Monday, May 5, 2008

علاوة على ذلك وعشانا عليك يارب


أظن كل البيوت فرحانة بعد الزيادة التاريخية في المرتبات والتي مرت بمنحنى خطير وسيتم تنزيلها على مرتب مايو ياشعب ناكر للجميل بدلا من الانتظار للموازنة الجديدة

وأعلن الخبراء ان الضربة الاستباقية واختيار هذا الموعد كان وراءه حكمة عظيمة لو تعلمون حيث تم تفويت الفرصة على التجار لرفع الاسعار كما هو معتاد منهم كل سنة

قال يعني الزيادة لما تكون في مرتب مايو لن ترتفع الاسعار وستظل محلك سر لان التجار انضربوا على قفاهم ولم يتمكنوا من تدبير امورهم ورفع الاسعار

هههههههههههه

مش قادرة امسك نفسي وح اموت من كتر الضوحك

لامؤاخذة بقى ياجماعة معلش العتب ع العلاوة

بمناسبة العلاوة تم اليوم الموافقة في مجلس الشعب ( اي شعب مش عارفة ) على زيادة بعض السلع كالبنزين والسولار والسجائر وزيادة رسوم تجديد ترخيص السيارات

والاسعار كالتالي

البنزين 95 يباع بسعر 250 قرش

البنزين 92 يباع بسعر 185 قرش

البنزين 90 يباع بسعر 175 قرش.

البنزين 80 لم يتغير سعره حيث انه غير موجود بالمحطات.

السولار يباع بسعر 110 قرش.

وهنا تكملة الخبر لمعرفة مصيركم المحتوم والزيادة المنتظرة عند تجديد ترخيص السيارات لمن لديه سيارة منكم ياعفاريت فالحين تركبوا سيارات سيات فارهة ياشعب مفتري اشربوا بقى نياهاهاهاهاهاها

ملحوظة قبل القراءة

من يعاني امراض خطيرة كالضغط والسكر والتهاب الكبد الوبائي او اي مرض من الامراض المتوطنة في جتت الشعب المصري او حتى صداع فلايقرا باقي الزيادات حتى لاتتفاقم حالته الصحية وانا لست مسؤولة وقد حذرتكم

القائمة الحكيمة لتربية الشعوب اللئيمة

هذا ونهيب بالشعب الحبيب الا يستمع لتصريحات اي مُغرض من مندوبي القلة المندسة الذين يعتبرون هذا القرار ضار بالوطن والمواطنين ونحب أن نذكركم أننا لكم وبكم ونعمل من أجلكم

الله

الوطن

العلاوة

وندعوا شباب الوطن لمساندة هذه القرارات والالتفاف حولها والامتناع نهائيا عن التفكير في صغائر الأمور كالزواج وتكوين اسرة والا يضيعوا عمرهم الغض في هذه الترهات والا يعتبروا ان البحث عن وظيفة وتدبير مسكن غايتهم لتحقيق ماسبق فنحن نريدكم أن تتساموا فوق هذه الأمور الدنيوية وترتفعوا لمستوى المسؤولية الملقاة على عاتقككم ولاتنسوا العبور للمستقبل وعلاوة على ذلك مصر تتقدم بكم

والله الموفق

تحديث

نزولاً على رغبة الجماهير الغفيرة من شعبنا الحبيب تقرر إذاعة أغنية ياعلاوتك ياجمالك ودراسة أمر اعتبارها النشيد القومي للبلاد الفترة القادمة

والله ولي التوفيق


33 comments:

خمسة فضفضة said...

السلام عليكم ورحمة الله وبركاته

ماهو يا بيلا من امبارح والاخ عمرو اديب قاعد ينوه للحكايات دي كلها ، تقريبا الحكومه كانت مظبطة نفسها علي كده من الاول سواء بقي العلاوه 30 ولا 3 في الميه

وزعرتي يا اللي انت مش غرمانه

لولولولللللليييييييييييييييي

بحب السيما said...

وعلاوة على البوست اللى كتبته بيلا
احب اقولكم
اننا ضايعين ضايعين لامحالة

عدى النهار said...

هو إحنا مش عندنا مثل بيقول الحداية مش بتحدف كتاكيت

الحكومة اللي بتشجّع الفساد وكل يوم فى أكتر من خبر فضيحة عنها يحرق الدم مش ممكن ييجى من وراها خير

وجهة نظري said...

