Tuesday, May 20, 2008

من وحي خطاب بوش الأخير

بعد أن خطب بوش خطابه التاريخي في منتدى دايفوس الاقتصادي بشرم الشيخ والذي أفاضت جرائدنا في وصف تبعاته وتحلق المحللون حول الموائد يرصدون تبعات هذا الخطاب الذي زلزل الاركان أهديكم هذه القصيدة الخالدة التي اصبحت علامة من علامات السياسة الأمريكية على كل قفا في المنطقة العربية وإهداء خاص لنوارة نجم التي أسعدتني أيما سعادة بهذه التدوينة

كل شعب و له قفاه
يصونه و يحافظ عليه

هوه شرفه في الحياة
يموت و ميفرطشي فيه

الطلاينه و الانجليز
القفا بتاعهم لذيذ

و الفرنساوي جميل
انما حر و عزيز

و القفا الاسباني يشرح
و القفا الالماني يفرح

و الياباني كله رقه
انما تقربله لأه

و القفا الكوري الشمالي
لحمه مر و دمه غالي

ليه قفا العالم مكرم
لمسه ممنوع أو محرم


و القفا العربي الاصيل
للاسف اصبح ذليل

كتر ضرب الخلق فيه
عرَّضه و خلاه طويل

داس عليه الامريكان
و انكوى بنار اسرائيل

و احنا دايما في السكوت
خرس ملناش أي صوت

م الاهانة و الاستكانه
القفا قرب يموت

بس أنا خايف ياناس
غدر أولاد الزبانية

لو قفانا مات خلاص
يضربونا في حتة تانية



28 comments:

جبهة التهييس الشعبية said...

ههههههههههههههههههه
حلوة قوي
بتاعة مين دي

احمد الجيزاوى said...

تحاتى لكى على نشر هذة القصيدة
احمد الجيزاوى

Empress appy said...

ههههههههه حلوة يا بيلا بجد قوى
عجبتنى بس قفانا يا امى ارحمينى انتى عارفه المشكله اننا اللى مدينه للكلاب بره وجوه
وعلشان بنقول عادى وكبر فمدينهم الحق فى كده
بس كل واحد وله نهايه صدقينى
تسلم ايدكى لو انتى اللى كاتبها
او نقلها بجد حلوة

مصــــري said...

بيلا

رائعة جدا جدا

بس "القفا" خلاص مات منذ زمن

هم بالفعل يضربوننا في مناطق أخري,يضربون شرفنا وأعراضنا.

إنها الحقيقة للاسف الشديد

قصيدة رائعة

تحياتي
أسامة

wade7 said...

برافو و الله لذيذة جدا

اه يا قفا اه يا قفا اه يا قفا اااه

محدش غناله مع انه بيستحمل كتير

خمسة فضفضة said...

السلام عليكم ورحمة الله وبركاته

هههههههه

والله يا بلا عندك حق

شر البليه مايضحك فعلا

بس الابداع ده بتاع مين
:-)

Bella said...

اهلا نوارة

ربنا يخليكي

دي عندي من زمان وللاسف الشديد زي اغلب الاشعار الجميلة مجهولة الصاحب

دي بقى ياستي لها ذكريات مريرة جدا لانها وصلتني على الميل ايام القفا الاكبر اللى لطعهولنا بوش على قفانا كلنا في العراق
كنت كل شوية ابص لها وافتكر منظر القوات الامريكية وهي بتدمر العراق وبتسحق معاها كرامتنا واحنا بنتفرج على اشلاء العراقيين على الفضائيات

القفا الجديد قلب علينا كل الضربات

Bella said...

أحمد الجيزاوي

مرحبا بك

العفو اي خدمة
مستعدون لتوصيل القصائد والمعلقات للمنازل

هههههههههه

المهم الناس تقرا

تحياتي

Bella said...

appy

مرحبا بك

والله لو كنت كاتباها كنت ح اعترف على طول

هههههههههههه

بس الحقيقة هي من ابداعات شخص تاني ومش عارفة اسمه
هي كانت وصلتني على الميل من فترة ايام غزو أمريكا للعراق ومن ساعتها وهي عندي

بس الصراحة يعني المقانة بين قفانا وأقفية الناس التانية مقارنة ممتازة لاننا فعلا سايبين قفلنا لكل من هب ودب يتمرن علينا لغاية ماكلهم اخذوا بطولات عالمية في ضربنا على قفانا واحنا مش بنتحرك ولا حتى بنتململ

مش عارفة ح نفضل مستحملين لامتى

ده لو كان قفا كاوتش كان داب واتهرى

ههههههههههه

تحياتي

Bella said...

