Monday, May 26, 2008

كابل المحبة اتقطع.. هاتوا وزير اللحام


موضوع انقطاع كابل المودة بين وزارة الضلمة حاليا " الكهربا سابقا " وبين المواطنين حكاية لها العجب.
رغم فواتير الكهربا المولعة نار الا اننا نعاني من الظلام الدامس والانقطاع المتكرر للكهربا حتى أن التيار الكهربي أصبح ضيف عزيز المنال وزيارته لنا نادرة جداً.
وتعاني الاجهزة الكهربية في بيوتنا من هذا الظلم الواقع عليها وتشكو ونشكو معها ونحتسب عند الله ماكنا نملك من اجهزة ومنها المسكين الكمبيوتر الاكثر تضرراً من المهزلة الكهربية.
ونقترح انشاء وزارة خاصة بالكابلات على ان تسمي وزارة الكابلات والطاقة ويرأسها وزير يقال له الوزير اللحام على وزن الوزير الهمام .

لا نطلب منه الكثير كل مانتمناه ان يتفقد احوال الكابلات ويقوم بلحام المقطوع منها حتى ننعم بزيارة السيد تيار عزيز المنال لاننا افتقدناه بشدة ونأمل بل نشتاق لزيارته لنا ولا أراكم الله مكروه في جهاز لديكم وأفاض عليكم بنعمة زيارة السيد تيار ... وفي النهاية اطلب اذاعة اغنية ضي القناديل


38 comments:

... said...

بيللا
يجعل كلامي خفيف عليهم
هلكتيني م الضحك وخصوصا بأغنية ضي القناديل
زي ما أنت مش شايفة احنا في بحر الظلمات
يالطيف اللطف يا رب
أشعر بالمأساة معك وأتمني فقط من الله أن يلهمني الذاكرة لأتذكر شحن الكشاف لأنه ساعة الكارثة بيبقي دايما فاضي
ومن هذا المزنق باطالب الوزير اللحام يا إما يوفر لنا الكلة علشان ننسطل وننسي يا إما يطالب شركات المحمول ترن للمواطنين بموجب اتفاقية محترمة قبل ما يقطع العزيز التيار وله الأجر والثواب

Che_wildwing said...

أنا شايف ان السيد وزير الكهبرا يستحق لقب مطفي مصر
بيقولوا وهو بيحتفل بعيد ميلاده الخمسين طفى خمس احياء في القاهرة
وفي نهاية البروجرام احب اسمع اغنية
قوم ولعلك شمعة

Anonymous said...

أضم صوتى لصوتك وأطلب أغنية قوم ولع

لك شمعة لشادية

Bella said...

بثينة

منورة المدونة

اعمل ايه يااختي بس

كل مايبتدي الصيف ويزيد معدل استهلاك الكهرباء ايشي مراوح على تكييفات على خلاطات تولع الدنيا ويقطع النور كل شوية ولما نشتكي يقولوا حالا جايين في السكة

وحالا دي بقى تمد والعمر الطويل للصابرين

هههههههههههه

واحنا كمان كل ماالنور يقطع نكتشف ان الكشاف مش مشحون

ههههههههههههه

بنفكر نشحنه جبنة قديمة علشان يلعلع لوحده

ههههههههههههههههه

بس حلوة قوي قوي حكاية رنات المحمول دي

بس الخوف بقى لشركات المحمول تستنطع علينا وتقعد تحسب لنا الرنات دي

هههههههههههههههههههههههههه

Bella said...

Che_wildwing

مرحبا بك

حلو قوي قوي اللقب ده

مطفي مصر

ده ممكن نضيفه على قائمة الالقاب المزمع اطلاقها على سيادته وتعميمها على كل الجهات الحكومية

هههههههههههه

وح نسمعك اغنية قوم ولعلك شمعة

بس معاك بطاريات للراديو

ههههههههههههههه

Bella said...

Sherif

مرحب مرحب

كده الطلب ح يزيد على الشمع

ممكن بقى نعمل مشروع قومي لتوصيل الشمع لمستحقيه والمشروع ده ارباحه مضمونة تمام
خصوصا لو كررنا أغنية شادية
ولو عملنا شوية لجان تنبثق عن لجنة الشمع دي ح يطلع لنا مبلغ حلو قوي ممكن نجيب منه كشافات في المرحلة التالية لمشروع الشمع

ههههههههههههه

هشام علاء said...