طب ما هوا متوقع كده، مفيش أي مفاجأه.... والحكومه مبتكسيفش خالص

هوا السيد/ليه بنحبك الملقب بحسني مبارك ضربله رقم أثناء الخطاب، وقعد يرمي كلام بعده إن مفيش موارد.... دي مقدمه لزياده الأسعار

عايزه الحق؟؟ الشعب المفروض والله يرفض العلاوه دي ويحرج الحكومه والــ تييت إلي ماسك البلد، ويطالب بثبات الأسعار.... حيعملوا إيه بـ 30% والأسعار حتزيد 300%؟؟؟

بيقولك ياخدوا من الأغنيا ويدوا الفقرا... فاكرين نفسهم روبين هود!! دول بيسرحوا بالناس وأول ناس حتجوع هما الفقرا..... طب يقولولنا الفقرا إلي مبيشتغلوش في الحكومه حيعملوا إيه؟؟

جبهة التهييس الشعبية said...

هههههههههههههههههههه
طب عايزين ننزلها لو سمحتي يا علاوتك يا جمالك

وللا دي كمان غليت بنسبة اربعة وتلاتين ونص في المية؟

هوندا said...

هيا كده مظبوطه لازم الميزان يتظبط وبقا علاوة=زيادة بغباوة

الى شغل عقلى حاجة واحدة بس
االمواصلااااااااااااااااااات اكيد هتغلى يبقا بلاش اسافر وطظ فى الجامعه لان الزيادة الى كانت م كام سنة رفعهو المواصلات ربع جنيه ربنا يستر اهلى مش ناقصين يعنى

Bella said...

خمسة فضفضة

مرحبا بك

انا مش باشوف سي عمرو ده

كفاية علي جرعة السخافة بتاعة العاشرة مساء

عموما هو من ساعة الخطاب التاريخي والوقفة المفصلية لما كرر ان مافيش موارد وانا قلت لهم اتصرفوا عرفت ان المصيبة جاية

بس كنت متوقعة يكون عندهم ذوق شوية ومايخلوهاش بالسرعة دي

بس واضح انهم فعلا اذكيا وناصحين

اختيار موفق الحقيقة للتوقيت

جاتهم القرف

Bella said...

بحب السيما

مرحبا بك

الحقيقة بعد المقلب السخن ده اعتقد ان الناس ستطالب مجمع اللغة العربية بالغاء كلمة علاوة من المعاجم واستبدالها باي كلمة لاتذكرهم بهذه الكارثة

هههههههههه

Bella said...

عدى النهار

مرحبا بك

الحقيقة عن نفسي لم اتفاءل في اي مرة صرفوا لنا علاوة بسبب المصايب التي تصاحب هذه الزيادة

لكن هذه المرة الناس مش انا

الناس يعني تصورت ان الخير جاي وح يعم بقى وح يغرفوا منه

بس فعلا لا الحداية بتحدف كتاكيت
ولا عمر العلاوة شبعت بالفتافيت

هههههههههههه

تنفع مطلع قصيدة عصماء في هجاء العلاوة

هههههههههههههههه

Bella said...

وجهة نظري

مرحبا بك

والله يااخي العزيز عن نفسي ماكنتش مستشرة خير بالحركة العنترية والنسبة المريبة دي
وكنت حاسة ان على قد كبر نسبة العلاوة المقلب الناتج من وراها ح يكون كبير

وفعلا الخابور كان كبير جدا

عجبتني قوي حكاية حكومة روبن هود دي

هههههههههههههههههه

Bella said...

جبهة التهييس الشعبية

مرحب نوارة

عايزين طيب نعمل البوم للعلاوة دي بقى
ونعمل فيه شوية اغاني محندقة على هامش الزيادة دي
ونشوف ارتفاع الاسعار اللى ح يفجر جوانا ينابيع الابداع ح توصلنا لفين

هههههههههههههههه

ونعمل كمان كليبات ونبيع ونكسب

ونعوض الفقراء وضحايا العلاوة من مبيعات الالبوم

هاااااااااا

قلتي ايه

ههههههههههههههه

Bella said...

هوندا

مرحبا بك

شكلك ياعفريتة عايزة تزوغي من التعليم وعاملة اسعار المواصلات حجتك

ههههههههههه
هي لو جت على المواصلات بس تبقى هينة

ده احنا ح ناكل ضرررررررررررررب

هو احنا لسه شفنا حاجة

Che_wildwing said...

