Wednesday, August 29, 2007

رهين المحبسين


كلنا أو معظمنا يعرف ابا العلاء المعري الشهير برهين المحبسين
العمي
و
الدار

لقد اصبحت منذ خمسة ايام رهينة المحبسين حيث انقطع النت عندنا لأن اخي نسي يدفع الاشتراك واكتب لكم هذه المداخلة لأعلمكم بحالي من الكمبيوتر القديم وبواسطة كارت الفاكس الذي يمارس الآن اقسى أنواع الابتزاز العاطفي ليعاقبني علي تركي له ودخول النت بطريقة أخرى .
نسيت اقول لكم أن الكمبيوتر الجديد ليس به كارت فاكس

اصبحت انا ايضا سجينة المحبسين

انقطاع الدي اس ال

وبطء الكمبيوتر القديم وتحالفه مع كارت الفاكس ضدي

إحساس مرير جداً ان تشعر بانقطاع الصلة غصباً عنك بمن تعرفهم .

دعواتكم بعودة سريعة للنت لاني افتقدكم جميعاً وسأرد على تعليقاتكم عندما يأتي الفرج.

تحياتي

34 comments:

يا مراكبي said...

على فكرة كان الله في عونك

أنا ما أقدرش أقعد كام ساعة من غير إنترنت لدرجة إن معايا على طول جهاز للإنترنت اللاسلكي

منه علشان الشغل .. ومنه الإدمان اللي بقى زايد قوي عن حده

هو أنا جالي إستجماتيزم من شوية

islamz said...

انا برده قلت فى حاجة مش طبيعية ورا الغياب ده .. المهم اننا اطمنا عليكى . وترجعى بسرعة ان شاء الله
بس والله ليكى وحشة ..
حكاية انقطاع النت دى مملة .. انا لو قطع عندى ولا لو كنت فى العربية ولا تاكسي ولا حتى المترو بدخل من على الموبايل .. مدمن مدمن يعنى ..

تحياتى ..

Ahmed Shokeir said...

أعاني كثيرا من قراءة بعض التدوينات التي تحمل امورا عادية ولايحاول صاحبها ان يغلف كتابتها بإسلوب جيد وتدوينتك خير مثال كيف تُكتب التدوينة بشكل جيد وعميق حتى لو كانت تحمل مضمونا وإنطباعا عاديا
يظهر ذلك في الإفتتاحية والتشبيه الجميل بتحالف الكومبيوتر القديم مع كارت الفاكس ضدك

تحياتي وعودة سريعة

عصفور المدينة said...

واحد صاحبي أمس دافع وكله زي الفل وقالوا له انت ما دفعتش 5و6و7و8
وبرضه واخد حكم زي حضرتك

Layla said...

ربنا يفك حبستك...وما يوريها لحد..وخصوصا انا عشان خلقي ضيق وممكن اكسر الكمبيوتر في حالة زي دي
:DDD

بسمه عبدالباسط said...

يارب ترجعى تانى بالسلامة وتنورى مدونتك وتنورينا بمواضيعك الجميلة
تحياتى لكى

عدى النهار said...

فترة نقاهة إجبارية... مجانية

He and She said...

hey, go to a net cafe. We can't let you disappear like this

الطائر الحزين said...

فى هذه الحالة لو ينفع تشيلى كارت الفاكس من الجهاز القديم وتركيبة فى الجديد هيهون الموضوع شوية

محمد عبد الغفار said...

يبقى نتوقع منع ابداع فذ كإبداعه من محبسيه

altwati said...

ونحن نفتقدك بيللا

غمض عينيك said...

ياااه صعبة اوي
ربنا يفك محبسيك وترجعي بالسلامة

EGYPT EYES said...

هاي بيلا
ليكي واحشه يارفيقه D:

Shreef said...

هو النت كدا لازم يخنق على البشر بس فعلا بئى صعب ان الواحد يستغنى عنه...نشوفك قريب على الدي اس ال طبعا..سلام

Me2nour said...

وحشتيني يا قمر...يا رب ترجعيلنا بالسلامة

human said...

اول مرة ازورك
لكنى اعرف جيدا احساس العزلة
تحياتى

ahmed mefrh said...

احسست بما تشسعرين به من الالم نفسهي و ضيق فى التنفس و النفخ باستمرار و الدعاء ان يفرج الكرب و كلمات مثل .... يا مسهل الحال يا رب :هه يا باسط و حاجات من كده لما الواحد يشتغل بكارتت فاكس بعد ما كان شغال بالdsl

Bella said...

يامراكبي

مرحبا بك اخي العزيز

الحقيقة اني جربت الابتعاد عن النت مرات كثيرة ولكن الابتعاد الاجباري امر مختلف تماما

شعور سخيف بالاجبار على شيئ لم تختره وافكر جديا ان ادخل النت بعد ذلك عن طريق الموبايل

ادمان مريع صراحة

بس فعلا حسيت كأني في جزيرة معزولة عن العالم رغم وجود الستالايت لكن الانترنت امر مختلف تماما

Bella said...

islamz

مرحبا بك اخي العزيز

الحقيقة اني لااحب كثيرا مسألة الاعلان عن الانقاع او العودة للتدوين كما يعلن البعض عن الانسحاب او ماشابه

ولكني فضلت ان اكتب تنويه ليعرف اصدقائي سبب غيابي حتى لايقلقوا على وخاصة الاخوة والاخوات الذين لايعرفون وسيلة اتصال بي غير المدونة
ولهذا فكرت في كتابة الموضوع ولو كنت وجدت صعوبة في الكتابة من الكمبيوتر القديم لذهبت لانترنت كافية لكتابته

صحيح انا عمري ماقعدت في انترنت كافية ودخولي للنت دائما من كمبيوتري الخاص بالبيت

بس والله كلكم وحشتوني جدا وكنت حاسة بحزن فظيع لحرماني من التواصل معكم

Bella said...

Ahmed Shokeir

مرحبا بك اخي العزيز

والله انا ايضا لااحب متابعة التدوينات التي يعلن اصحابها عن زعلهم وانسحابهم وماشابه من التدوينات خاصة اني اعتبر الانسحاب او الابتعاد عن الكتابة امر شخصي بحت ولا يحتاج لاعلان

وعن نفسي سبق واختفيت عن الكتابة فترات متقطعة كثيرة ولم يسبقها اعلان مني

ولكن في هذه الحالة القهرية وحتى لااسبب قلق لمن يعرفوني فكرت في تعريفهم بسبب غيابي

لان غيابي هذه المرة مختلف عن غياباتي السابقة

المرات السابقة كنت لااكتب في مدونتي ولكني اتابع مدونات الغير وارد عليهم يعني كنت بشكل ما موجودة

لكن هذه المرة رهيبة صراحة

احساس مميت ان تشعر بأنك سجين ولاتستطيع التواصل مع العالم الخارجي

واشكرك كثيراً على رايك في الموضوع

Bella said...

عصفور المدينة

مرحبا بك اخي العزيز

المحنة التي مررت بها والتعامل المباشر مع شركات تزويد خدمة الانترنت فائق السرعة

مش عارفة مين سماه فائق اصلا وهو ولا فائق ولا نيلة
هو نايم ودايخ معظم الوقت ومحتاج قلمين علشان يفوق

لو يقصدوا بفائق انه فايق يعني

هههههههههههههههههه

بس الحقيقة الواحد حد ايده على شوية مصايب وحركات نص كم كتيرة

يعني مثلا الشركة المتعاقدين معها واحد من الموظفين فيها قال لاخويا ان الانترنت ابو خمسة واربعين سيكون اجباري من اول رمضان

لما مسكته انا ونفضته زي مابننفض سجادة قديمة مليانة تراب وقلبته على الجنبين زي السمك المشوي ماعرفش يكح معايا وقال لا يافندم تلاقي اخو حضرتك فهم غلط

التعاقد سيكون كما هو للمتعاقدين القدامي

ومش بس كده

انتزعت منه اعتراف كمان ان حتى المتعاقدين الجدد لهم الحرية في اختيار الطريقة الجديدة او التعاقد بخمسة وتسعين غير محدد السعة كما هو الحال الآن

يعني الحكياة ان الشركات والهئية بيشتغلوا علينا وكل شوية واحد يطلع يلعب في دماغنا بتصريح مالوش لازمة مستغلا جهل المواطنين بحقوقهم

ويتراجع لو اتخبط في مواطن عارف حقه وبيناقش كل تفصيله

الواحد لازم يتسلح بكل وسائل البلطجة الكلامية وهو يتعامل مع هذه النوعية من الناس

بس الحمد لله اكتشفت ان قدراتي على المرور في الحديد مازالت بخير وشيبتهم صراحة

واعتقد ح يفكروا كتير قوي خالص جدا قبل مايقطعوا النت عن التليفون بتاعنا

Bella said...

Marvel - واحد زهقان

مرحبا بك اخي الكريم

الحقيقة انا كنت زهقانة لدرجة لم اعهدها في نفسي من قبل

خصوصا من سخافات القائمين على اعادة الخدمة وكل واحد فيهم يتكلم وكأنك بتطلب طلب غير مشروع وايه يعني لو صبرت لك كام يوم بدون نت

عالم سمجة صراحة

Bella said...

bos bos

مرحب بك اختي العزيزة

ربنا يكرمك ويسعدك يارب

الحقيقة احساس الحبس احساس مرير جدا

لكن الحمد لله على كل حال

اديني رجعت وشكرا على العيش والحلاوة

هههههههههههه

Bella said...

عدى النهار

مرحبا بك اخي العزيز

هي فترة لااعتبرها نقاهة صراحة لانها سببت لي ضيق شديد

خصوصا انها اجبارية

عن نفسي ممكن ابتعد عن التدوين لفترات قد تطول او تقصر حسب الاحوال ولكن بمزاجي

وليس بالغصب او الاجبار كما حدث في هذه المرة

ربنا يهدهم ويوقف نموهم

Bella said...

He & She

مرحب اخي العزيز

انا لسه عندي الكمبيوتر القديم بكارت الفاكس

وهو ده اللى كتبت منه الموضوع
وطبعا بطئ وحالته حالة

لكن ماجربتش صراحة اقعد في انترنت كافية واكتب قبل كده
مش عارفة الحقيقة عمري ماجربت اقعد في مكان عام واكتب

مش عارفة ليه باحس بانتهاك لخصوصيتي

ربما لاني متعودة دايما ادخل النت من البيت من الكمبيوتر الخاص بي ولا يجلس عليه غيري

وللاسف الكمبيوتر الجديد ليس عليه كارت فاكس علشان كده كان دخولي لتفقد الميل على فترات متباعدة جدا

ولكن الحمد لله النت رجع خلاص

كفارة ياجدعان

ياما في الحبس مظاليم صحيح

ههههههههههههه

Bella said...

الطائر الحزين

مرحبا بك

انا بافكر جديا في امرين

اركب كارت فاكس للكمبيوتر الجديد

واعمل حسابي ادخل النت من الموبايل بدل الحبسة دي

ولو شركة النت عملت اي حركة من غير شعر ( حركة قرعة يعني ) زي الحركة دي ح نشترك مع شركة غيرها وده اخر كلام قلته لبهوات بتوع الشركة اللى احنا مشتركين معاها

قلت لهم الشركات على قفا مين يشيل وماتتصوروش ان مافيش غيركم في البلد

لو حكمت الواحد يدخل النت من الموبايل وخسارة فيكم فلوس الاشتراك

صراحة هم اللى اضطروني اكلمهم بالطريقة دي

عالم تخاف ماتختشيش

Bella said...

Mohamed A. Ghaffar

مرحب ياسي محمد

دايما تجاملني كده

ربنا يكرمك ويخليك يارب

Bella said...

altwati

مرحبا اخي العزيز

وانا ايضا افتقدكم جميعا

لاحرمني الله منكم

Bella said...

غمض عينيك

مرحبا اخي الكريم

والله اصعب تجربة يمكن ان يمر بها انسان ان تقيد حريته

صحيح هو ليس حبس بالمعني الكامل للحبس

ولكن تقييد للحرية يكاد يقترب من الحبس

ربنا يفك اسر الجميع وياسر كل من كان السبب يارب

Bella said...

EGYPT EYES

مرحب اخي العزيز

شفت بقى ياعم اعداء الحرية عملوا فينا ايه

بجرة كيبورد يقدر اي متنطع يحرمنا من التواصل مع من نريد التواصل معهم

ربنا يهدهم جميعا

الا توجد وسيلة لدخول النت بعيداً عن مزودي الخدمات

قال بيزودوا قال

وهم منقصي الخدمات

Bella said...

shreef

مرحب اخي شريف

والله هي مش بس خنقة

الحقيقة لايوجد وصف لحرقة الدم اللى فاتت دي

وفعلا الواحد لايستطيع الاستغناء عن النت وخاصة لو استغناء اجباري

لكن الاختياري ممكن لان كتير يكون النت موجود وتكون مشغول بحاجة تانية ولاتستطيع دخول النت ولاتشعر بهذا الاحساس السخيف الخانق

الاجبار امر سخيف جدا

Bella said...

Me2

مرحبا اختي الجميلة

وانت كمان وحشتيني جدا والله
الحمد لله على كل حال

بس الغياب القسري فعلا سخيف جدا

Bella said...

human

مرحبا بك

وارجو ان تزورني باستمرار

الاحساس بالوحدة والعزلة امر مميت خاصة اذا كانت عزلة قهرية وليست اختيارية

ربنا يبعد عنا العزلة والحبس والوحدة

آمين يارب العالمين

Bella said...

ابو مفراح

مرحبا بك اخي العزيز

والله هو مش بس كان نفخ من الغيظ والضيق ودعاء بتفريج الكرب

كمان دعيت على الشركة ربنا يهد حيلهم طالما استمروا على هذه الطريقة السقيمة في التعامل مع العملاء

مش عارفة ليه بيعاملونا على اننا بنشحت منهم رغم ان فلوسنا هي اللى فاتحة لهم شركتهم وبتدفع مرتبات موظفيهم

نفس الطريقة التي تعاملنا بها الحكومة على اننا تحت امرهم ونحمد ربنا انهم موجودين معانا في نفس الكوكب

ربنا يريحنا منهم جميعا