Saturday, July 28, 2007

عملية تجميل أم محاولة إلهاء

قرأت هذا الخبر اليوم في صحيفة المصريون الإلكترونية

"الوطني" يدرس ترشيح امرأة لخلافة "نظيف" في الحكومة الجديدة

الحقيقة لااريد أن استبق نوايا الحكومة من تسريب هذا الخبر وهل هي جادة فعلا في تعيين إمرأة في منصب رئيس وزراء خلفاً لأحمد نظيف وذلك في محاولة منها لتجربة المرأة لشغل هذا المنصب الحيوي الهام فربما تفلح المرأة فيما لم يفلح فيه رجالات الحزب الوطني على مدى عدة حكومات متعاقبة.
أم ان الأمر لايعدو كونه مجرد تسريب لخبر قد يثير الجدل على الساحة المصرية خاصة وقد سبقه خبر تعيين نساء قاضيات وقامت الدنيا لفترة وقعدت بعد أن انشغلت في هذا الجدل طويلاً.

الحقيقة كوني إمرأة فبالتأكيد سأكون مع هكذا قرار وخاصة أننا جربنا رؤساء وزارة رجال ولم ينعدل الحال !!!
فما الضرر لو جربنا تغيير النوع هذه المرة فقد ينصلح الحال.
وفي نفس الوقت فإن نفسي الأمارة بالسوء لاتفترض حسن نية من تسريب هذا الخبر وأعتقد ان التسريب مقصود إما لتجميل وجه النظام وإظهاره بمظهر النظام التقدمي الذي يعطي المرأة حقها في تولي المناصب الرفيعة وبالمرة تلحق مصر بقطار الريادة الذي ترجلت منه منذ زمن بعيد وتقول للعالم أنها مازالت رائدة بدليل تعيين أول إمرأة في هذا المنصب في الشرق الأوسط.

لنرى


23 comments:

عدى النهار said...

عن نفسى مع قرار تعيين القادر على أداء العمل بأمانة وكفاءة بغض النظر عن كونه رجل أو إمرأة

لكن لايوجد سبب واحد يجعلنى أتوقع أى خير يأتى من وراء من يتحكمون فى أمور البلد

وشىء آخر مهم.. هل تتوقعى أن يتم تعيين إمرأة تصلح للمنصب لتكون منافسة للست مرات البيه؟

عصفور المدينة said...

عدة تعليقات بعد الموافقة على انها محاولة للعب على وتر المرأة

أول تعليق :ياخوفي لتكون اسمها بيلا
تاني تعليق :ياخوفي ليكون أول حرف من اسمها خ
تالت تعليق :ياخوفي ليكون اسمها مدونة نظيفة
رابع تعليق:ياخوفي لتكون مؤامرة لإثبات فشل المرأة بتحميلها تركة مليئة بالجروح
خامس تعليق:لابأس طالما بقي منصب رئيس الوزراء منصبا شرفيا

Unknown said...

يابنتى بقى الستات مش عارفين ياخدوا حقهم أنهم يمشوا فى الشارع بأمان حياخدوا حقهم أنهم يتولوا مناصب كبيرة زى كدة ؟

فى رايى الموضوع ده ممكن يبقى فعلا مغازلة للدول الغربية المتقدمة عشان يبين مبارك أنه مع الحريات و كدة

تانى حاجة متتوقعيش من النظام ده أنهم حتى لو جابوا ملاك من السما و مسكوه اى منصب انه حيقدر يقف قدام الفساد ده كله ... الحل الوحيد المنطقى هو تغيير النظام كله على بعضه

المشكلة زى ما قال عصفور المدينة أنها تفشل زى ما كل الرجالة اللى قبلها فشلوا و بعد كدة نلاقى حبايبنا اللى بيتمنوا أن مصر و العالم كله ميبقاش فيه ستات أصلا انهم يستغلوا الموضوع ده عشان يقولوا أن المراة لا تصلح لتولى شئون الدولة

هما ما بيصدقوا أى هباب يتعلقوا بيه

Bella said...