من لم يمت بالعادلى مات بغالى
ومن لم يدركه سيف الحكومة أدركته سهام العلاوة
تعددت الأسباب ومبارك واحد

اهو ده عيبه said...

قلنا كده من الاول قالوا اطلعوا م البلد
قلنا متفرحوش قوى بالعلاوة محدش صدق
هى الناس بتنسى كل مرة ولا ايه يفضلوا يقولوا عايزين زيادة ولما تيجى تانى يوم كل حاجة تغلا
هما لسه مفهموش دماغ الحكومة ولا ايه ولا الثقة المفرطة دى مش هنبطلها
افتكرلك ايه يا حكومة وكل قطمه بدمعه مع الاعتذار للبصلة :)

بنوتة من وسط البلد said...

انت حقيقي اسعدتنى
وحسستنى ان البلد دى ليه فيها خير

بس الغريبة ما جابوش سيرة عن الجاز

اصلي بفكر اشتغل فى السيرك .. وانفخ نار وارقص وازغرط زى المعاتيه فى الشوارع ... وتحية كبيرة اوى للريس الكبير اووى

appy said...

هههههههه دى حلاوة زمان عروسه حصان
انا بعيط من امبارح اه والله رحت البنزينه قالوا مفيش بنزين قولت اروح ابيع العربيه واجيب عجله
طيب اعمل ايه
اممممممممم مش العجله مفيده برضه واهى رياضه
انا ضغطى خلاص طول اللى بعترض واقول اوبجيكشن بكل اللغات ومفيش فايده منه لله

حاول تفتكرنى said...

فاكر موضوع العلاوات والضجة الإعلامية التي تصاحبها ، وفرحة الاقلام والكريكاتيرات التي تهني الملايين بالعلاوة ، وفرحة كل الناس إلا فئة واحدة
مستحقي العلاوة ، لأنهم عارفين أن العلاوة الاجتماعية لا قيمة لها
كلمة 30% تعنى ولا حاجة
لأنها ليس على المترب الأساسي
يوم ماتبقى على المرتب الاساسي أكيد كلنا هنرقص
حتى لو أصبح البنزين اللتر بميت جنيه .

كنت أتحدث مع أحد اصدقائي أمس فى مصر ، وتطرق إلى موضوع البنزين والسولار بأسى شديد ، قلت له يا أخى أنت ايه اللى مزعلك وأنت معندكش عربية
قالى ، لا يا ناصح
اجرة التاكسي هتزيد
وكمان المكروباص
حتى التكتك كمان
والزيادة بمزاج أصحاب المكروباصات والتكاتك
ولما جزار يركب المركوباص أو يدفع 20 جنيه زيادة على صفيحة البنزين ، هيحاول يعوضها من الزباين ، ويقلدة الخضري ، والخردواتي
يا جامعة هى منظومة شىء يزيد سعره يزود سعر عشرات الاشياء
ما بالك لو اللى زاد البنزين
تبقى اسعار كل شىء هتولع
ده بنزين مش مية لفت

تحياتي

بنت أبيها said...

صحيح اول ما سمعت الخبر

قعدت اضحك لحد ما قلت يا بس

مش بيفوتوا اي حاجة

وكله ورا بعضه عشان الناس تقول يعنى نخلي عندنا دم ده لسه رافع المرتبات 30%ـ

واللى مش بيشتغل في الحكومة بقي يولع في نفسه

ده حتى لو حب يولع في نفسه البنزين بقى غالي

آفاق الحرية said...

ههههههههههههههه
اقولك علي حاجة انا مش متفائل
هههههههههههههه
علاوة مين وبتاع مين
ياريته ما نطقها

tamer.sala7 said...

بعض انواع العلاوات في مصرنا المحروسة
علاوة طحينية
علاوة الرشيدي
علاوة بالشيكولاتة والمسكرات
علاوة بالخوازيق ودي اللي بتجيدها اوي الحكومة المصرية

الافغاني said...

ياريتني ماقريت خدني يابني

ع العناية المركزة

shaimaa samir said...

هى دى
يا علاوتك يا جمالك
خليت للمصريين ايه
هههههههههههههههه
لنا الله

جزاكى الله خيراااا

Bella said...

Che_wildwing

مرحبا بك

صدقت

من لم يمت بالعلاوة مات بغيرها

تحياتي

Bella said...