مصري

مرحبا بك

والله يااسامة ياخويا لاعتبارات اخلاقية لم اشأ التحدث عن الاماكن الاخرى واللبيب بالإشارة يفهم واحنا ماشاء الله علينا ماعادش حيلتنا غير اللب وبنفهمها وهي طايرة

هههههههههههه

بس امتى نصحى بقى ونفوق

الله اعلم

تحياتي

Bella said...

wade7

مرحبا بك

الله يخليك

هو صحيح القفا مظلوم لكن يُحسب للفنان العبقري محمود عبد العزيز رائعته الخالدة في قلوب الملايين

آه ياقفا آه ياقفا

ههههههههههههه

تحياتي

Bella said...

خمسة فضفضة

مرحبا بك

والله يااختي الابداع ده للاسف الشديد مجهول المصدر لانه وصلني على الميل
وكان بودي يكون معروف اسم صاحبه احتراما لحقوق الملكية الفكرية

بس نعمل ايه بقى

النظام في البلد دي كده
كل ابداع مستباح زي ماكل شيئ مستباح

هههههههههههه

تحياتي

مواطن مصري said...

حلوة

خيرالدين said...

هى بالرغم من انها مكتوبه من زمان زى ما قلت
لكنها صالحه لكل الاوقات
قفانا لسه يا ما هيشيل

تقريبا هو من النوع الاصلى
اخيرا لقيت حاجه اصلى فى البلد دى

بيتنا القديم said...

الشعر ناطق ومش محتاج تعليق

العجيب ان ولاد الزبانية عملوا

بنصيحة الشاعر وبدؤا يضربوا في حتة

تانية..وبدؤها باحكام شرفاء الاخوان

.
.
.
وانت اخبارك ايه يا فندم...؟!

(:

ابو العربى said...

هههههههههههههههه
حلوه جداااا
بس ابوالعربى محافظ على قفاه
زورينى وهتعرفى
ابوالعربى

حـنــّا السكران said...

ههههه

مش محمود عبد العزيز غنـّى للقفا كمان في فيلم الكيف ؟؟؟ على أساس انه القفا مظلوم و ما حدا بيغنـّيله
ههههههه حلوة يا بيلا

Che_wildwing said...

التفكير دلوقتى في تركيب قفا سيراميك
عشان يستحمل أكتر
ويطرقع أكتر

Hypatia said...

بعد القفا يا تري الدور على ايه بالظبط
:(

اختيار ممتاز وفى وقت مناسب جدا والقفا لسه سخن والعيش طالع من عليه مستوي
تحياتي يا بيلا

Bella said...

مواطن مصري

مرحبا بك

ربنا يحلي ايامك يارب

تحياتي

Bella said...

e7na

مرحبا بك

هي فعلا صالحة لكل زمان وكل قفا خصوصا ان الضرب مازال مستمرا

نعمل ايه بقى

بس على فكرة القفا مستحمل مش لانه اصلي

هههههههههههههه

لانه تخن من كتر الضرب

تحياتي

Bella said...

بيتنا القديم

مرحبا بك

انا بخير يافندم ربنا يخليك

هم ولاد الابالسة الحقيقة ابتدوا يضروبا في حتت تانية من بدري حتى من قبل احكام الاخوان

بس يظهر اننا من كتر الضلمة والضرب مش شايفين الضرب نازل فين ومنين

ههههههههههههه

تحياتي

Bella said...

ضد الظلم

مرحبا بك

ومرحبا بابو العربي

رحت يافندم وعجبتني المدونة جدا وبلغ سلامي لابو العربي وخليه دايما يحافظ على قفاه

تحياتي

Bella said...

حنا السكران

مرحبا اخي العزيز

الحقيقة محمود عبد العزيز كان عنده نظرة مستقبلية رهيبة لما غنا للقفا في فيلم الكيف

ههههههههههههههههههههههههه

تحياتي

Bella said...

Che_wildwing

مرحبا بك

مشكلة القفا السيراميك انه صحيح بيطرقع لكن سهل الكسر
ح نلاقي نفسنا بقى دخلنا في متاهة تغيير القفا المكسور وتركيب وفك وشغلانة بقى

شوف لنا فكرة طليعية تانية غير السيراميك دي

مش ناقصين احتكارات الله يخليك

ههههههههههههه

تحياتي

Bella said...

Nsreen Bsunee

مرحبا بك

كل واحد ومكان مايستحمل بقى

ههههههههههههههههههه

بعدين بلاش سيرة العيش الله يكرمك مش ناقصين تقليب مواجع والناس رجليها تعبت من الطوابير

هههههههههههههه

تحياتي

رئيس جمهوريه نفسى said...

روعه بجد اوجزت فا انجزت

Bella said...

رئيس جمهوريه نفسى

مرحبا بك

اشكرك كثيرا واتمنى دوام الزيارة

تحياتي