Monday, August 13, 2007

أخيراً مصر في المركز الاول

كنت أنوي الكتابة عن ارتفاع سعر الخبز وماصاحب ذلك من تداعيات مؤسفة

ولكني قررت إرجاء هذا الخبر المؤلم وغيره من اخبار الفساد التي تحيط بنا ونصبح ونمسي عليها حتى نفرح ولو قليلاً

وعلى طريقة كفاني ياقلب قلت اشاطركم هذا الخبر السعيد

أخيرا ياسادة ياكرام احتلت مصر المركز الأول

بعد طول انتظار وكثرة الاصفار وتدني الأحوال
تعطف علينا الزمان بالمركز الاول

وبهذا تعود لمصر ريادتها المفقودة
وتعود كل دولة حاولت المنافسة لحجمها الطبيعي

احنا وبس ومافيش غيرنا


القاهرة تحتل المركز الأول كأكثر العواصم تلوثاً

لم أضع صورة للموضوع تخفيفاً عن زوار المدونة الكرام حيث ان التلوث يحيط بنا وبهم في كل شبر على ارض المحروسة بداية من تلال القمامة التي لاتبارينا دولة في إرتفاعها

مرورا بفوضى المرور والتلوث السمعي الذي يقتحم حياتنا حتى ونحن في بيوتنا
وتلوث المياة
وتلوث الضمائر والقلوب
وإرتفاعاً لعنان السماء حيث تظلل السحابة السوداء سماء حياتنا منذ عدة سنوات لاأتذكر عددها من كثرتها
نزولا على رغبة المشاهدين بالتلوث الكليبي الذي أفسد علينا السمع والبصر وصار كل من هب ودب يصور كليب ويلقيه في وجوهنا.
إنتهاءً بصدورنا التي سدها عادم السيارات وعادم المصانع وكل العوادم التي لم تعدم أن تجد لنفسها مكان في حياتنا المصرية الصميمة.

مصر بلد الريادة وبلد المركز الأول عن جدارة واستحقاق



كح كح كح كح كح
ً

20 comments:

altwati said...

الحمد لل إنها أخيرا تفوقت على مومباي ومكسيكو سيتي
إلى الأمام
دائما
مخلفة وراءك المزيد من العادم

altwati said...

الحمد لله

islamz said...

فعلا بداية عظيمة للظهور فى الميدان الدولى للعالم .. هو الانفتاح على العالم ايه غير شوية مراكز اولى ورا بعض .. عارفة يا بيلا الواحد بيفرح كده لما يشوف بلده بتتقدم ... واتخيل قدمى دلوقتى اغنية فيلم النمر الاسود لاحمد زكى .. اتقدم تا تاتاتا تاتا .. اتقدم تاتا

هروح اغنى انا بقي .. ايه بتقولى ايه
اغنى على ايه .. شوفى هديكى اختيارات ..
1 - بغنى على خيبتنا
2 - بغنى على زبالتنا
3- بغنى على باب بيتنا

برجاء ارسال الاجابة على صندوق قمامة رقم 0000 مصر ..

:]

الطائر الحزين said...

السلام عليكم
طبعا نستحقها وعن جدارة

انا فضلت النهاردة ماسك ورقة علشان احطها فى سلة زبالة ملقتش رحت حطيتها فى جيبى و وبعدين وانا بغير هدومى فى البيت لقيتها مرتاحة مستكينة
ضحكت

تحياتى

عصفور المدينة said...

المشكلة أنها الأسوأ تلوثا في عالم ملوث أصلا مش عالم نظيف كمان
عايزين نشوف لنا عالم تاني غير ده

عدى النهار said...

هو مش فى حد برضه قال إحنا اللي دهنا الهوا دوكو.. خليه يفرح

محمد عبد الغفار said...

لالالا حاسبى سته اكتوبر لا زى الفل

To a friend said...

المهم اننا الاول في اي حاجة يا بيلا و السلام

النهاردة الاول في التلوث شوفي بقي بكرة نبقي الاول في الزحمة (هو احنا لسه ما وصلناش ؟) او الاوائل في البيروقراطية .. يعني حانرفع راسك ان شاء الله
فقط امهلينا بعض الوقت

Sha2loob said...

هيه هيه هيه هيه
تحيا مصر
هو ده الخبر اللي هيفرحنا بعد كل السنين دي.
الخبر ده معناه ان عندنا أكبر عدد من المصانع اللي معندهاش أي أساليب لتنقية العادم.
وأكبر عدد عربيات شكماناتها مخرومة وماتيرها مفوتة وماشية في الشارع ومحدش بيقولها انتي رايحة فين.
وان احنا عملنا ارشاد للانفاق الحكومي وشلنا كل الوزارات والهيئات اللي ليها علاقة بالبيئة من قريب أو من بعيد.
خبر يفرح صحيح

وبيب بيب احنا الأول بيب بيب افرح يا اهبل بيب بيب أعوعا

Masria said...

أنا قلت برضه .. خدنا المركز الأول في حاجة؟ بجد؟ طلعت التلوث .. ماشي .. ما جتش على دي يعني

Bella said...

altwati

اهلا وسهلا

شفت بقى ازاي

تيجي البلاد اللى بتنافسنا على الريادة وعايزة تسحب من تحت رجلنا البساط تتفضل تشيل وتورينا ح تعرف تنازعنا ع المركز الاول ولا ح يفضل في المؤخرة كعادتهم

ههههههههههه

Bella said...

altwati

مرحب تاني

الحمد لله والشكر لله

يجب ان نسجد لله شكرا لتوصل حكومتنا الرشيدة لاحتلال هذا المركز بلا منازع

Bella said...

islamz

مرحب اسلام

والله يااخي العزيز يبدو انهم اخدوا الكلمة من على طرف لسانك وشكلوا لجان متخصصة لبحث كيفية الحصول على هكذا مراكز اولى

واديك شايف النتيجة

ماقلتليش جايزة الفزورة ايه

ولا عايزني اتدبس واتصل بزيرو اربع زيروهات وتتحسب علي مكالمة والعداد يحسب وخلاص


يووووووووه

ده الاتصال طلع على صندوق زبالة

طيب اليافطة بالعنوان محطوطة على الصندوق ولا ح اتوه على ماألاقيه؟؟

Bella said...

الطائر الحزين

مرحبا بك

ماقمت به هو التصرف السليم

ولكن المعضلة عندما يكون معك طفل وتجلس تربي فيه وتعلمه اهمية النظافة ويقوم مثلك بالتحفظ على الورقة حين ميسرة حتى يجد سلة مهملات او يذهب البيت ايهما اضمن

وانت في الطريق لابيك ولا عليك تجد عربة فارهة تمرق بجوارك وتفتح النافذة وتمتد يد لترمي باي مخلفات على الارض والطفل مشدوه ويتسائل في حيرة عن سبب تعذيبك له بدروس تعليم النظافة والحفاظ على البيئة وغيره يرمي مخلفاته ببساطة شديدة

Bella said...

عصفور المدينة

طيب مين اللى خلاها ملوثة؟؟

واين هذا المكان الذي يمكن ان يقبل بنا ونحن موضومين باننا شعب فوضوي لايراعي النظافة ولا النظام

رغم اننا نتغني ليل نهار بتفردنا وتوحدنا ووصلونا لما لم يصل إليه غيرنا

لو لقيت مكان ياريت تبلغني علشان اهج انا كمان

Bella said...

عدى النهار

اهلا وسهلا

تلاقي اللى قال على دهان الهوا دوكو هاجر من زمان بعد الهوا ماتلوث والدوكو بتاعه اتهبب ومابقاش باين

وتلاقيه فرحان طبعا وشغال تعبية الشمس في ازايز وعمال يكوم ويبيع

Bella said...

Mohamed A. Ghaffar

مرحب ياسي محمد

لا حاسب انت بقى

انت جاي تغيظنا بستة اكتوبر علشان احنا متفحمين في باقي المحروسة

حرام عليك يااخي راعي اخواتك الغلابة المطحونين ولا علشان مابنهاجرش عندكم ح تغيظنا يعني

Bella said...

fad-fadat nour

اهلا نور

والله يانور احنا كسرنا الرقم القياسي في مجاميع الثانوية العامة هذا العام والقبول في الجامعات كان بمجاميع لم يصل إليها اي عبقري من قبل

يعني بلد الريادة ونص وتلات اربع

المركز الاول ياستي مش جديد علينا

وزي ماانقلتي المراكز الاولى ستتوالي

وقد امهلتكم من الوقت مايجعلكم تحطموا موسوعة الارقام القياسية

وروني الهمة امال

Bella said...

Sha2loob

مرحبا بك

لا لا

بلاش ترويج اشاعات مغرضة يامندوب القلة المندسة انت

انت عايز تروج لخبر خطير ان مصر بتجتذب رؤوس الاموال الاجنبية لاقامة المشروعات التي لايستطيعون عملها في بلادهم بسبب الاجراءات الصارمة في الحفاظ على البيئة زي مشروعات مصانع الاسمنت كده

ولا عايز تروج لريادتنا في الصرف بمختلف انواعه في النيل
ولا
ولا

كل ده يامفتري علشان تكسر فرحة الشعب الغلبان بوصولنا لهذا المركز المتقدم الذي لم تسبقنا إليه دولة ولن تجرؤ دولة علة منافستنا عليه

ياساتر عليكو عالم مفترية صحيح

Bella said...

Masria

اهلا وسهلا

لا بجد زعلتيني

انت كنتي فاكرة ان كل اللى حوالينا ده ينفع يودينا بولاق الدكرور حتى

كل السلبيات لموجودة في بلدنا والناس اللى فيها لايمكن تسمح بمركز اول الا في مصيبة زي دي

ربنا يستر على ولايانا بقى