Tuesday, May 20, 2008

أحدث نكتة نظيفة

الحقيقة رغم ان الجو العام لايوحي بالرغبة في إلقاء نكات فضلاً عن الضحك عليها إلا أني قررت أن أفك عنكم طبقة النشا التي تغلف حياتكم وتجعلكم مكفهرين ولاتضحكون رغم أن الضحك أمامكم وخلفكم فأين المفر؟

والنكتة اليوم نظيفة نسبة للدكتور نظيف وليست صفةً للنكتة التي هي عكس غير النظيفة أعزكم الله
والنكتة تبدأ بإنتهاء منتدى دافوس الاقتصادي الذي يبدو أنه ملهم لكل من يحب أن يصبح خفيف الظل في هذا العالم الملئ بالأحزان حيث صرح السيد الاستاذ الدكتور رئيس الوزراء أحمد نظيف أن

الحكومات التي لاتخطط لمستقبل بلدها لاتستحق أن تقود

بتضحك على ايه انت وهو وهي
فيه حاجة في العنوان تضحك ولا قاصدين يعني تقولوا للدكتور بص في المراية وأنت بتتكلم وقول لنفسك الكلام ده انت ووزراءك !!!!

أخص عليكوا اخص
مش عيب
طيب استنوا لما تقروا كلام الراجل مش يمكن تلاقوا فيه حاجة مفيدة ولا يمكن تلاقوا تفسير للعنوان ده !!!!!!

أكد الدكتور أحمد نظيف رئيس مجلس الوزراء أن مصر وهى تتطلع لمستقبل أفضل لأجيالها لا تتعامل مع الأمور بارتجال بل إنها تستند إلى خطط وبرامج مدروسة بعناية وواقعية تراعى متطلبات العصر على نحو ما تجسد بالفعل فى برنامج الرئيس حسنى مبارك الانتخابى الذى تضمن أهدافا وأرقاما والتزامات محددة يتم تنفيذها على مدى ست سنوات .

والله يادكتور أكيد العيب في فهمنا للأمور ولا يمكن مفرداتنا اللغوية بعافية شوية ومش عارفين الفرق بين الارتجال والبتنجان علشان كده ماقدرناش نحس بالخطط المرسومة بعناية وواقعية ولا يمكن العيب بقى في فهمنا لمتطلبات العصر
الخلاصة العيب فينا وانتم عداكم العيب وأزح.

وأوضح الدكتور أحمد نظيف أن برنامج الرئيس حسنى مبارك الانتخابى يتضمن بالفعل برامج وأرقاما محددة وملزمة حول ما سيتم انجازه خلال السنوات القادمة من خطوات على طريق الإصلاح الاقتصادى والسياسى ومشروعات للبنية الأساسية والمرافق وعدد المدارس والمستشفيات وغيرها والتى سيتم اقامتها بالفعل .. مشيرا إلى أنها برامج تراعى احتياجات المستقبل على المديين القصير والمتوسط .

أمال احنا ليه مش شايفين اي انجازات ولا شايفين الا ارتفاع مهول في الاسعار لايتناسب مطلقا مع دخولنا التي هدتها زيادات الاسعار حتى تحولنا من محدودي الدخل لمهدودي الدخل وتباعاً صرنا معدومي الدخل ولا تكونش حضرتك تقصد اننا لازم نستنى يعني المدى القصير والمدى الطويل اللى اصبح اطول من الليلة حالكة السواد !!!
يبقى العيب في النظارات اللى احنا لابسينها
فعلا محتاجين نغير كشف النضارة ونعمل عدسات الوان من المنتشرة دي حتى بيقولوا عليها موضة ومتوفر منها كل الالوان حسب الوان اللبس .
يبقى الحل بقى علشان ترتاحوا وتريحونا ندشن حملة قومية لتوفير العدسات الملونة للشعب بمختلف فئاته خصوصاً أننا متخصصين في حكاية الحملات والمؤتمرات التي تقام على هامش كل حملة ونديها بقى عدسات ملونة ان شالله ماحد حوش.

وقال رئيس الوزراء إنه يؤمن بأن الحكومات التى لا تخطط لمستقبل بلدها ولا تضع الحلول لحل مشاكل البلاد وتكون مستعدة لقبول المحاسبة لا تستحق أن تقود بلادها .

