومخزنها عنده
وباقي الفنانين فقيري الموهبة عايشين على فتات الموهبة المتبقي من السيد الوزير الفنان

ده طبعا فيما يخص المعارض

ولو ح نتكلم عن الجولات السياحية فده أمر محتاج كتالوجات
يوووووووووه
قصدي كتيبات علشان نشرح جهود سيادته في عمل معارض ونقل آثارنا للخارج ومااعرفش ليه نقلها للخارج

ولم يفلح سعادته خلال احتلاله الطويل لوزارة الثقافة في استرداد آثارنا التي سُرقت وتعرص عيني عينك في متاحف لندن وبرلين

وجزء مهم من عمل وزير الثقافة هو اقامة الاحتفاليات الكبيرة قوي خالص جدا زي احتفالية الألفية اللى جاب لها المطرب العالمي المعروف الذي لايشق له غبار ميشيل جار ولا مش فاكرة اسمه ايه

المهم ان السيد المطرب العبقري هبر مبلغ وقدره كان ممكن ننظم بيه كمية احتفاليات تكفينا احنا والبلاد اللى حوالينا المحرومين من الاحتفاليات ويتبقى مبلغ صغير نعمل بيه احتفاليتين تلاتة صغننين للاطفال

وهو بلا فخر ولا منازع صاحب فكرة الحملة القومية للتبرع لانشاء متحف كبير للآثار

انا طبعا ليس عندي اي حساسية ضد ثقافة التبرع والتعاون بين المواطنين وبعضهم البعض

لكن ان تتخلى الدولة عن دورها وتحيل كل شيئ للمواطنين ليتبرعوا بعلاج بعض
ويتبرعوا لاطعام بعض
وكمان يتبرعوا لعمل متاحف

دي جديدة صراحة
وطبعا الدولة لو كانت فقيرة وشحاتة كان مافيش مانع نتبرع
لكن على قلبهم فلوس الخصخصة وبيع أملاك الدولة قد كده وعايزينا نتبرع

يااخي بعدهم

هااااااااااااااا

كفاية كده على وزارة الثقافة

ولا تحب نتكلم عن مطبوعات الوزارة والمصايب بتاعة الكتب المشبوهة التي تمت طباعتهم على قلبنا

ولا تحب نتكلم عن تصريحات السيد الزير الفنان

قال صقافة قال

هي فعلا صقافة

بالصاد وليس الثاء

عصفور المدينة said...

طب محمد علق تعليقي وانت رديتي عليه أعمل إيه أنا دلوقت
لي تعليق بسيط الاستمرارية في الوزارات والشخصيات اللي مطولة معانا دي عشان الناس ما تحسش بالتطويل من أي شخصية يعني كله مطول معانا لكن أنا لو حسيت في عمري اللي هو أربعين سنة إن عدى علي 20 وزير زراعة أو 15 وزير ثقافة حاحس إنه عمر طويل عمرته أحتاج معه إلى تغييرات أكبر لكن كدة الأحوال مستقرة وكله بيعمر وكله شعره أسود على طول يعني أنا الوحيد اللي باعجز يبقى العيب في مين

mo'men mohamed said...

إتفقنا على ألا نتفق
هذا هو شعار اللجان المصرية
حسبى الله ونعم الوكيل
السلام عليكم

Bella said...

عصفور المدينة

منورنا

والله محمد سأل سؤال بيسأله تقريبا كل المصريين خصوصا بعد مرور هذا الوقت الطويل الذي جلسنا نتذكر فيه اسم وزير الثقافة الذي سبق الوزير الفنان وتاه عن بالنا الاسم وقعدنا نعصر مخنا من طول المدة

هههههههههههه

وزي ماانت قلت يااخي العزيز

في البقاء عدة فوائد

فضلا عن موضوع الاستقرار والثبات والرسوخ والمصطلحات التكعيبية دي والتي بفضلها يشعر الشعب بالانتعاش والحيوية وانه لم يكبر او تمر عليه سنوات طويلة بسبب قلة عدد الوزراء

الفائدة الهامة الاخرى هي محو الذاكرة ونسيان اللى فات

يعني لما يقعد على قلبنا وزير لمدة عشرين سنة الاجيال اللى تتولد في عهده طبعا لايمكن ح تسمع عمن سبقه وطبعا اللى كانوا كبار وقت مامسك ح ينسوا بقى بفعل التعود وبمرور الوقت لايستهلكون ذاكرتهم في تذكر احداث كثيرة بسبب قلة الاحداث اصلا.

فائدة اخرى يستفيدها طلبة المدارس بقى وعلينا بخير في السنوات القادمة عندما يُكتب تاريخ مصر لن يجد الطلبة مناهج طويلة لحفظها وصمها واسترجاعها في الامتحانات

كله سيكون خفيف خفيف

حدثين تلاتة في خمسين سنة

حاجة حلوة قوي والمناهج تبقى عسل

عرفتم ياأولاد "الحكمة" التي تغلف كل قراراتنا المصيرية

وتوتة توتة فرغت الحدوتة

Bella said...

mo'men mohamed

مرحب يامحمد

والله حتى اتفاقنا على الا نتفق لم يتم الحقيقة

هههههههههههههههه

altwati said...