عدى النهار


مرحبا بك

عن نفسي مع تعيين القادر على أداء اي منصب لكفاءته مثلما ترى تماماً

ولكن للاسف الشديد هذا الحلم تم وأده تماما في بلدنا واصبح تعيين اي شخص يثير فينا العديد من التساؤلات ويحفز هرمونات الشك والريبة نظراً لتاريخنا الاسود الطويل معهم وتفننهم في تعيين كل من هو عديم كفاءة وقدرة لينفذ مخططاتهم التخريبية في البلاد

وفي هذه ايضا اتفق معك في انني ايضا لااتوقع اي خير يأتي من وراءهم ولا من وراء من سيقومون بتعيينه لانه على الارجح ممن يدورون في فلكهم .

وسؤالك يجرنا لسؤال آخر

ومن اين سيأتون بمن ستنافس الست ؟؟

في الغالب اذا كانوا سيريدون فالمجلس القومي للستات موجود وبه من صديقات ووصيفات الست من سيقوموا باختيارها منه

ولك ان تتوقع أداء من ستأتي لتعرف هل ستنافس الست أم ستنافسنا نحن في تطليع آخر انفاس في صدورنا.

عمر عاشق القرآن said...

ما هى خربانة خربانة بقى ...

انا مقصدش اساءة للسيدات الفضليات بس انا معتقدش ان نية الحكومة من ورا تسريب خبر دزى ده خير ابدا

وبعدين انا بعلن معارضتى ان تكون ريستنا او ريسة حكومتنا واحدة ست

مع احترامى برضه

لا اللى ضحكنى بقى خبر انتخابات رئاسة الحزب الوطنى بالانتخاب الحر المباشر السرى !!!!!!!!!!!!!!

Bella said...

عصفور المدينة

مرحبا بك

ههههههههههههههههههههههه

تعليقاتك وقعتني من الضحك

حلوة قوي يكون اسمها بيللا دي

يااخي العزيز أنا شخصيا لااتوقع ان يتم تعيين في اي منصب من هذه المناصب حتى لو نزل شهاب من السماء على رؤوس هؤلاء القوم

هههههههههههههه

ثم اني اتوقع لو فكروا في تعيين مستشار لرئيس الوزراء واحدة ست ستقوم الدنيا ولن تقعد

فمابالك برئيس وزراء


اذا كانوا فكروا في تعيين ست في منصب رئيس جامعة عين شمس ولو ان القرار لم يتم وتم تعيين شخص أمنى من الدرجة الأولى وهو ابن وزير الداخلية الاسبق زكي بدر
ومع ذلك حدثت ضجة لمجرد اشاعة انه احتمال يتم تعيين ست لرئاسة الجامعة واعترض المعترضون بشدة رغم ان منصب رئاسة الجامعة على أهميته الا انه يختلف تماما عن منصب رئاسة الوزراء التي ستدير بلد بأكملها.
وليست اي بلد

بلد ملئ بالمشاكل والمصائب وتم بيع اغلب اصوله وباقي الاصول ينتظر البيع

فعن نفسي لو فكروا يعينوني لن اوافق هههههههه

صراحة صعب جدا التعامل مع عصابة بهذا الحجم في بلد ضرب الفساد كافة جوانبه ويحتاج لاطنان من المنظفات حتى يتم التخلص من البقع التي تغطيه.

أما بقى ثاني تعليق فلااعتقد

هي اصلا اختفت بشكل مباغت ربما يجهزونها للمهمة الأكبر
لكن هذا المنصب صعب جدا ولو كان هناك احتمال لشيئ من هذا القبيل فأعتقد جوز خ هو الأولى. على الاقل لان ملف خدمته في اللجنة أطول من ملفها وعنده اقدمية

هههههههههههههه

أما ثالت تعليق بقى
فأشاركك الخوف فيه أنا ايضا لان الصراع بين الحرس القديم والحرس الجديد محتدم هذه الايام حتى أن السيد النظيف يجهز ملف انجازاته ليعرضه على الرئيس ليبعد عن نفسه شبح التخلص منه والعهدة على جريدة المصريون والخبر في هذه الوصلة

http://www.almesryoon.com/ShowDetails.asp?NewID=36525&Page=6

والخبر في حد ذاته يحتاج إفراد موضوع مستقل لمناقشته

الرابع اشاركك فيه الخوف واعتقد انه لو حدث لاقدر الله واستكملت الجريمة اركانها بشخصية ضعيفة فستكون الضربة القاضية لكل نساء الوطن وسيظهر من ينادي بعودتنا للبيوت خوفا على باقي مستقبل الوطن لان مجرد خروج النساء سينهي باقي الانجازات التي حققها سابقوهم
هههههه

هذا طبعا لو اتوا بسوبر ست يمكنها ان تصمد في وجه شلة البياعين الموجودين على الساحة.

اما الخامس فلااوافقك عليه

معذرة بقى نفسي اختلف معاك واجرب الاختلاف

هههههههههههه

صحيح منصب رئاسة الوزراء شرفي ورئيس الوزراء كلنا نعرف انه لاينفذ سياسات من بنات أفكاره ولا من صبيان افكار اي وزير حتى دون توجيهات السيد الرئيس

لكن اللعنات تنصب على راس رئيس الوزراء والدعوات تنهال عليه من كل فئات الشعب

فصراحة قلبي لايطاوعني ان تتولى امرأة هذا المنصب وتنصب عليها اللعنات من القاصي والداني لمرتين

مرة لكونها رئيسة وزراء فتنال نصيب سابقها من الدعاء عليها واللعنات

والمرة الثانية لأنها امرأة وهي اصل الشرور وسبب تأخر المجتمع وكل البلاوي الزرقا التي تعودنا ان نلبسها كلما جدت في الامور أمور وحدثت مصيبة في البلد

فلا ياعم مش عايزين

هههههههههههههههه

Bella said...

Ahmad Badawy

مرحبا بك

والله الحمد لله دي شهادة نعتز بها منك يااخي العزيز
اننا فعلا مش واخدين حقنا في اي حاجة في البلد دي حتى مجرد المشي في الشارع بأمان محرومين منه

ويطلع كل واحد يقول لك الستات واخدين حقهم تالت ومتلت
مااعرفش جايب المعلومات المضروبة دي منين

هههههههههه

وطبعا متفقة معاك تماما في ان الامر مجرد مغازلة للغرب ومحاولة تجميلية سيلكونية لوجه النظام المهترئ حتى يقولوا احنا اللى عينا اول ست رئيسة وزراء هههههه
وندخل بقى في مواويل الريادة اللى صدعونا بها سنين طويلة واتضح انها ريالة واننا واخدين كوم اصفار في كل المجالات

واهو بالمرة لو جابوا واحدة يحصل لها اللى حصل لوزيرة البيئة ناديمة مكرم فاكرينها

اللى ماعرفتش تقضي على مافيا التلوث واللى اختفت في ظروف غامضة رغم انها كانت اكفأ من تولى هذه الوزارة ومن بعدها لم تتولى وزارة البيئة اي ست

فربنا يستر والكلام يطلع كلام

احنا صراحة مش ناقصين يحملوا الستات مصايب الحكومة كمان

Bella said...

omar مشروع بطل

مرحبا بك

هي فعلا خربانة
بس خربانة من الاول والستات ليس لهم اي علاقة بهذا الخراب

وعن نفسي لو الحكومة ناوية تستغل تعيين واحدة ست في المنصب ده لتحميلها مصايب من سبقوها يبقى بلاش احسن

مش البلد كلها شايفة ان الرجال لاعلى عليهم وماحدش يسد زيهم

خلينا نشوف الشطارة بقى

لكن الحكومة سربت الخبر ده علشان الناس تنشغل به شوية وينسوا مشاكل المية والهوا والكهربا والاسعار المرتفعة نار

وباقي البلاوي التانية
ويقعدوا يتناقشوا ويتجادلوا في الست احسن ولا الراجل

اصل احنا مش فالحين غير في الجدل

وهوووووووووب تلاقي رئيس الوزراء الجديد اتعين وخابت كل التوقعات

... said...

كلام كلام كلام
ما باخدش منك غير كلام

الحقيقة ان اى شىء يتسرب لنا يمكنك ان تتوقعى من ورائه اى شىء الا الصدق

أهو جدل يلهى الناس
ولو حدث وكان فيه اغلبية يبقى حلو ككريم أساس افتح درجات من لون البشرة
ونبقى ناس متحضرين وعندنا مساواة

وفى كل الأحوال
هناك سؤال يطرح ويجمع ويضرب نفسه فى أجمد حائط
ما هى صلاحيات رئيس مجلس الوزراء الحقيقية؟
هل هو مطلق اليد لاتخاذ اى قرار حر؟

هل له اى وجود فعلى على الساحة؟

لو كان هناك اجابة واحدة بنعم فلنا ان نناقش وقتها ست وللا راجل.. واتجاهاته السياسية .. واى حاجة تانية

Bella said...

حلم

مرحبا بك

والله الحمد لله ان مش بس انا اللى شايفة انها محاولة الهاء

زي ماسبق وقلت ان نفسي الامارة بالسوء وشوشتني ان دي مجرد بالونة اختبار وفرقعة لحد ماتفرج والناس تتلهي شوية خصوصا ان المشاكل كترت اليومين دول خصوصا حرب المية

والاسعار
وبيع البلد
وخلافه

يعني قائمة المشاكل تحتاج لموضوع جدلي كبير

وحيث اننا على ابواب التعديلات او التحريكات الوزارية فلماذا لايتم اطلاق بالون جديد اسمه رئيسة وزراء واحدة ست

واهو الناس تتلهي وداخلين على رمضان وبداية عام دراسي وح يحتاجوا بلاوي كتير

اهي فزورة يتسلوا فيها لغاية مانخلص باقي البيعة

وطبعا ماحدش في البلد له صلاحيات ولا بيشوف شغله الا بتكليف مباشر من السيد الرئيس

عمري في حياتي ماشفت بلد واقفة على رجل ومنتظرة كل مصيبة يتدخل فيها السيد الرئيس

وطبعا بما اننا عايشين كده دايما فشالوا الدو حطوا مدام شاهين كله محصل بعضه

Unknown said...

هو الوطنى لسة بيدرس
أمال ليه واجعين دماغنا بالمساواة التامة
اللى بين المواطنين دون النظر الى جنس أول لون أو عقيدة
وان الناس اياهم لو وصلوا للحكم هيرجعوا مصر لعصر الكهوف وووو
على العموم خليهم يدرسوا يمكن ياخدوا دكتوراه

Bella said...

أبو لهب

مرحبا بك

طبعا لسه بيدرس

انت عايزه يقرر بدون دراسة وتمحيص وفحص ولجان تنعقد ولجان تنفض

معقول برضه

امال ريادة ازاي

هي الريادة بالساهل كده

عصفور المدينة said...

أستاذة بيلا مررت لك تاج

Bella said...

عصفور المدينة

مرحبا بك

تصور بقى اول مرة في خياتي اتابع تاج كاتبه حد من المدونين
ولسه فاتحه الريدر ولقيت موضوع جديد لك فقلت اشوف اخويا العزيز كاتب ايه النهاردة
لقيته تاج

وانا اصلا مش غاوية الموضوعات دي بس لقيتني باتابع ردودك

ولقيتك مدبسني فيه

هههههههههههههههه

مثبولة منك طبعا

احلى تدبيسة

بكرة بعون الله بعد العودة من العمل اشوف الاسئلة واحاول اجاوب عليها

مش عارفة ليه حاسة اني في امتحان

ههههههههههههههههههههه

دنـيـا محيراني(ايناس لطفي said...

بيلا انت اكيد بتهزري مش ممكن طبعا ده اكيد اشاعات هما الرجاله برضوه هايسمحوا بكده هما الاخوان هايسمحوا بكده هما المتشددين هايسمحوا بكده هما الستات نفسهم هايرضوا بكده لا لا لا اشاعات يا بنتي مش ممكن بس ده ممكن لو بتتكلم عن سنه2700
ضحكتني يا عزيزتي

Sha2loob said...