طيب يادكتور مابلاش انت خصيمك النبي اللى تقول الكلام ده علشان حرام عليك الناس اللى بتقرا الكلام ده مرارتهم اتفقعت خلاص ودي لعلم سيادتك مش مرارتهم الحقيقية لان التانية اتفقعت في حملة تصريحات سابقة, دي مرارات كاوتش استبدلوها بمرارتهم المفقوعة سابقة ودي كمان تلاقيها اتفقعت دلوقت وتلاقيهم بيتصلوا بالوكيل المعتمد لتوريد المرارات الكاوتش.
خايفة يادكتور يتهموك انك متفق مع السيد الوكيل المعتمد بالتآمر عليهم حتى يستهلكوا أكبر قدر ممكن من المرارات في عهدكم الميمون!!!!

وقال رئيس مجلس الوزراء الدكتور أحمد نظيف إن مصر ومن خلال ما لديها بالفعل من امكانيات مادية وبشرية وموقع استراتيجى إنما تستحق مكانا بارزا فى منطقتها بحلول عام 2025 .

لسه ح نستنى لغاية 2025 يامين يعيش يادكتور
تلاقيك طبعا عارف حكاية جحا لما عرض على السلطان يعلم له الحمار بتاعه القراءة ولما الناس قالوا له انت مش خايف رقبتك تطير قال لهم لما ييجي وقتها يايكون الحمار مات يااكون أنا مت يايكون السلطان مات
العمر الطويل بقى لسعادتك ونعيش ونشوف الانجازات البارزة دي ولو اني مش عارفة ح تبرز فين يعني !!!
ماطول عمر مصر مفروض حسب الكتاب مابيقول عندها امكانيات بشرية تهد جبال ودلوقتي بفضل سياستكم الرشيدة اصبحت يااما مهدودة اصلا يااما طفشانة او بتحاول تطفش لانها مش لاقية لقمة العيش.
وبرضه الكتاب كان بيقول ان مصر لها موقع استراتيجي مفروض انها لسه في موقعها ده ولا يكونش اتغير في حركة تغييرات المحافظات اللى فاتت !!!
أما بقى الامكانيات المادية فإن الله حليم ستار مش ح نتكلم في دي علشان الكلام في الفلوس بيشيل النفوس وخليها علينا المرة دي.
مش فاهمة بقى ليه مصر تراجع دورها البارز وليه لازم نستنى لغاية 2025 لحد ماربنا ينفخ في صورتنا ويبرز لنا دور جديد !!!!

وأشار إلى أن الحكومة لا تخشى من وضع أرقام يمكن محاسبتها على مدى الالتزام بها .. موضحا أن حرص الحكومة وكبار مسئوليها على المشاركة فى فعاليات منتدى دافوس بشرم الشيخ يعد فى حد ذاته جزءا من حرصها على الشفافية ، بدرجة ربما لم تكن متوافرة من قبل ذلك ، واستعدادها لأن تكون موضع محاسبة .

بيعجبني في حضرتك الثقة اللامحدودة وطبعا حضرتك سيد العارفين واحنا لاشعب بيحاسب ولا بيتهبب يمكن يكون بيتهبب طبعا في ظل السحابة السوداء التي تطل علينا كل عام وفي ظل معدلات التلوث التي جعلت القاهرة من اولى عواصم العالم في معدلات التلوث والحمد لله على كل حال أدينا لحقنا رقم عالمي بدل ماشكلنا بقى وحش قوي بين الامم واحنا مش لاقيين مكان نحط رجلينا فيه في اي قائمة ودائما نخرج قفانا يقمر عيش في المحافل الدولية .
معلش اعذرنا سيادتك اصل الجعان يحلم بسوق العيش واحنا حياتنا كلها بقت طوابير في طوابير علشان العيش فتلاقي الكلمة دي لازقة في بقنا زي اللبانة ونعدك نبطل نمضغ لبان لانه بيلزق في الهدوم .

*****

الحقيقة ياإخواني النكتة لم تنتهي ولكن لاني استنفذت الكمية المحددة لهذا اليوم من المرارت الكاوتش فمضطرة آسفة اترككم بمفردكم مع باقي النكتة في اللينك المذكور واللى عايز فيكم يشتري مرارات كاوتش يعرفني علشان أوصف لكم الوكيل المعتمد لان السوق مليان مرارات مضروبة. واوعوا تعملوا حركات من غير شعر (قرعة يعني) وتزوغوا من قراءة باقي النكتة بكرة ح امتحنكم فيها واللى مش ح يعرف يجاوب ياويله ياهباب ليله انا باقول لكم أهو واللى أوله شرط آخره نور والفاتورة بدون رسوم نظافة

ههههههههههههههههههههه

13 comments:

مصــــري said...

بيلا

طبعاً الدكتور نظيف -أطال الله طوله وحفظ قدرته علي تنظيف الجيوب- علي حق.

وبالنسبة لبرنامج الرئيس فهو مُعطل أساساً فمشروع مبارك للاسكان مُعطل بسبب ارتفاع سعر الحديد.

لكن دائماً أبداً نقول إن الدنيا حلوة والامن مستتب وكله تحت السيطرة.

تحياتي
أسامة

عصفور المدينة said...

والله هي حكمة
الحكومات التي لاتخطط لمستقبل بلدها لاتستحق أن تقود

Bella said...

مصري

مرحبا بك

ياسيدي ربنا مايحرمنا من طوله ولا عرضه اللى وقعنا فيه يسيبنا في حالنا ومش عايزين نضافة

اما برنامج السيد الرئيس فنفسي اعرف بيتذاع على اي قناة علشان اتابعه

اصل كل شوية يقولوا البرنامج بيقول
البرنامج فيه
البرنامج مااعرفش ايه

وقاعدين نتابع ولا شايفين اي برامج

يظهر النور عندنا قاطع بقى

والبركة في الحديد اللى قرب على 8 آلاف جنية

نقطع روحنا يعني

اكيد الحياة حلوة

بس احنا اللى شعب فقري ونحس

هههههههههههههههه

Bella said...

عصفور المدينة

مرحبا مرحب

ايه الغيبة الطويلة دي

يارب يكون النت عندكم تعافى

هي فعلا كلمة حكمة

بس النفس اللى تنفذ

هههههههههههه

رئيس جمهوريه نفسى said...

طيب ممكن سوال
ااقرب توكيل ماراه صلب مش كاوتش علشان تستحمل فين
احمد نظيف القى الكلمه فين فى منتدى دافوس يبقى مش موجهه للمصريين ده بيكلم الاجانب اعتقد انى الصوره وضحت

Bella said...

رئيس جمهوريه نفسى

مرحبا بك

مرارة صلب !!!!

كده ح تخرب لنا الشغلانة ياعم

الصلب دي ماتنفعش اصلا

مفروض المرارة تكون مرنة علشان تؤدي وظيفتها

وكمان تنفقع فتغيرها

يعني عايز الاخ الوكيل لمعتمد يفلس يعني علشان العالم اللى بتتناصح وعايزة مرارة صلب

قال صلب قال

هههههههههههه

لو جبت زبونين ح تاخد واحدة مجانا

خليك حدق

هههههههههههه

بعدين بيقول تصريحاته للاجانب بيقولها لبلاد تركب الافيال المهم انها تصريحات مستفزة ومليانة كذب وخلاص

تحياتي

مواطن مصري said...

الخبر من عند يساري مصري

من عمال المحلة المعتقلين:

رسالة إلى نادي القضاة

نتوجه نحن المتعقلين السياسيين الثلاثة من سجن برج العرب بالإسكندرية إلى نادى قضاة مصر ورئيسه المستشار زكريا عبد العزيز برسالتنا هذه …

“سيادة المستشار.. ونحن فى شدة الاعياء بعد مرور أكثر من أسبوع على اضرابنا عن الطعام نتقدم إلى نادى القضاة بهذه الصرخة باعتباره الدرع الباقى والوحيد لكل المظلومين فى مصر..