"التغيير ودفعاً للملل لاأكثر ولا اقل"

فكرة التغيير يجب أن تطال المصادر الأساسية لإنتاج هذه النوعية
أو آبار إنتاج هذه الخامة
والتي تتمثل في القيم
انظري لكل من حولك وتخيليهم في كرسي الوزارة بداية من بتاع الفول انتهاء بجامع الخردة وبينهم أنا شخصيا
لا نصلح صدقيني
هناك خراب قيمي هائل
تحياتي

Ahmed said...

بصراحة انا بقول كفاية عليه مناصب ويقعد في بيته
من يوم ما كبر وبدأ يخرف والثقافة في النازل
وفوق دا كله مرشحينه لمنصب مهم زي ده
يعرف هوه ايه عن اليونسكو وخدماتها للانسانية
صحيح الرجل الغير مناسب في المكان الغير مناسب
بصي اقولك من الاخر ربنا يخدوا وخلاص
اهو يبقى ارتاح وريح
تحياتي

محمد هانئ said...

ازيك يا استاذة بيللا
شفت حاجة متعلقة بموضوعك
عملية تلميع سيادة الوزير بدات بالفعل
فيه كتاب جديد نزل عن دار الهلال عن سيادة الوزير المحترم فاروق حسني
بس مش فاهم البهوات بيلمعوه ليه جوه
م كفاية لحد مده 20 سنة علي نفسنا
و لا يمكن سيدي اليونسكو لما يقرا فكر سعادته يبنيله مقام جنبه
و مدد يا سيدي اليونسكو مدد


محمد هانئ

Anonymous said...

أختي الفاضله ... سعدت جداً بمرورك الكريم علي مدونتي ..وعند زياراتي مدونتك .... أكتشفت تطابق الأفكار وإن كان إبداعك مميز أكثر ... تحياتي وتقديري ...

Bella said...

altwati

مرحبا بك

اتفق معك طبعا في أن التغيير يجب ان يطال المصدر لهذا العفن الذي نحياه ولكن كيف السبيل إلى هذا التغيير

ولا في الاحلام

إلا أن يشاء الله

وبصراحة نحن لانستحق تغيير للافضل لاننا لانسعى لذلك
وكلما حدثت كارثة في بلادنا اتعجب من رد فعل الناس وصمتهم الخانع الذليل وانحسار كل اهتماماتهم في الجري وراء لقمة العيش وكأن الفساد الضارب في جذور الوطن سيسمح لهم اصلا بلقمة عيش نظيفة.

دائما ماأتذكر مقولة

الشعوب تستحق حكامها

ونحن نستحق مايحدث لنا وعن جدارة

المجتمع بحاجة ماسة وشديدة لإعادة تأهيل

Bella said...

Ahmed AL-Hussany

مرحبا بك

لا لا لا
مش كده ياعمنا
انت كده بتخبط في الحلل

ايه كبر وخرف دي

يعني عنده شهادة رسمية بأنه وزير فنان شاب حتى شوف شعره وقارن لون شعرك انت شخصيا بشعره لتعرف الفرق
وجاي ببساطة تقول كبر وخرف

حرام عليك يااخي الظلم ده

ثم مين قال لك ان عندنا حد بيكتفي بأي منصب وبعد مايحتله سنين طويلة بيقعد في بيتهم

بص حواليك كمان مرة وشوف كم لواء شرطة بعد خروجه من الخدمه بيشغل منصب تاني في مكان تاني
وكم لواء جيش شرحه

نحن لانهدر الكفاءات ونستفيد من طاقات شبابنا الوزراء وبعد مايخلصوا علينا
قصدي يعني يخلصوا مدة خدمتهم لازم ياخدوا مكافأة نهاية الخدمة ويكملوا في مكان تاني

وبعدين الراجل شغال معارض وايشي بينالي وايشي ترينالي وحركات وحبشتكانات
حتى لو مش عارف اليونسكو دي تطلع ايه ممكن حد يعرفه يعني مش حكاية

عالم كلهم عايزين الحرق والله

Bella said...

المصري افندي

اهلا بك

فينك ياعم من زمان

حلوة قوي حكاية سيدي اليونسكو يبني له مقام دي

جديدة جدا

ههههههههههه

مااحنا قلنا ان اللجنة ح تبتدي تروج له
دلوقتي نزل عنه كتاب من اصدار دار الهلال لصاحبها مجدي الدقاق

بكرة المجلس الاعلى للثقافة يصدر مطبوعة بكل لغات العالم الحية والميتة للتعريف بسيادته برضه
وزي لجنة صفر الرياضة ماعملت ملف وشرايط فيديو وسيديهات ودي في دي

ح تبص تلاقي لجنة زيها كده شغالة بتعمل وتطبع وتكوم مطبوعات وكله على قلب الزبون وعلى حساب صاحب المخل

وشوف انت بقى ملف زي ده ح يتكلف كام

العملية بقت خل خالص صراحة

Bella said...

هيثم ابوخليل

مرحبا بك

اشكرك كثيرا اخي الكريم
انا التي تشرفت بالتعرف على مدونة حضرتك الجميلة وعلى مشاركة حضرتك في جريدة المصريون عن التعليم

واخجلت تواضعي

شكرا جزيلا