هذا و قد صرح السيد فتحى سرور بان المجلس يدرس تمرير قانون عاجل على وجه السرعة لفصل وزارة الكهرباء و الطاقة الى ثلاث وزارات

الوزارة الاولى :وزارة الكهربا

الوزارة الثانية:وزارة كابلات الكهربا

الوزارة الثالثة:وزارة ترشيد الكهربا

"
واحد هيسألنى و يقولى يا كابتن هش طب اول وزارتين فهمناهم من البوست بتاع بيلا ..الوزارة التالتة دى بقى اللى حطتها فى الكومنت جبتها منين

هارد عليه و اقوله لو صبر المواطن على النور كان جه لوحده..و ادينى فرصة اكمل الخبر
"

و قد اوضح السيد فتحى سرور ان وزارة ترشيد الكهربا سوف تقوم بدراسة اقتراحات و تطبيق سبل لترشيد استهلاك الكهربا لمنع تهديرها مثل عمل شرائح جديدة لاسعارالكيلوات مع تفكير بزيادة اسعار استهلاك الكهربا بالنهار عن اسعارها بالليل حيث ان الكهربا مش مهمة الصبح و الدنيا نور لكن مهمة باليل و الدنيا ضلمة

و فى النهاية اطلب اذاعة اغنية
يا مرحبا يا مرحبا ..نورك غطى ع الكهربا

تحياتى
هش

بسمه عبدالباسط said...

هو احنا شكلنا هنرجع لعصر الضلمة ونولع شمع واللمبات الخرافية اللى بيتحط فيها جاز دى والحاجات اللى من دى

Empress appy said...

انا ماليه البيت شمع وبعدين زامبيتيكا اللى هو اللاب توف بتاعي مشحوت بالكهربا على طوووووووول
بس برشح الاغنيه تبقى شعار شركه الكهربا

مصــــري said...

بيلا

جيتي علي الجرح

المُـحول عندنا في المنطقة بيفصل بمعدل يستحق يدخل به حوسوعة جينيس.

غير طبعاً حكاية إنهم دايماً جايين حالاً.
عشان خاطر عيون المواطن.

وبعد لما يجي متأخر يأربع ازازاة صاروخ ويقبض ويمشي.

وتقطع تاني.
وهكذا وهكذا.

فكرة حلوة بتاعت وزير اللحام دي.
مصر فيها أكبر كمية من الوزارات.
جت علي دي يعني.

تحياتي
أسامة

عدى النهار said...

ويقولوا أغانى سوقية ومش عارف إيه!! اليوم فقط وبعد سنين طويلة بندرك أحد الأبعاد السياسية والإقتصادية والإجتماعية لأغنية كوز المحبة اللي إتخرم
ولسّه أبعاد أخرى كثيرة سيتم إدراكها مستقبلاً.. أصل أيام اللي بيحكموا البلد ولاّدة وكمان ماتعرفش حاجة إسمها تحديد نسل

Fahd said...

بصي انتي ممكن تعملي حفلة زار

دي متجربة

بس انا عرفت السبب

افكارك مبعثرة يا فندم

ظبتيها علشان التيار المحترم ييجي

مـحـمـد مـفـيـد said...

والله ماتنفع معاهم اي اغاني
عندي وبال فخر امبارح كل ربع ساعه يتقطع

اهو ده عيبه said...

فعلا عندك حق
الموضوع ده زاد قوى عن اللزوم
وتبصى تلاقى الكهربا بتروح وتيجى
والحاجه تنور وتطفى زى ام لطفى

هنعمل ايه منهم لله بقى عايزين يبوظوا الاجهزة
وفكرة وزير اللحام دى فكرة ممتازة ومش محتاجين اكتر من وزير بدرجه دبلوم

Ahmed Al-Sabbagh said...

هههههههههههه

والله انتى فظيعة بجد

انا كنت بموت فى احمد رجب ونص كلمة

بس واضح كدة اننا عندنا نجوم ساخرة اخر

بجد روعة والرسم ده حلو اوى

تحياتى

احمد الصباغ

karakib said...

انا عايز ابقي وزير
ممكن امسك وزير الكابلات
النحاس غلي
و لما اسرق الكابلات هاكسب كويس :)

المخبر العام said...

مقطوع ..فقط..للتضامن مع غزة

rtrcbh said...

السلام عليكم ورحمه الله وبركاته
معك اختنا الكريمه فاصبحنا نرى الان ان معظم شبكات الكهرباء فى مصر متهالكه جدا دون ادنى اهتمام من احد فما بالك والصيف اطل علينا والاستهلاك سيكون اضعاف مضاعفه؟؟!!!!!!!!!!!!!!!!!!!!!