يعني الرئيس في البيت واحده ست, والشغل واحده ست , والحكومه كمان
دي تبقى حوسه, آل ايه ويمكن الست دي تقدر تعمل اللي معملهوش الرجاله اللي بشنبات ولا اللي حتى منغير
يا سنه سوخه هي حصلت

بجد يجيبوا راجل يجيبوا ست يجيبوا محمود الجوهري ويلعب 4-2-4 ولا الهوى

البلد دي عايزة تغيير جذري شويتين من نوعية ان احنا ننام بالليل نقوم الصبح منلاقيش حد معاه كرنيه حزب وطني ولا كمان نلاقي حد كان معاه في يوم من الأيام. والحدق يفهم

The Alien said...

أنا كمان مش مطمن لخبر زي دا
وأكيد مقصود منه حاجة
بس إن إمرأة تكون رئيسة وزراء مصر دي حاجة لطيفة
وأنا أتمني إن دا يحصل
بس الموضوع ف اﻷخر شكل وخلاص
لأن رئيس أو رئيسة الوزراء منصب ملوش لزمة في بلدنا

تحياتي

micheal said...

لا أعتقد أن ده ممكن حدوثه في مصر
لسه بدرييييييييييييي
تحياتي
:)

About Me said...

بيتهيألي مش وقته
لسه بدري على كده
ولو اني مش مستبعدها

Bella said...

دنــــيــــــا مـحـيـرنـي

مرحبا بك

والله ماباهزر

اصلا انا عارفة ان الحكاية عبثية بحتة علشان الناس تتلهي فيها وتتناقش ودمها يفور وتروح للدكاترة من سخونة المناقشات والصيدليات تشتغل والدكاترة تنشغل في ضحايا النقاش

وهوووووووب

تلاقي الناس نسيت لما يتخبطوا خبطة جديدة

مش كل مرة تحصل الحكاية دي

وهو المطلوب

ههههههههههههههه

Bella said...

Sha2loob

مرحبا بك

نصيبكم كده بقى ياعم
الستات حولكم في كل مكان

هههههههههههه

والله ياعزيزي الشنبات لوحدها ليست هي الأداة السحرية التي تجعل الرجال يستطيعون فعل اي شيئ تجا امر ما

فكم من شنب يقف عليه الصقر ولم ينجز حامله ماتنجزه دجاجة
ورحم الله امرؤ عرف قدر شنبه

ماعلينا

نعود لخراب المجتمع بداية لنعرف اذا كان هناك من يستطيع القيام بعمل اي شيئ لنجدة هذا البلد المنهار ولا يعنينا هنا كونه بشنب او بكعب عالي

المهم الاخلاص والضمير

اما وقد غابت الكثير من القيم فلو أتوا برجل يقف جنبه رجلين يحملان شنبه فلن يستطيع عمل شيئ

البلد في حاجة ملحة لعملية تطهير عاجلة

Bella said...

The Alien

مرحبا بك

الامر لايعدو كونه مجرد بالون اختبار لرصد نبض الشارع كما يقولون في نشرات الاخبار واهي الناس تتلهي شوية في موضوع وتنشغل

الله يرحم ايام التعديلات الدستورية التي تطلب تمريرها اطلاق العديد من بالونات الاختبار

ولااعتقد ان تعيين امرأة مرئيس وزراء امر وارد في مصر اصلا حتى لو كان المنصب منصب صوري لااكثر ولا اقل

Anonymous said...

Hi ,
Your site is very niceeee , this is my site pls , let me show it :
مصراليوم
مشاركة ارباح ادسنس
منتديات مصراليوم هى منتديات مصرية عامة تهتم بكل ما يهتم به المصريين , لدينا على منتديات مصر اليوم كل جديد و هذه هى اهم مواضيع المنتدى
اقسام منتديات مصر اليوم :
الحوار العام - شعر , قصائد - بحث , مقال - اخبار الفن - اخبار مصر - اخبار التعليم فى مصر - صور - اغانى , كلمات اغانى - افلام , مسلسلات - نكت - فيديوهات
قنوات , ترددات - العاب - كلية الطب - كلية الهندسة - رسائل موبايل - عروض الشبكات - قران كريم - برامج انترنت - اخبار الرياضة المصرية - مباريات بث مباشر - اسعار سيارات - اسعار موبايلات