نود فى البداية تصحيح بعض المعلومات التى تسربت إلى الصحف عن نقلنا –نحن الثلاثة- إلى مستشفى السجن نتيجة لاضرابنا عن الطعام، ولصحيح أننا لازلنا فى السجن بعد رفض الادارة استدعاء سيارة اسعاف تنقلنا إلى المستشفى وعدم قدرة الزميلين كريم البحيرى وطارق أمين السير على الأقدام نتيجة لاعياء الشديد الذى يعانيه واستبدلت ذلك باحضار “ممرض” لفحص “كريم” الذى ساءت حالته للغاية.

ما نريد معرفته هو سب بقاءنا فى المعتقل حتى الآن، وحتى تصلنا الاجابة فنحن مستمرون فى الاضراب عن الطعام حتى الموت أو معرفة السبب!

لقد تم تعذيبنا فى مقر مباحث أمن الدولة فى المحلة أيام 6 و7 و8 أبريل الماضى التى قام رجالها بتعذيب “كريم” بالكهرباء وتوجيه الاهانات لـ “طارق أمين” و”كمال الفيومى” وبعد ذلك قضينا 11 يوما فى سجن برج العرب بزنزانة للجنائيين، وبعد قرار محكمة طنطا اخلاء سبيلنا تم احتجازنا لأربعة أيام فى نقطة شرطة السلام على حدود المحلة طنطا، قبل أن يتم نقلنا من جديد الى سجن برج العرب لنبدأ بعدها اضرابا عن الطعام.

ونحن من معتقلنا هذا نطالبكم وكافة القوى السياسية التحرك والضغط للافراج عن كافة المعتقلين فى أحداث المحلة.

التوقيع:

كمال الفيومى – طارق أمين – كريم البحيرى

عمال المحلة المعتقلين

سجن برج العرب


عنبر 22 زنزانة 5

Fahd said...

علي فكرة لم تكن هذه النكتة نظيفة

كانت نكتة .....ولا بلاش


شر البلية ما يضحك يا اخي

هو مفكر الناس اللي بيقول لهم الكلام ده هبل ولا داقين عصافير طبعا هما عارفين انه كذاب

يلا مش فارقة كتير

حسن مدني said...

طب والله الراجل عنده حق تماما (في الجملة الأولى فقط) وهي

الحكومات التي لاتخطط لمستقبل بلدها لاتستحق أن تقود

بعد كده ممكن نطبق الكلام ده عليه، لنرى إلى أي مدى يستحق مكانه

تحياتي

دكتور كسلان said...

والله ما عادت بتفرق معايا
خلاص الناس دى زى ما بيقولوا
خلعت برقع الحيا
اهو بيقول اى كلام وخلاص

يمكن يكونوا فعلا بيخططوا
بس بيخططوا هيدوا توكيل المرارات لمين
انا سمعت الدكتور هانى سرور عايز يمسك التوكيل ده
وهو بيوعد الشعب انها هتكون ملوثة
عشان الناس تموت وترتاح


ملحوظة بعيد عن الموضوع
النهاردة تم توقيع اتفاق الدوحة بين الفرقاء اللبنانيين
انا مبسوط عشان الصراع قرب ينتهى
بس وا اسفاه على دور مصر

سلااام

الكاتب المصرى said...

بعد التحيه والسلام
انا مش عارف انتوا عايزين ايه قاعدين تتكلموا و خلاص
انتى عايزه الحكومه تخطط و تعمل برامج و ارقام و كمان عايزاها تنفذ البرامج
و اخيرا الحكومات التي لاتخطط لمستقبل بلدها لاتستحق أن تقود لكن ممكن تلم الاجره و تقطع التذاكر

خواطر رئيس شاب said...

ممكن اسال سؤال مهم جدا


المرارات الكاوتش كويسة

بتستحمل يعنى

ولا زى الطبيعى

انا سمعت ان فى مرارات حديد انتاج مصانع العز مش هاتقدر تفقع مرارتك

المصانع دى فى الدخيلة

Empress appy said...

مش انا من زمان كتبت وقولت القطنه طلعت بتكدب مصدقتونيش ليه
بس تصدقى طلع دمه خفيف المضروب
وبعدين لو سمحتى بتنجان دى لقبى يعنى متحطيهاش فى كلام الناس الوحشين دول من فضلك
اما المرارة انا استنفذتها من زمااااااااااان واستوردت وسمعت كلام مانتى حبيبتى وقولت همشى من غير واهو اخف وزنى شويه نصيحه مجربه