أهو ده عيبه

مرحبا بك

وحياتك من ساعة ماسمعت بخبر العلاوة الشؤم دي وانا اصابتني حالة اكتئاب لان كل علاوة بتحصل مصائب كبيرة

المرة دي طبعا المصائب أكبر لان العلاوة اكبر

واللى غايني وفارسني الحقيقة هو رد فعل الناس وتصديقهم ان الحداية ممكن تحدف كتاكيت

بس معذورين برضه
كتر الجوع يخليهم يتصوروا ان الكتاكيت ح تبقى من نصيبهم

تحياتي

Bella said...

بنوتة من وسط البلد

مرحبا بك

والله يااختي الجاز هو كمان غلي دعما لوزارة البترول
اصل مش معقول علشان انت تشتغلي في السيرك المتنقل نوفر لك جاز مدعوم ونسيب وزارة البترول تولع يعني

مش معقول

هههههههههه

انا اخت على فكرة مش اخ

مش عارفة ليه ناس كتير بيكلموني بصيغة المذكر

ههههههههههههههه

تحياتي

Bella said...

appy

مرحبا بك

انا كنت ممونة العربية قبل الزيادة دي بيوم واحد

بس برضه متصورة المنظر عامل ازاي

اصلي جربتها قبل كده ساعة مارفعوا السعر المرة اللى فاتت ومحطات البنزين رفضت تمون علشان يستفيدوا من فرق السعر

ولما تجيبي العجلة عرفيني اشتريتيها منين علشان عايزة واحدة وكمان عايزة اتعلم

هههههههههههه

تحياتي

Bella said...

حاول تفتكرنى

مرحبا بك

الحقيقة باعتباري من مستحقي هذه العلاوة وغيرها من العلاوات المسرحية عمري ماحسيت باي سعادة لما تنزل علينا العلاوة كالصاعقة لانه يسبقها هجوم ضاري من كل من هب ودب حتى بياعين الفجل والجرجير بيرفعوا اسعارهم ونفضل مستباحين لفترة ومعانا طبعا كل الشعب بسبب العلاوة اليتيمة دي

يعني الحقيقة حتى العلاوة دي لاتسعدنا نحن ولا تسعد غيرنا لانهم يتضررون بسببها ايضا

وطبعا طالما ارتفع سعر البنزين معروف ان كل السلع بيرتفع تمنها لان كل شيئ بيتاثر بزيادة اسعار المحروقات

ومازيادة اسعار المازوت ببعيدة

فقد رفعت اسعار كل مواد البناء وكل شيئ

حاجة تحرق الدم صراحة

تحياتي

Bella said...

بنت ابيها

مرحبا بك

هو احنا لسه ضحكنا

الضحك لسه ح ييجي
مش هم قالوا ان العلاوة ستنزل على مرتب هذا الشهر للموظفين واصحاب المعاشات

والدتي اكتشفت النهاردة ان معاشها لسه بدون العلاوة

ههههههههههههههههههه

البجاحة وصلت معهم لحدود غير مسبوقة صراحة
يعني حتى الذكاء الاجتماعي غاب عنهم تماما في توقيت اعلان المصيبة دي
ماانتظروش حتى لما الناس تاخد نفسها شوية

حاجة تغيظ فعلا

تحياتي

Bella said...

آفاق الحرية

مرحبا بك

وانا ايضا لم اكن متفائلة وزاد تشاؤمي بعد زيادة الاسعار وصمت الناس

يعني الحقيقة تصورت ان يعبروا حتى عن سخطهم بشكل ما ولكن وجوم وصمت مريب

ربنا يستر

تحياتي

Bella said...

tamer.sala7

مرحبا بك

حلوة قوي تصنيفات العلاوة اللى قلت عليها دي

فيه كمان

علاوة بالمكسرات

ودي اللى بياخدها الناس في المظاهرات

ههههههههههههههه

عايزين نعمل البوم غنائي معتبر عن العلاوة ونضمنه العلاوات دي

ح يكون البوم مليان سعرات حرارية

هههههههههههه

تحياتي

Bella said...

الافغاني

مرحبا بك

المشكلة ان العناية المركزة مافيهاش مكان فاضي لان غيرك سبق

هههههههههه

ح تضطر تقف طابور بقى

هههههههههه

تحياتي

Bella said...

shaimaa samir

مرحبا بك

احنا لو ابتدينا في عمل البوم العلاوة ح نطلع بقصائد ومعلقات ترد الروح

هههههههههههههههه

تحياتي

Ahmed Ashraf said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات