Saturday, July 14, 2007

مصر هبة الجراكن




قال المؤرخ هيرودوت إن مصر هبة النيل
وعلى ضفاف النيل قامت أروع واقدم الحضارات التي عرفتها البشرية.

فهل مازالت مصر هبة النيل ؟

رغم أن هذا الوقت من العام هو وقت فيضان النيل إلا ان سكان مصر المحروسة وخاصة سكان الدلتا يعانون من العطش حتى وصل بهم الأمر للثورة بعد طول صبر وتحمل وقطعوا الطريق الدولي ولولا ذلك لما التفت لماساتهم احد !!!

ثم إنكشف الأمر عن معاناة سكان قرى أخرى في كفر الشيخ التي تعامل محافظها مع الأمر بطريقة امنية بحتة متهماً المتظاهرين بأن خلفهم جهة ما تخطط للإطاحة به شخصياً !!!!

وهناك من اشتكى من قطع المياة عن زراعاتهم لمدة تتجوز الثلاث اسابيع حتى ماتت زراعاتهم وخربت بيوتهم وبارت اراضيهم
ولا أحد يعرف على وجه الدقة من المسؤول عن كل هذه الفوضى والعطش الذي يضرب أرجاء مصر المحروسة التي كانت يوماً هبة النيل وأصبحت بفضل الفساد هبة الجراكن

الجراكن التي اصبحت من ضروريات أي بيت مصري ليس في القرى وحدها ولكن في اكبر المدن المصرية حيث يقوم السكان بتخزين المياة فيها وقت وجودها اذا وجدت اصلا.
وهناك من يتاجر فيها ويبيعها حتى وصل سعر جركن الماء لثلاث جنيهات !!!

ثلاث جنيها ثمن المياه مجهولة المصدر التي تتاجر فيها مافيا الجراكن !!!

فمن المسؤول عما وصل إليه حال مواطنينا من عطش ليس في القرى وحدها ولكن في المدن ايضاً حيث تعاني مدينة نصر من انقطاع دائم لمياه الشرب ولايعرف على وجه التحديد حل لهذه المشكلة

هل دخلنا في عهد جديد انتهت فيه صلتنا بمياه الشرب المتسللة من صنابير المياة وصار لزاماً علينا شراء جراكن تحسباً لاي كارثة قادمة.

اعتقد ان المرحلة القادمة ستكون جركن لكل مواطن ومطلوب تدشين حملة إعلانات قومية على غرار حملات المحمول التي صدعتنا سنين طويلة.
ويكون شعار الحملة جركن لكل مواطن
وعلى البنات المقبلات على الزواج أن يقمن بشراء جراكن متعددة الاحجام والالوان في جهازهن لان وجود الجركن صار ضرورة وربما يؤثر مستقبلاً على راي العريس وقبوله للعروس من عدمه وربما يحسب العريس عدد الجراكن التي تمتلكها العروس في جهازها ويتم المفاضلة بينها وبين غيرها بناء على ذلك

خلاص ياجماعة مصر لم تعد هبة النيل

مصر هبة الجراكن

ومن الآن فصاعداً ستتغير شعارات الحملات الترويجية للسياحة في مصر وسيتم إلغاء الشعار المنقرض

مصر النيل والحضارة

إلي

مصر الجركن والبيارة*

-----------
البيارة قريبة البئر من العائلة يعني*

إضاف
مشكلة المياة ليست جديدة علينا فنحن في قلب محافظة الجيزة ولاتصلنا المياة الا بعد الحادية عشرة مساء في أغلب ايام الصيف هذا ولدينا موتور بقوة حصان لايستطيع رفع المياة للدور الأول بعد الأرضي!!!!

هذا طبعا بخلاف المشكلة الاخطر وهي تلوث المياة ولونها الصدئ وطعمها المر حتى انها تلسع إذا دخلت في العين اثناء غسل الوجه !!!!

اين نذهب ؟؟؟
هل ننتظر توجيهات السيد الرئيس للسادة المسؤولين حتى يعطونا شربة ماء!!!

أم هل ننتظر أن تظهر لنا فؤادة لتفتح الهويس حتى نستطيع الشرب !!!

إبحثوا معنا عن فؤادة


23 comments:

Shreef said...

والله عندك حق فعلا مصر هبة الجراجن بعد مأساة الناس اللي مش لاقيين نقطة ميه يا ترى لو كان هيرودت عايش دلوقتي كان هيقول نفس الجملة ممكن..لكن اللي اقد اقوله عار عليكي يا بلد النيل

عصفور المدينة said...

مسلسل طويل
أوله عطش وأوسطه تغطية المصارف وأوسطه برضه غرامات على زارعي الأرز وأوسطه برضه رسوم على المياه الجوفية وآخره ارتفاع مجنون في أسعار مياه المنازل
انتظروه قريبا

عصفور المدينة said...

قرأت خبر مضحك أمس
نواب الوطني يهددون بقيادة المواطنين في مظاهرات العطش
أو ما معناه أصلي كنت باقراه بالمقلوب
!!

Bella said...

shreef

مرحبا بك

في برنامج العاشرة مساء اليوم كانت هناك تغطية لثورة الجراكن وبعد عدة تقارير ولقاءات مع المواطنين العطشى من اماكن مختلفة وشكواهم تمت استضافة عضو مجلس الشعب عن محافظة كفر الشيخ

ونائب رئيس تحرير المصور

والسيد مش فاكرة اسمه رئيس الشركة القابضة للمياة والصرف الصحي

الحقيقة حالتي الصحية ومرارتي لم تسمح لي بمشاهدة الفقرة بالكامل والا كنت ح اكسر التليفزيون على دماغ رئيس الشركة القابضة اللى بيطلب من الناس تصبر لانهم بيعملوا انشاءات وبيعيدوا هيكلة القطاع !!!

الناس عطشانين ولايجدوا ماء يشربونه او يغتسلوا به وجنابه بيطلب من الناس تصبر لما يعملوا هيكلة الشركة

عار على البلد وعلى اللى بيحكموها مايحدث فينا

وعار على المواطنين الذين سكتوا كل هذا الوقت

تصور ان في التقرير بعض القرى تعاني منذ 15 سنة من قلة المياة وعايشين على الجراكن وياريت المية نضيفة
الست قالت بتجيلهم معكرة وبيروقوها علشان يشربوا

وساكتين كل المدة دي

لان حتى الابار اللى كانوا بيشربوا منها جفت

ومياة الصرف الزراعي التي كانوا يستعملوها للغسيل والاستحمام تسبب في اصابتهم بأمراض خطيرة

ولما انقطعت المياه تماما اضطروا للثورة

يعني كان لازم تنقطع تماما رغم انها اصلا مياة غير صالحة للشرب!!!!

احنا شعب غريب جدا

يقبل الاهانة بصدر رحب وبشكل مستفز

لهم حق يعاملونا اسوأ من كده

Bella said...

عصوفر المدينة

مرحبا بك

هو فعلا الموضوع كبير ومنذ فترة قرأت عدة مقالات عن مشكلة المياة التي ستواجه مصر

ولكن يبدو ان التعمية على هذه الموضوعات كانت الاساس في الموضوع

بالإضافة لسوء استهلاك من عدد غير قليل من المواطنين غير مبالين بحاجة الناس للمياة

الايام القادمة ستشهد عطش اكبر

خللى العالم تملا حمامات السباخة براحتهم

وتعمل بحيرات صناعية براحتهم برضه

واحنا نولع بجاز

Bella said...

عصفور المدينة تاني

مرحبا بك

بالأمس تعرفت على مدونتكم الثانية وقرأت بها موضوع لماعلينا عن العطش في ايطاليا

هههههههه

كان موضوع جميل قوي

تفتكر ممكن بتوع الوطني يعملوا مظاهرة مضادة لمظاهرات العطاشى وبدل مايمسكوا فيها جراكن فاضية تفتكر يعملوا ايه يعني ؟

اعتقد ممكن يمسكوا خراطيم مياة يرشوا بيها على بعض علشان يقنعونا ان المية مافيش اكتر منها رغم حقد الحاقدين اللى هم احنا

والهتافات تشتغل بقى

هههههههههه

mariam said...

لسه كنت بشوف الموضوع ده فى العاشره مساء
الموضوع ده منتشر فى مناطق كتير مش بس العشوائيه
يعنى وصل للمقطم و مدينة نصر
آدى البنيه التحتيه اللى فرحانين بيها ليل و نهار
و كل ما حد يتكلم يقولك ظبطنا البنيه التحتيه و مش عارف ايه

بالنسبه أن هيرودوت قال ان مصر هبة النيل
فأعتقد يا بيلا انه لو شاف النيل حاليا اكيد هيغير رأيه

تحياتى

عدى النهار said...

طب المياه دى راحت فين وهى لايمكن سرقتها ووضعها فى بنوك! حتى دى مش عايزين يسيبوها فى حالها

محمد عبد الغفار said...

انت مش عاجبك ولا ايه

شكلك كده مش عاجبك

Sha2loob said...

يا جدعان متفهموش حكومتنا غلط ومتنسوش انها الحكومة الذكية.الذكية يا أخوانا عارفين يعن إيه الذكية يعني اللي بتفهم يعني.
بصراحة بقى احنا اللي نستاهل كانت المياه بتنزلنا من الحنفيات مليان كلور وبكتريا(أول مرة أسمع عن بكتريا بتعيش في الكلور) ومش عجبانا وعمالين نقول بتجيب أمراض وفشل كلوي واللذي منه, فالحكومة الذكية بتاعتنا جابت الكمبيوتر العملاق السري بتاعها (السوبر كمبيوتر) ماركة متزوقيني يا ماما وعرضت المشكلة. طبعاً الكمبيوتر أعد يزمر زيزقزق ويخبط ويرزع وقالهم أدامكم حل من اتنين يا تغيروا الحكومةيا تقطعوا المية. وطبعاً الحكومة اختارا الحل اللي فيه مصلحة البلد.
ولا حول ولا قوة الا بالله

safa7_karmooz said...

ايييييييييييييه

هنقول ايه اكتر من اييه دى

امبارح رئيس شركة الميه قال عالتلفزيوون اللى معندوش ميه ميدفعش فاتورة ...
اصلا فى البيت بيتك كان حوار مستفز مع الراجل ده ...حتى محمود سعد كان ماسك نفسه بالعافية

احنا ركبنا 2 موتور...على الخط قبل ما يدخل للعمارة...غير مواتير السكان ...

والحمد الله مبقتش تقطع ...بس السكان مبقوش يدفعوا...فجم وسحبوا المحبس...

هع هع هع

The Alien said...

أحلي حاجة ف الموضوع ردود المسؤلين
اللي طلع يقول إن الميه هتوصل خلال اسبوعين
والمحافظ كل همه المظاهرات وشكله قدام الريس
وقال إيه تعاقدنا مع مقاول هيخلص الموضوع
دا كان ناقص يقولوا إن الميه موجوده اساسا بس الناس مش واخده بالها

بجد أحلي حاجة إن بقي عندنا ثقافة تظاهر
دلوقتي بنطالب بالميه بس بعد شوية هنطالب بحاجات تانيه

تحياتي

Bella said...

mariam

مرحبا بك

هو فعلا الموضوع منتشر في كل المناطق وليس العشوائية فقط

وحتى لو كان منتشر في العشوائيات فقط فهذا ليس عذرا لان المناطق العشوائية في مصر كثيرة جدا

السيد البيه المسؤول بالامس في العاشرة مساء وعلى طريقة كله تمام يافندم بيتكلم وكأن المواطنين هم اللى غاويين شكاوى وخلاص

حتى لما اتصلت واحدة من العجمي تشتكي ان المية غير نظيفة يرد جنابه ويقول لها ان السيد وزير الاسكان ساكن في العجمي وعمره مااشتكي من المية !!!

وكأن مرجعنا في تحسين الخدمات هم السادة الوزراء

يعني هل بالعقل كده السيد الوزير ح تنقطع عنه المية او تجيله مش نضيفة !!!
تلاقيهم اصلا مركبين له وصلات المية في مواسير مخصوصة غير المواسير الغبية اللى بتطلع صدأ على المية في اغلب البيوت

اما بقى هيرودوت لو كان موجود كان ح يقول ان مصر هبة الوزراء ورجال الاعمال

لانها بتوهبهم كل حاجة

جاتهم القرف

Bella said...

عدى النهار

مرحبا بك

المية راحت فين ده لغز المرحلة

يبدو انهم كل شوية لازم يعكننوا علينا بنقص سلعة ما

مرة انابيب البوتاجاز حتى يرتفع سعرها

ومرة أزمة انفلونزا الطيور وارتفاع اسعار كل حاجة

ومرة
ومرة

وكل شوية حاجة شكل

المرة دي مش عارفة ليه عندي احساس ان المية يتم التلاعب بها لغرض ما

يعني يتم تحويلها لجهة ما

مش بعيد يكونوا بيصدروها لاسرائيل زي الغاز

ايه المانع يعني

الخوف المرحلة الجاية على الهواء

Bella said...

Mohamed A. Ghaffar

مرحب سي محمد

مش عاجبني ايه بالضبط !!!!

انت مع مين

هههههه

بقول لك ايه اوعي تخوفني احسن لك انت واحد ايدك بتوجعك ومفروض تخاف على نفسك

احنا عندنا جركن كبير قوي
يعني الحكاية مش بسيطة
وقد اعذر من تفنجر

Bella said...

Sha2loob

مرحبا بك

والله يااخي احنا شعب مابيطمرش فيه

يعني الحكومة تسقينا مية بكلور نشتكي وهي قصدها تنضف معدتنا من البلاوي اللى فيها

تقطع المية مش عاجبنا برضه

الناس يعملوا ايه بس فينا

هي فعلا المصايب ماكترتش وهلت علينا بالجملة الا من ساعة الحكومة الذكية دي

لو كانت فضلت غبية كنا لقينا المية حتى

بكلور وميكروبات احسن من مافيش

بس ياللا خللى الحكومة تعيش

Bella said...

safa7_karmooz

مرحبا بك

اللى يحبنا مايضربش نار

ياسيدي نقول ايه بس

احنا بنسهر كل يوم في انتظار الضيف العزيز المية الغالية
وييجي البيه المسؤول من دول يقول احمدوا ربنا اننا وصلنا لكم المية وكأنه بيمن علينا

غير طبعا طريقتهم الغريبة في حساب الفواتير

سرقة عيني عينك

قال اللى مش عاجبه مايدفعش


تصور ممكن تكون دي الخطوة الجاية

لو البلد كلها بطلت تدفع فواتير اي حاجة ممكن يحصل ايه ؟؟؟

Bella said...

The Alien

مرحبا بك

ماانت عارف المسؤولين عندنا كل واحد فيهم بيفكر في الكرسي اللى قاعد عليه ولا يهمه مواطنين ولا يحزنون

وكلهم اما ضباط شرطة سابقين
او برضه ضباط سابقين من اي جهة تانية بقى

يعني كلهم تفكيرهم أمني بحت

اي تذمر من المواطنين يعني ان هناك من يحرضهم

يعني حتى الآن لايعترفون بأن الناس ممكن تغضب وتزهق

مالسة وزير الخارجية قايل ان الشعب المصري غضبه وحش

ههههههههه
ولا هو تصريحه لايعتد به هنا يعني

اه يا دماغى said...

والله انا مش عارفة
رؤساء الاحياء
والمحافظين بياخدوا مرتباتهم على ايه
ومناصبهم اللى واخدينها منظرة مش يشتغلوا بيها
نروح نستورد ميه من الصومال

تحياتى

BinO said...

:)
حلو جداً لدرجة البكاء
المشكلة في وزير الري والموارد المائية
يطلع في عز الأزمة يقول أن مفيش خوف علي مصر من الفيضان
:)
متخافوش

رغم أني بدأت أخاف
الناس بدأت تتكلم
يا خوفي يا بدران
وسلميلي علي فؤادة
وسكان أطاليا اللي مش لاقين يشربوا علي راي ماعلينا

Bella said...

آه يادماغي

مرحبا بك

الوزراء
والمحافظين
واي مسؤول في البلد دي بما فيهم رؤساء الاحياء ورؤساء الشركات القابضة طبعا كلهم بيقبضوا مرتباتهم علشان مفروض يقبضوها

مقابل ايه بقى هو ده الاشكال اللى مش عارفين نحدده حتى الآن

هل ياترى مفروض يقبضوا مرتبات لانهم مفروض يشتغلوا لخدمتنا يعني !!!
مممممممم
سؤال عويص جداً وأعوص من سؤال بيقبضوا مرتباتهم ليه

لانهم في الاصل مش معترفين انهم موجودين لخدمتنا او بيشتغلوا عندنا
ومهمتهم يريحونا مقابل المرتبات الفخيمة اللى بيقبضوها والامتيازات الجبارة والفيلل والقصور والمكاتب المكيفة اللى كل واحد لازم يجدد ديكوراتها بملايين الجنيهات

كل ده هم اصلا مش شايفين انهم بياخدوه سفلقة

بل معتبرينه حق لهم

وكفاية علينا احنا المواطنين الرعاع انهم عايشين معانا تحت سما واحدة وبنبص معها على نفس القمر ونفس الشمس اللى بتنور لنا بتنور لهم

كفاية علينا كده

هو احنا ح ننهب

Bella said...

BinO

مرحبا بك

تصريحات السادة المسؤولين فقدت مصداقيتها منذ زمن بعيد واصبح كلامهم مجرد كلام تسمعه وتقوم تتوضا حتى تغسل أذنك مما سمعت

يعني لاكلامهم له مصداقية ولا هم بيقولوه علشان خاطرنا اصلا

كل واحد فيهم مهمته الاصلية الجلوس على الكرسي اطول فترة زمنية ممكن ومايستتبع ذلك من هبر ونهب وتسليك وخلافه

فنيجي احنا بقى بمنتهي السماجة ونطالبهم يشتغلوا وكمان يحلوا لنا مشاكلنا !!!

أظن مافيش شعب في الدنيا كلها وصل لدرجة البجاحة اللى وصلنا لها دي

ماكل شعب الدنيا مكتومة وساكتة
اشمعنى احنا اللى صوتنا عالي وبنسرسع في الفاضية والفاضية

اصل مافيش اي مليانة في حياتنا خلاص

لامليانة مية

ولا معدة مليانة أكل

ولا حتى بني آدمين مليانة أخلاق

كله فاضي في فاضي

ثم كل بلاد الدنيا عندهم مشاكل وقضا أخف من قضا

يعني ياشعب منك له مش احسن تموتوا من العطش بدل ماتموتوا غرقانين في مياة الفيضان

اذا كانت بريطانيا بجبروتها وتقدمها
وأوروبا كلها بتيجي عليها مواسم فيضان بتغرق فيها

واحنا منشفين لكم الفيضانات ومخوفينها ومانعينها تقرب

حتى ولاسامعين منكم كلمة شكر

شعب ماعندوش تقدير صحيح

شركة العياد said...

افضل شركة نقل عفش بالمدينة المنورة
نقوم بتقديم خدمة تعبئة وتغليف العفش والملابس والمقتنيات الثمية والغالية عليك عزيزى العميل.
نقل عفش بالمدينة المنورة
ونحن كافضل شركة نقل اثاث بالمدينة المنورة نهتم بنقل الزجاج والمرايا وتغليف النجف والأباليك باقصي درجات الأمان مهمة نقل العفش مع شركة المشرق لنقل الاثاث تتحول من مهمة شاقة ومتعبه الي مهمه ممتعه لان سياستنا في العمل تقوم علي الحب وارضاء جميع عملائنا , مما يجعل عملنا يتسم بالثقه والاحتراف ونحن كافضل شركة نقل عفش بالمدينة المنورة نمتلك افضل السلالم والاوناش المخصصه لنقل الاثاث من والي الاماكن العاليه كما نمتلك افضل سيارات النقل المخصصه والمجهزة لنقل الاثاث بالاضافه الي السائقين المحترفين التي تتمحور مهمتهم حول نقل الاثاث بامن وسلامة علاوة علي ذلك كتيبة العمال الأكفاء والمدربين بعناية كل هذا من اجل تقديم افضل وارقي الخدمات لك عزيزي العميل ومن اجل سلامة منقولاتك الغالية الى المكان المخصص وفى اسرع وقت.