Bella said...

hesham

مرحب بالكابتن هش

ههههههههههههه

بمناسبة الوزارة الابتكارية الثالتة المنبثقة عن وزارتي الكهربا والكابلات احب اعرفك انهم عملوا بنظام الترشيد المبكر زي الانذار المبكر كده واصبح النور عندنا يقطع كل يوم في نفس الميعاد تقريبا من بعد منتصف الليل وحتى بزوغ شمس اليوم التالي

وحتى لو لم يكن لديك ماتفعله في الليل وتحتاج لكهربا كالمذاكرة مثلا او عمل اي حاجة تحتاج فيها لكمبيوتر او اباجورة ستقوم من النوم مفزوعاً بسبب الحر وبعد انطلاق جرس الترشيد وانقطاع النور وزن الناموس

وهكذا

ههههههههههههههههههههه

واحب اطلب اغنية رميت الورد طفيت الشمع ياحبيبي

هههههههههههه

Bella said...

bos bos

مرحبا بك

وحياتك رجعنا من مدة طويلة للحاجات الخرافية دي ونصيحة لكل المقبلين على الزواج ان يضمنوا جهازهم لمبة جاز وكمية شمع كبيرة حتى لايضطروا وهم في بداية حياتهم وامامهم مصاريف كثيرة لانفاق الاموال على شراء الشمع

خليكوا ناصحين وخزنوا شمع من دلوقتي

ههههههههههههههه

Bella said...

appy

مرحبا بك

طيب خللى بالك بقى انا سعت ان فيه حملات لقفش المواطنين اللى بيخزنوا شمع لانهم بيتسببوا في ارتفاع ثمن الشمع وخلق سوق سوداء بعمليات التخزين دي

هههههههههههههههههه

اما المواطنين التانيية بقى اللى بيشحنوا بطاريات اللاب توب بتاعهم لسه ماطلعتش لجان تقفشهم

هههههههههههههه

Bella said...

مصــــري..!!

مرحب اسامة

حكاية العامل اللى بييجي يصلح النور دي ويقربع الصاروخ ويقبض ويمشي دي منتشرة قوي
واعتقد ان تكرار قطع الكهربا الغرض منه ابتزاز المواطنين لدفع المزيد للباشا اللى بيصلح

واللى مش ح يدفع خليه بقى يفكر ويتأمل براحته في الضلمة

لك على اول ماامسك وزارة اللحام ح اشوفك بمنصب حلو

بس دعواتك

ههههههههههههههه

Bella said...

عدي النهار

مرحبا بك

شفت بقى الاغنية طلع لها ابعاد غير مسبوقة وكلنا كنا بنتكلم عن كونها ركيكة ومسفة ومن قلة عقلنا كنا محملينها مسؤولية الهبوط بالذوق العام
واهي طلعت اغنية طليعية هادفة ولها فوائد لو تعلمون عظيمة

بس احنا كده دايما افقنا ضيق ومابنعرفش نستشرف المستقبل

بكرة نعرف ان شاء الله

ههههههههههههههه

Bella said...

fahd

مرحبا بك

جربنا حفلة الزار
ودبحنا ديك منقط وبشوشة حمرا
وفرخة يتيمة وامها مخططة

وجبنا رجل خفاش بمبي

وعملنا عمل وبخرنا المنطقة كلها ومافيش فايدة

طيب ح اشوف حكاية الافكار يمكن العيب فيها

يمكن لو لميناها النور يبطل يقطع

ههههههههههههههه

Bella said...

مـحـمـد مـفـيـد

مرحبا بك

احنا ارحم بقى

بيقطع عندنا بالساعات لغاية ماتفقد الامل في انه جاي

ودي ميزة لعلمك

يعني انتم يامساكين يامواطني الربع ساعة تلاقيكم ياعيني قلبك متعلق بالنور وعمالين تفركوا ايديكم من العصبية والنرفزة وكتر الانتظار وييجي ويقطع

احنا بقى بنريح دماغنا بسبب طول المدة ومابننتظرش

ههههههههههههههههه

Bella said...

اهو ده عيبه

مرحبا بك

والله الواحد فعلا زهق من كتر الجري ورا فيش الاجهزة لشيلها وتركيبها لما النور ييجي

حاجة مملة قوي صراحة

وطبعا حماية الاجهزة مسؤولية كل مواطن والهيئة غير مسؤولة

يعني الاجهزة تولع هي واصحابها مالهمش دعوة

المهم يحصلوا الفواتير وعليها رسوم النضافة ويرفعوا في اسعار الشرايح واللى مش عاجبه يتفلق ويتأمل في الضلمة بقى

اما الوزير ابو دبلون ده فممكن نستبدله بواحد لسه في الاعدادية ويتدرج في المناصب لغاية ماياخد الدبلون

هههههههه

واهو يتعلم فينا برضه

مصــــري said...

عزيزتي بيلا

بالنسبة إنك هاتمسكي الوزارة...يبقي لازم تبيعي ضميرك.
وده شئ أشك فيه علي أي حال.

وبالنسبة للمنصب اللي انتي ناوية تضعيني فيه.
خليني أصلح محولات.
واشرب صواريخ واقبض.
يمكن يتحقق حلم أمي وأسمن شوية.

تحياتي
أسامة

Bella said...

Ahmed Al-Sabbagh

اهلا يااحمد

يعني يااحمد وانا اطول تحطني جنب احمد رجب مرة واحدة

هههههههههه

ياسيدي شكرا على المجاملة اللطيفة دي
وربنا مايقطع لكم نور ولا يغلب لكم عداد يارب

اما الصورة فربنا يخلي لنا الحاج جوجل ومايحرمناش من خدماته يارب

هههههههههههههههه

منور

Bella said...

karakib

اهلا وسهلا

ممممممممممم

راسم على اغلى منصب في الوزارة ياعفريت

اتاريهم بقى بيقطعوا النور كتير علشان الكابلات بتبقى منتدبة في حتة تانية

هههههههههههههههههه

ماشي ياسيدي

بس لو مسكت وزير الكابلات خللى بالك من شارعنا وشوفنا بشوية خدمات على هامش حفلة الكابلات دي

هههههههههههههه

Bella said...

المخبر العام

اهلا بالباشا

ممممممممممم

طيب وقبل النور مايقطع عن غزة كنا متضامنين مع ساحل العاج ولا ايه

ههههههههههههههههه

Bella said...

د/أبويحيى وادم

مرحبا بك

الحقيقة ان شبكة الكهرباء بالفعل متهالكة وبلا صيانة في مناطق العامة والدهماء من امثالنا

اما اصحاب الفخامة والعلو فلاينقطع لهم تيار ولايظلم لهم دار

يعني

ولوزارة الكابلات في صيانة شبكتها شؤون

Bella said...

مصــــري..!!

مرحبا بك

انا مش عايزة امسك حاجة صراحة

هههههههههههههه

العملية مش ناقصة

لكن ممكن نعمل حكاية تصليح الكابلات دي

واهو نشرب لنا حاجة سقعة ونطري على قلوبنا وجيوبنا بقرشين حلوين كده ويجعله عامر

ههههههههههههههههههههههههههه

وبالنص بقى ياعم

fagr said...

هههههههههههه

حقيقى دمك زى السكر وأسلوبك ساخر ومعبر

نضحك على همومنا احسن ما نطق "بتسكين النون"

خيرالدين said...

المفروض كمان يراعوا اننا فى ايام امتحانات مفترجه وفيه طلبه مجتهدين ومتفوقين زيى الوقت اللى الكهرباء بتقطع فيه ده بيفرق معاهم

Bella said...

fagr

مرحبا بك

والله ياعزيزتي الجو العام ومايحدث فيه هو مايوحي بهذه الكوميديا السوداء الحقيقة

مازال مسلسل انقطاع الكهرباء يتوالي يوميا عندنا حيث تغرق المنطقة بالكامل في ظلام دامس من بعد منتصف الليل وحتى قرب الفجر
وعندما استفسرنا قيل لنا بأنهم يغيرون شبكة الوصلات المتهالكة باخرى جديدة

مش عارفة ازاي يعني يتم التغيير في هذا الظلام الدامس رغم ان النهار كما يقول المثل له عينين واشمعني يعني بعد منتصف الليل

مش قادرة الاقي اجابة منطقية

احنا خلاص في مرحلة مابعد الطققان

تحياتي

Bella said...

e7na

اهلا اهلا

بالعكس بقى

ده قطع التيار بشكل متكرر مايحلاش غير ايام الامتحانات

ويعني ايه طلبة مجتهدين والكهربا تفرق معاهم

بطلوا حجج بقى

اللى ذاكر ذاكر من زمان

هههههههههههههههههه

واللى ذاكر ذاكر على لمبة جاز او عمود نور في الشارع

المشكلة ان اعمدة الانارة مظلمة

واللى عايز يذاكر النهار قدامه طويل ومش لازم يعمل اي حاجة في حياته ولا يدور على هدوء الليل وحجج الطلبة دي

هم عارفين الوقت المناسب اكتر منه

ههههههههههههههههههه

Unknown said...

سؤل وزير الكهربا مره فى هذا الموضوع وطبعا لا يستطيع انكار الظاهره اوم عمل ايه
اطلق تصريخا له العجب
قال اعترف ان انقطاع التيار لا يزال اعلى من المعدل العالمى
يعنى استخرج حاجه اسمها المعدل العالمى لأنقطاع التيار يعنى المشكله عالميه
وللسبد الهمام اقول اننى عشت سنوات وسنوات فى الغرب ولم ينقطع التيار مره واحده بل عندما حدث منذ سنوات بعيده فى نييورك
دخل الحدث كتب التاريخ

Anonymous said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات