Saturday, May 10, 2008

تخاريف تنموية

أرجو من الله ولا يكثر على الله أن يفتح على ويطيل في عمري حتى أفهم ماهية وزارة التنمية الإدارية بالضبط وأن أفهم تصريحات السيد وزيرها الهمام الذي يخرج علينا كل فترة وأخرى بتصريحات تشيب الكتكوت وآخرها هذا التصريح الخزعبلي

الناس بره نفسهم في وزير مالية زي بتاعنا

الحقيقة قعدت اقلب التصريح يمين وشمال أني الاقي فيه حاجة استشف منها نوبة الضحك التي اصابتني بعد رؤية العنوان

قلت توكلنا على الله اشوف الخبر بقى وأعصر على روحي شوال ليمون في هذه اللحظة التاريخية الهامة والتي تمر فيها البلاد بتطورات هائلة تجعل بلاد العالم قاطبة تحسدنا وتتمنى أن ينعم عليها الله بوزير مالية كوزيرنا العظيم وعرفت سبب مشاكلنا الهائلة والتي كنا نعزوها من فرط جهلنا وسوء نيتنا لعيوب في أداء الحكومة ولكن ظهر الحق وزهق الباطل وتكشفت الحقيقة ساطعة كنور الشمس حيث اتضح ان دول العالم تحالفت مع مجموعة من السحرة لكتابة عمل سفلي جبار يفسد أداء الوزير حتى يضطر للهروب من مصر ويحرمنا من عبقريته والمعيته فيخطفوه ويستفيدوا من علمه الغزير وخبرته الضاربة في عمق جذور أداءه الحميص ( وماحدش يسالني عن معنى الجملة السابقة أحسن له) المهم أن الرجل طلع ماحصلش واحنا اللى مش فاهمين حاجة ومفروض بقى نتلم ونحس على دمنا ونحمد ربنا على النعمة اللى بين ايدينا ومش حاسين بيها قبل ماتزول من وشنا الفقر

جتنا نيلة شعب فقري صحيح مايقدرش الكفاءات النادرة

والحقيقة التي لايجب أن ننكرها أن السيد الوزير أحمد درويش درويش فعلاً ولديه حس فكاهي عالي جداً لم نفطن إليه من قبل !!!
ومهمتي أن أكشف لكم هذه الكنوز الفكاهية لعل وعسى يأتي عليكم اليوم الذي تقدرون فيه قيمة وزراءكم وتقلعوا عن سوء النية المتأصل فيكم

قال الدكتور أحمد درويش، وزير الدولة للتنمية الإدارية، إن الحكومة اعتبرت أي مالك لسيارة خاصة "من أهل القمة وذوي المستويات الاجتماعية العليا، بعدما انتبهت في سبيلها لتوفير علاوة الرئيس، إلي امتلاك مليوني أسرة سيارات خاصة، بينها 300 ألف أسرة تمتلك أكثر من سيارة".

هل رايتم ياأهل القمة يامن تدعون الفقر وتنظمون المظاهرات
والله وطلعتم من اهل القمة
يعني اللى عنده سيات ولا 128 طلع من اهل القمة ومخبي علينا وعامل فيها غلبان وبيعاني

وأكد الوزير حسبما ذكرته صحيفة البديل أن "الزيادة الحقيقية لأسعار النقل لا ترفع أسعار الحديد أكثر من 70 قرشا للطن الواحد، مع التزام وزارة التضامن الاجتماعي بسداد فارق ارتفاع أسعار السولار لأصحاب المخابز".

عرفتم بقى كم التجني والظلم الذي ارتكبتوه الايام الماضية بإدعاءتكم الكاذبة ان رفع سعر البنزين قد رفع سعر كل شيئ
اهو طلع سبعين قرش بس ياظلمة يامفتريين
اخص عليكوا
اخص

وأضاف درويش - خلال حديثه لأعضاء نادي المعادي ، في حفل تكريم عدد من الحاصلين علي دورات في التنمية البشرية - إن "العالم يحترم وزراء الحكومة في المنتديات الاقتصادية، وأن أحد وزراء منظمة التعاون الدولي طالب باستعارة يوسف بطرس غالي، وزير المالية المصري، لضبط ميزانية بلاده وإصلاح أوضاعها المالية".

وقال درويش: "الناس بره نفسهم في وزير مالية زي بتاعنا".

الحقيقة قلبي اتقطع وانا اقرأ هذا الكلام الذي يفيض رقة وعذوبة ولمت نفسي كثيراً على تقاعسي عن تنظيم حملة قومية للهتاف بحياة السادة الوزراء وعلى راسهم وزير المالية ومطالبة الشعب الظالم بالافراج عنهم حتى يتمكنوا من السفر للاحتراف بالخارج وتكوين مستقبلهم بدلاً من ضياع فرصة عمرهم في خدمة شعب لايُقدر جهودهم الجبارة ولا يكافئهم بما يستحقوا !!!

وأرجع تفوق أي دولة "إلي نظمها الإدارية وليس لمقوماتها ومواردها الاقتصادية".

وقال إن "مستقبل مصر في اقتصاد الخدمات، بعد تراجعها في تصنيف التنمية البشرية للمركز 129 بين 192 دولة، رغم احتلالها المركز 28 في خدمات الحكومة الإلكترونية".

فهمتوا بقى ياشعب مش فاهم اقتصاد ولا فاهم اي حاجة

المشكلة طلعت في النظم الادارية مش في الموارد الاقتصادية !!!!

وعاملين نفسكم شعب فكيك وحضارة سبعتلاف سنة وحركات ولاأنتم فاهمين حاجة

بس الحقيقة اللى مش قادرة افهمه ازاي مصر تتراجع في تصنيف التنمية البشرية رغم اننا عندنا وزارة طويلة عريضة للتنمية الادارية !!!!

تلاقيهم مش فاهمين قيمة الناس دي برضة زي احنا ماطلعنا مش فاهمينهم ههههههههههههههههههههههه

وأكد درويش أن الحكومة بصدد «فرض ضرائب جديدة علي عمليات الدمج والاستحواذ، وليس التداول، داخل البورصة، لتجاوز أرباح تلك العمليات المليارات دون خضوعها لأي ضرائب، مع فرض ضرائب أخري علي التصرفات العقارية وعمليات التسقيع للأراضي والوحدات السكنية».

طبعا حزمة جديدة من التشريعات الضريبية وتسميات غير مفهومة لشعب فهمه محدود زينا كفيلة بلجم اي لسان يفكر في الاعتراض هههههههههه

وقال إن "رجال الأعمال يدفعون الضرائب بانتظام ولانعرف متهرباً واحداً منها بعد تخفيض قيمتها من 42% إلي 20% من الأرباح".

وأكد "مراجعة الحكومة اتفاقيات تصدير الغاز التي عقدتها مع الدول الأجنبية وبينها ألمانيا وإسرائيل، بهدف تعديل أسعار البيع بعد ارتفاعها محليا وعالمي".

شفتوا بقى حتى رجال الاعمال طلعوا مظاليم معاكم ياشعب مفتري وبيدفعوا ضرايبهم وبيتفرجوا على إعلانات الضرايب مصلحتك أولاً وانتم يامفتريين بتتهموهم بالتهرب الضريبي وبالاضرار بمصلحة الوطن

تباً لكم

تباً لكم

يالهوي

بذمتكم شفتوا تصريحات فكاهية زي دي !!!!

والله لهم حق دول العالم المتحضر يحسدونا على النعيم المقيم الذي نحيا فيه لان حياتهم جافة وتفتقد لهذه الروح الكوميدية الجميلة

هههههههههههههههههه




22 comments:

دعاء said...

أيه يا بيلا؟؟ تسميات إيه ألي مش مفهومه؟؟ ما الكلام مفهوم اهو تمامًا

-----------

فرض ضرائب جديدة علي عمليات الدمج والاستحواذ،
---------------

الراجل بيقول اهو أن حتى العفاريت في بلدنا مش هتسلم من الضرائب وأي عفريت هيفكر يستحوذ على بني ادم لازم يدفع الضريبه الأول

الكلام مفهوم جدًا بس احنا ألي شعب مبيركزش ..

والله ضحكتيني يا بنتي

على العموم احنا لمصلحة الدول الاجنبيه الشقيقة ممكن نتبرعلهم بالوزير يتفضلوه وفوقه وزيرين هديه.

و نعمل عرض خد وزير تاخد اتنين فوقه مجانًا واحنا الكسابنين


وشر البلية ما يضحك فعلاً

جبهة التهييس الشعبية said...

نفسهم فيه؟

طب والله ماهو راجع

مصــــري said...

درويش يمتلك اسم علي مسمي,ولان الطيور علي أشكالها تقع فسيكون وزير المالية هو الالمعي الاريب يوسف بطرس غالي الذي كان له الفضل وبرعاية رئاسة الوزراء بحذف طبقة محدود الدخل من الوجود وإنشاء طبقة معدومي الدخل و(معضوضي)الدخل.
ياريتهم كانوا أخذوه علي الاقل كنا سنجد دولة نقارن بها أنفسنا ونقول نحن أحسن من الدولة الفلانية رغم أن وزيرها هو السيد العّلامة العبقري يوسف بطرس غالي.

بيلا...دفعتي الضرايب؟...يابنتي مصلحتك أولا.

Che_wildwing said...

معلش يابيلا
في موضوع الغاز
أعتقد ان احنا كنا مخطئين
حين ركزت قوى"عفوا" المعارضة
على جزئية السعر
وتناسينا لمن يصدر هذا الغاز
أعتقد أن رفع السعر ليس هو المعضلة
ولكنها الليرالية ياعزيزتى

soosa el-mafroosa said...

و الله احنا بنظلمهم
دايما مسحوبين من لساننا كده

حسبي الله و نعم الوكيل فينا يا جدعاااان

سبهللة said...

حبيت ابارك لك يا بيلا على انضمامك لجماعة سواقين التاكسى المحزوقة
المفروض الريس بتاعنا يجيب الوزراء الامامير دول وكل شوية يرقيهم من العين والحسد
الدول العظمى حاسدانا عليهم
صحيح ما الكحكة فى ايد اليتيم عجبة
وعجبى

Fahd said...

انت بتقول كلام حلو

كلام حلو وباين عليه مهم

هو انت مين

Empress appy said...

ههههههههههه هى مالها التصريحات النهارده بضحك ضوحك فزيع كده
يعنى روزا هانم اليوسف وكمان السيد المبجل الوزير الفذ
ايوووون انتم شعب مندس جوه مصر
اللى هما بيتكلموا عليها دى مش اللى عايشين فيها احنا
وبعدين انا قولت لكم فى بوست حوار على المصطبه انه معتبر السيات
جاغور بس متنكرة علشان الضرايب
يعنى بطوط بتاعتى الماروتى بيها انا طلعت من القمه اممممممممم
تصدقى نوبحث الفكرة دى
اه يا مرارتى على الصبح
بقولك ايه ما تكلمى السحرة يشلونا من هنا او يشلوهم

خواطر رئيس شاب said...

يا سيدى الفاضل نحن دولة تملك حضارة السبع تلاف سنة يعنى عندنا كل المقومات الملموسة والمحسوسة لامتلاك وزراء على مستوى عالى من فكر الدراويش والغالى والنضيف

micheal said...

تصريحات المسئولين عندنا

علم يستحق الدراسه
:)
تحياتي

Bella said...

دعاء

مرحبا بك

اول ماشفت اسماء الضرائب الجديدة مسكتني كريزة ضحك وقعدت افكر بيجيبوا منين الاسماء الخزعبلية دي

ههههههههههههه

بس فعلا على رايك الاسماء مفهومة بس النفس اللى تركز

هههههههههههه

بس احنا بقى لازم نبقى ناصحين ونعمل زي نوادي الكورة
لو اي بلد عايزة تستعيره او يحترف عندهم يتفضلوه وح ندفع لهم عليه مبلغ محندق نلمه من بعض

بدل ضرايب يعني

اصل لو غلطنا وطلبنا فلوس ح يرموه في وشنا

ههههههههههههههههه

تحياتي

Bella said...

جبهة التهييس الشعبية

مرحب نوارة

باين عليهم نفسهم حلوة

هههههههههههه

واحنا علشان مانكسرش نفسهم ح نبعته لهم وعليه شوية هدايا

ايشي بلاص مش على ربطة بصل اخضر معتبر لزوم تعديل نفسهم دي

هههههههههههه

تحياتي

Bella said...

مصري

مرحبا بك

مصلحتي ايه بس

شوف مصلحتك انت الاول ياسيد

ههههههههههه

الحقيقة ان السيد وزير المالية نجح نجاح منقطع الجماهير في تجويلنا لشعب من الشحاتين وطبعا السيد درويش الدرويش يريد ان يقوم بواجب نفاق ومحلسة مع السيد الوزير فوق جثتنا

خليهم يتهنوا ببعض

بس مش كده يعني

يعني يحاول يلم نفسه ويرشد تصريحاته شوية

والله مفروض يعملوا ضرايب على التصريحات الحكومية
لو عملوا الضريبة دي كلهم ح يخرسوا وبكده نرتاح من طلعتهم البهية

تحياتي

Bella said...

Che_wildwing

مرحبا بك

الحقيقة يبدو ان البعض من قوى المعارضة قد اقنع البعض الآخر انه لن يجدي الاعتراض على اسرائيل نفسه وسيظل الوضع كما هو عليه ولنذهب جميعا للجحيم ففكروا ان على الاقل نصف العمى ولا العمى كله ونحاول ان نلعب على جزئية السعر طالما التصدير لاسرائل حاصل حاصل

طبعا هو منطق نفعي سخيف
لان المفروض ان لايصدر الغاز لاسرائيل حتى لو كانت ستدفع اعلى من السعر العالمي

لكن نقول ايه

ربنا يريحنا من هذه العينات

تحياتي

Bella said...

soosa el-mafroosa

مرحبا بك

نعمل ايه بس

فعلا مسحوبين من لساننا ومش بس كده

كمان ناكرين لجمايل الحكومة علينا

اخص علينا اخص

ههههههههههه

تحياتي

Bella said...

سبهللة عالآخر

مرحبا بك

وربنا يقدرنا ونخدم الزباين في ونعمل مشاريع وشاليهات لاعضاء الرابطة

هههههههههههههه

قصدي يعني نشتري لهم تاكسيات بالتقسيط تبع اي بنك يرضى يدينا قرض

ههههههههههه

اما الوزرا الامامير فمفروض احنا اللى نبخرهم ونحميهم من عيون الحساد
مفروض نخاف شوية على النعيم المقيم اللى احنا متنغنغين فيه ده كله

تحياتي

Bella said...

fahd

مرحبا بك

باين من كلامك انك فاكرني رجل

لا ياسيدي

هههههههه

انا اسمي بيللا

ممكن تشوف البروفايل بتاعي ح تلاقي فيه شوية معلومات متواضعة عني

ويارب المدونة تكون على مستوى وتستحق المتابعة

تحياتي

Bella said...

خواطر رئيس شاب

مرحبا بك

صدقت والله

ماحدش ودانا في داهية غير ثقافة الطنطنة والتغني بالماضي المجيد والنوم بعدها مباشرة

يعني لو كنا بنتغني بماضي الاجداد وفي نفس الوقت بنعمل حاجة كان معقول

بس نعمل ايه بقى

ربنا يعين

وهنيئا للاجانب بوزراءنا الاكارم

ههههههههههههه

Bella said...

صراحة تعبير دولة داخل الدولة ده مش بينزل لي من زور

لو كانت دولتهم مضمونة واللى فيها مش عملاء لااعتقد ان حزب الله كان سيقلق منهم

بس من حق المقاومة انها تحافظ على سرية اتصالاتها طالما تعيش في هذا المستنقع العفن وعلى راس الدولة مجموعة من الخونة والعملاء

اذا كان وزير الاتصالات نفسه عميل بامتياز ومستعد لتسليم رقبتهم للعدو

منتظر منهم يكشفوا ضهرهم يعني

التعبير ده مش عاجبني بالمرة

Bella said...

micheal

مرحبا بك

الحقيقة ان طريقتهم واقوالهم تستحق ان تصبح مقررات دراسية ونحفظها قبل الاكل وبعده

ههههههههههه

تحياتي

Che_wildwing said...

تعرفي يابيلا إن احنا المفروض اصلا مانصدرش الغاز ولا لاسرائيل ولا للجن الازرق
احتياطي الغاز في مصر لن ينفعها لعشرين عاما قادمين
غريب اوي ان احنا نصدر ونستورد في نفس ذات اللحظة

Anonymous said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات